ಮೊಜತಬಾ ಅಲಿ ಖಮೇನಿ ಇರಾನ್‌ನ ನೂತನ ಸರ್ವೋಚ್ಚ ನಾಯಕ

ಟೆಹರಾನ್ (ಇರಾನ್) – ಅಯಾತುಲ್ಲಾ ಅಲಿ ಖಮೇನಿ ಅವರ ಪುತ್ರ ಮೊಜತಬಾ ಖಮೇನಿ (56 ವರ್ಷ) ಅವರನ್ನು ತಜ್ಞರ ಸಮಿತಿಯು (Assembly of Experts) ದೇಶದ ನೂತನ ಸರ್ವೋಚ್ಚ ನಾಯಕನನ್ನಾಗಿ ನೇಮಕ ಮಾಡಿದೆ ಎಂದು ಇರಾನ್‌ನ ಅಧಿಕೃತ ಮಾಧ್ಯಮಗಳು ತಿಳಿಸಿವೆ. ಮಾರ್ಚ್ 8 ರಂದು ಪ್ರಕಟವಾದ ಅಧಿಕೃತ ಪ್ರಕಟಣೆಯ ಪ್ರಕಾರ, ನಿರ್ಣಾಯಕ ಮತದಾನದ ಮೂಲಕ ತಜ್ಞರ ಸಮಿತಿಯು ಅಯಾತುಲ್ಲಾ ಸೈಯದ್ ಮೊಜತಬಾ ಹೊಸೇನಿ ಖಮೇನಿ ಅವರನ್ನು ಇರಾನ್ ಇಸ್ಲಾಮಿಕ್ ರಿಪಬ್ಲಿಕ್‌ನ ‘ಪವಿತ್ರ ವ್ಯವಸ್ಥೆಯ’ ಮೂರನೇ ನಾಯಕನನ್ನಾಗಿ ನೇಮಿಸಿದೆ. ಫೆಬ್ರವರಿ 28 ರಂದು ಅಮೆರಿಕಾ-ಇಸ್ರೇಲ್ ದಾಳಿಯಲ್ಲಿ ಅಯಾತುಲ್ಲಾ ಅಲಿ ಖಮೇನಿ ಅವರು ಹತ್ಯೆಗೀಡಾಗಿದ್ದರು.

ನವೆಂಬರ್ 2019 ರಲ್ಲಿ ಅಮೆರಿಕಾದ ಖಜಾನೆ ಇಲಾಖೆಯು ಮೊಜತಬಾ ಅವರ ಮೇಲೆ ನಿರ್ಬಂಧಗಳನ್ನು ಹೇರಿತ್ತು. ಮೊಜತಬಾ ಅವರು ತಮ್ಮ ತಂದೆಯ ದಮನಕಾರಿ ಉದ್ದೇಶಗಳು ಮತ್ತು ಅಸ್ಥಿರ ಪ್ರಾದೇಶಿಕ ಆಕಾಂಕ್ಷೆಗಳನ್ನು ಪೂರೈಸಲು ‘ಇಸ್ಲಾಮಿಕ್ ರೆವಲ್ಯೂಷನರಿ ಗಾರ್ಡ್ ಕಾರ್ಪ್ಸ್-ಕ್ಯೂಡ್ಸ್ ಫೋರ್ಸ್’ ಮತ್ತು ‘ಬಾಸಿಜ್ ರೆಸಿಸ್ಟೆನ್ಸ್ ಫೋರ್ಸ್’ನ ಉನ್ನತ ಮಿಲಿಟರಿ ಅಧಿಕಾರಿಗಳೊಂದಿಗೆ ನಿಕಟವಾಗಿ ಕೆಲಸ ಮಾಡಿದ್ದಾರೆ ಎಂದು ಇಲಾಖೆಯು ಆರೋಪಿಸಿತ್ತು. ಮೊಜತಬಾ ಅವರು ಯುನೈಟೆಡ್ ಕಿಂಗ್‌ಡಮ್, ಸ್ವಿಟ್ಜರ್ಲೆಂಡ್ ಮತ್ತು ಲಿಕ್ಟೆನ್‌ಸ್ಟೈನ್‌ನಲ್ಲಿ ಆಸ್ತಿಗಳನ್ನು ಹೊಂದಿದ್ದಾರೆ. 2005 ರಲ್ಲಿ ಇರಾನ್ ಅಧ್ಯಕ್ಷರಾಗಿ ಆಯ್ಕೆಯಾದ ಕಟ್ಟರಪಂಥಿ ಮಹಮೂದ್ ಅಹ್ಮದಿನೆಜಾದ್ ಅವರ ರಾಜಕೀಯ ಬೆಳವಣಿಗೆಯೊಂದಿಗೆ ಇವರು ನಿಕಟ ಸಂಬಂಧ ಹೊಂದಿದ್ದರು. ಮೊಜತಬಾ ಅವರು ಯಾವುದೇ ಅಧಿಕೃತ ಹುದ್ದೆಯನ್ನು ಹೊಂದಿರದಿದ್ದರೂ, ತಂದೆಯ ಪರವಾಗಿ ನಿರ್ಧಾರಗಳನ್ನು ತೆಗೆದುಕೊಳ್ಳುತ್ತಿದ್ದರು ಎಂದು ಅಮೆರಿಕಾ ಹೇಳಿದೆ.

ಅಮೆರಿಕಾ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಈ ನಿರ್ಧಾರವನ್ನು ‘ಅಸ್ವೀಕಾರಾರ್ಹ’ ಎಂದು ಕರೆದಿದ್ದಾರೆ. “ಹೊಸ ನಾಯಕನಿಗೆ ನಮ್ಮಿಂದ ಮಾನ್ಯತೆ ಸಿಗದಿದ್ದರೆ, ಅವರು ಹೆಚ್ಚು ಕಾಲ ಉಳಿಯುವುದಿಲ್ಲ” ಎಂದು ಟ್ರಂಪ್ ಎಚ್ಚರಿಸಿದ್ದಾರೆ. ಅಲಿ ಖಮೇನಿ ಅವರ ಮರಣದ ನಂತರ, ಇಸ್ರೇಲ್ ಮತ್ತು ಅಮೆರಿಕಾದ ಅನುಮತಿಯಿಲ್ಲದೆ ಸರ್ವೋಚ್ಚ ನಾಯಕನಾಗಿ ಆಯ್ಕೆಯಾಗುವ ಯಾರನ್ನೇ ಆಗಲಿ ಪತ್ತೆಹಚ್ಚಿ ಹತ್ಯೆ ಮಾಡುವುದಾಗಿ ಬೆದರಿಕೆ ಹಾಕಲಾಗಿದೆ.

ಇರಾನ್ ಸರ್ವೋಚ್ಚ ನಾಯಕನ ಆಯ್ಕೆ ಆಂತರಿಕ ವಿಷಯ! – ಚೀನಾ

ಈ ಕುರಿತು ಚೀನಾದ ವಿದೇಶಾಂಗ ಸಚಿವಾಲಯವು, ಇದು ಇರಾನ್‌ನ ಆಂತರಿಕ ವಿಷಯ ಎಂದು ಹೇಳಿದೆ. ವಕ್ತಾರ ಗುವೋ ಜಿಯಾಕುನ್ ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿ, ಇದು ಇರಾನ್ ತನ್ನ ಸಂವಿಧಾನದ ಆಧಾರದ ಮೇಲೆ ತೆಗೆದುಕೊಂಡ ನಿರ್ಧಾರವಾಗಿದೆ ಎಂದು ತಿಳಿಸಿದರು. ಮಾರ್ಚ್ 7 ರಂದು ಚೀನಾದ ವಿದೇಶಾಂಗ ಸಚಿವ ವಾಂಗ್ ಯಿ ಅವರು ಇರಾನ್‌ನ ಸಾರ್ವಭೌಮತ್ವವನ್ನು ಗೌರವಿಸುವಂತೆ ಕರೆ ನೀಡಿದ್ದರು ಮತ್ತು ಆಡಳಿತ ವ್ಯವಸ್ಥೆಯಲ್ಲಿ ಯಾವುದೇ ಬಾಹ್ಯ ಹಸ್ತಕ್ಷೇಪದ ವಿರುದ್ಧ ಎಚ್ಚರಿಕೆ ನೀಡಿದ್ದರು. ಸರ್ಕಾರವನ್ನು ಬದಲಾಯಿಸುವ ಪ್ರಯತ್ನಗಳಿಗೆ ಯಾವುದೇ ಸಾರ್ವಜನಿಕ ಬೆಂಬಲ ಸಿಗುವುದಿಲ್ಲ ಎಂದು ವಾಂಗ್ ಹೇಳಿದ್ದಾರೆ.