“ರಾ.ಸ್ವ. ಸಂಘವು ಒಂದು ದೆವ್ವ ಆಗಿದ್ದರೆ, ಭಾಜಪ ಅದರ ನೆರಳಂತೆ!” – Priyank Kharge

ನಾಲಿಗೆ ಹರಿ ಬಿಟ್ಟ ಕಾಂಗ್ರೆಸ್ ಸಚಿವ ಪ್ರಿಯಾಂಕ್ ಖರ್ಗೆ !

ಬೆಂಗಳೂರು – ರಾಷ್ಟ್ರೀಯ ಸ್ವಯಂಸೇವಕ ಸಂಘವು ಒಂದು ದೆವ್ವ ಆಗಿದ್ದರೆ, ಭಾಜಪ ಅದರ ನೆರಳಾಗಿದೆ. ನಾವು ನೆರಳಿನೊಂದಿಗೆ ಹೋರಾಡುತ್ತಿದ್ದೇವೆ, ದೆವ್ವದೊಂದಿಗೆ ಹೋರಾಡಿದರೆ ಮಾತ್ರ ದೇಶದ ಉದ್ಧಾರ ಸಾಧ್ಯ ಎಂದು ರಾಜ್ಯದ ಗ್ರಾಮೀಣಾಭಿವೃದ್ಧಿ ಸಚಿವ ಹಾಗೂ ಕಾಂಗ್ರಸ್‌ನ ಅಧ್ಯಕ್ಷ ಮಲ್ಲಿಕಾರ್ಜುನ ಖರ್ಗೆ ಅವರ ಪುತ್ರ ಪ್ರಿಯಾಂಕ್ ಖರ್ಗೆ ಹೇಳಿಕೆ ನೀಡಿದ್ದಾರೆ. ನಗರದ ಗಾಂಧಿ ಭವನ ಸಭಾಂಗಣದಲ್ಲಿ ಆಯೋಜಿಸಲಾಗಿದ್ದ ಪತ್ರಕರ್ತ ಇರ್ಷಾದ್ ಉಪ್ಪಿನಂಗಡಿ ಅವರ ‘ಬ್ಲಡ್ ಅಂಡ್ ಟಿಯರ್ಸ್ ಆಫ್ ದಿ ಕೋಸ್ಟ್’ (ಕರಾವಳಿಯ ರಕ್ತ ಮತ್ತು ಕಣ್ಣೀರು) ಪುಸ್ತಕ ಬಿಡುಗಡೆ ಸಮಾರಂಭದಲ್ಲಿ ಅವರು ಮಾತನಾಡುತ್ತಿದ್ದರು. ರಾ.ಸ್ವ. ಸಂಘದ ಹಿಂದೆ ದೊಡ್ಡ ಮಟ್ಟದ ಅಕ್ರಮ ‘ಮನಿ ಲಾಂಡರಿಂಗ್’ (ಕಪ್ಪು ಹಣವನ್ನು ಬಿಳಿ ಮಾಡುವ ಪ್ರಕ್ರಿಯೆ) ದಂಧೆಯಿದೆ ಎಂದು ಪ್ರಿಯಾಂಕ್ ಖರ್ಗೆ ಈ ಸಂದರ್ಭದಲ್ಲಿ ಗಂಭೀರ ಆರೋಪ ಮಾಡಿದರು.

ಖರ್ಗೆ ಅವರು ಮಾತನಾಡಿ, ‘ನಾನು ಈಗ ರಾ.ಸ್ವ. ಸಂಘದ ಬಗ್ಗೆ ಸ್ವಲ್ಪ ಆಳವಾದ ಅಧ್ಯಯನ ಮಾಡುತ್ತಿದ್ದೇನೆ. ಸಂಘಕ್ಕೆ ‘ನಿಮ್ಮ ಬಳಿ ಇಷ್ಟೊಂದು ಹಣ ಎಲ್ಲಿಂದ ಬರುತ್ತದೆ?’ ಎಂದು ಕೇಳಿದರೆ ಅವರ ಬಳಿ ಉತ್ತರವಿಲ್ಲ. ಹಾಗೆಯೇ ‘ಸಂಘವು ನೋಂದಣಿಯಾಗಬೇಕು’ ಎಂದು ಹೇಳಿದರೆ, ‘ನೋಂದಣಿ ಮಾಡುವ ಅಗತ್ಯವಿಲ್ಲ, ಇದು ವ್ಯಕ್ತಿಗಳ ಸಂಘಟನೆ’ ಎಂದು ಸರಸಂಘಚಾಲಕ ಮೋಹನ್ ಭಾಗವತ್ ಹೇಳುತ್ತಾರೆ. ಇಂದು ಅಥವಾ ನಾಳೆ ಸಂಘದ ನೋಂದಣಿ ಆಗಲೇಬೇಕು. ನಾನು ಅದನ್ನು ಮಾಡಿಸುತ್ತೇನೆ,’’ಎಂದು ಹೇಳಿದರು.