ರಸ್ತೆಯಲ್ಲಿ ನಮಾಜ್ ಮತ್ತು ಅಜಾನ್ ನಿಷೇಧಿಸುವ ಚಿಂತನೆಯಲ್ಲಿ ಡೆನ್ಮಾರ್ಕ್ ಸರಕಾರ!

ಕೋಪನ್ ಹ್ಯಾಗನ್ (ಡೆನ್ಮಾರ್ಕ್) – ಯುರೋಪಿಯನ್ ದೇಶವಾದ ಡೆನ್ಮಾರ್ಕ್ ಶೀಘ್ರದಲ್ಲೇ ರಸ್ತೆಗಳಲ್ಲಿ ನಮಾಜ್ ಮಾಡುವುದನ್ನು ಮತ್ತು ಅಜಾನ್ (ಮುಸಲ್ಮಾನರನ್ನು ದೊಡ್ಡ ಧ್ವನಿಯಲ್ಲಿ ನಮಾಜ್‌ ಗಾಗಿ ಆಹ್ವಾನಿಸುವುದು) ಕೂಗುವುದನ್ನು ನಿಷೇಧಿಸಲು ಚಿಂತನೆ ನಡೆಸುತ್ತಿದೆ.

ಡೆನ್ಮಾರ್ಕ್ ಸಚಿವ ಮಾರ್ಟನ್ ಬೋಡಸ್ಕೋವ್ ಮಾತನಾಡಿ, ‘ರಸ್ತೆಗಳಲ್ಲಿ ನಮಾಜ್ ಮಾಡುವುದು ಮತ್ತು ಅಜಾನ್‌ ನಿಷೇಧಿಸಲು ಸಾಧ್ಯವೇ? ಎನ್ನುವುದರ ಕುರಿತು ಅಧಿಕಾರಿಗಳು ಕಾನೂನು ಚೌಕಟ್ಟನ್ನು ಮರುಪರಿಶೀಲಿಸಲು ಪ್ರಾರಂಭಿಸಲಿದ್ದಾರೆ. ಕೋಪನ್ ಹ್ಯಾಗನ್ ಸೇರಿದಂತೆ ಕೆಲವು ಭಾಗಗಳಲ್ಲಿ ಧ್ವನಿ ಮಾಲಿನ್ಯಕ್ಕೆ ಸಂಬಂಧಿಸಿದ ಕಟ್ಟುನಿಟ್ಟಿನ ನಿಯಮಗಳಿರುವುದರಿಂದ ಈಗಾಗಲೇ ಬಹಿರಂಗವಾಗಿ ನಮಾಜ್ ಮಾಡುವುದನ್ನು ನಿಷೇಧಿಸಲಾಗಿದೆ; ಆದರೆ ಈಗ ಡೆನ್ಮಾರ್ಕ್ ಸರಕಾರ ಇನ್ನಷ್ಟು ಕಠಿಣ ನಿಷೇಧ ಹೇರಲು ಯೋಚಿಸುತ್ತಿದೆ. ಡೆನ್ಮಾರ್ಕ್‌ನಲ್ಲಿ ಮಸೀದಿಗಳಿಂದ ದಿನಕ್ಕೆ 5 ಬಾರಿ ಅಜಾನ್ ಕೂಗಲು ಅವಕಾಶವಿಲ್ಲ. ಡೆನ್ಮಾರ್ಕ್‌ನ ಕಟ್ಟಡಗಳ ಮೇಲ್ಛಾವಣಿಯಿಂದ ಅಜಾನ್ ಧ್ವನಿ ಕೇಳಿಸಬಾರದು. ಡೆನ್ಮಾರ್ಕ್‌ನಲ್ಲಿ ಇದಕ್ಕೆ ಯಾವುದೇ ಸ್ಥಾನವಿಲ್ಲ ಮತ್ತು ನೀವು ಡೆನ್ಮಾರ್ಕ್‌ನಲ್ಲಿ ತಿರುಗಾಡುವಾಗ, ಇಸ್ಲಾಮಾಬಾದ್‌ ನ (ಪಾಕಿಸ್ತಾನದ ರಾಜಧಾನಿ) ಯಾವುದೋ ಒಂದು ಪ್ರದೇಶಕ್ಕೆ ಬಂದಿದ್ದೀರಾ ಎಂಬ ಅನುಮಾನ ನಿಮಗೆ ಬರಬಾರದು’ ಎಂದು ಹೇಳಿದ್ದಾರೆ.

ಡೆನ್ಮಾರ್ಕ್‌ನಲ್ಲಿ ಈ ಹಿಂದೆ 2020 ಮತ್ತು 2025 ರಲ್ಲೂ ಈ ಕುರಿತು ಚರ್ಚೆಗಳು ನಡೆದಿದ್ದವು; ಆದರೆ ದೇಶಾದ್ಯಂತ ನಿಷೇಧವನ್ನು ಜಾರಿಗೆ ತರಲು ಸಾಧ್ಯವಾಗಿರಲಿಲ್ಲ.