ಶಾಸಕ ಹುಮಾಯೂನ್ ಕಬೀರ್ ಅವರಿಂದ ಬಾಬರಿ ಮಸೀದಿಗೆ ಶಂಕುಸ್ಥಾಪನೆ ! – Babri Masjid Foundation Laid

ತಲೆಯ ಮೇಲೆ ಇಟ್ಟಿಗೆಗಳನ್ನು ಹೊತ್ತು ತಂದ ಅನೇಕ ಮುಸ್ಲಿಮರು!

ಮುರ್ಶಿದಾಬಾದ್ (ಬಂಗಾಳ) – ಇಲ್ಲಿನ ಬೇಲ್‌ಡಾಂಗಾದಲ್ಲಿ ಶಾಸಕ ಹುಮಾಯೂನ್ ಕಬೀರ್ ಅವರ ಉಪಸ್ಥಿತಿಯಲ್ಲಿ ಡಿಸೆಂಬರ್ 6 ರಂದು ಬಾಬರಿ ಮಸೀದಿಗೆ ಶಂಕುಸ್ಥಾಪನೆ ಮಾಡಲಾಯಿತು. ಇದಕ್ಕಾಗಿ ಸೌದಿ ಅರೇಬಿಯಾದಿಂದ ಇಬ್ಬರು ಧಾರ್ಮಿಕ ವಿದ್ವಾಂಸರು ಆಗಮಿಸಿದ್ದರು. ಇದರೊಂದಿಗೆ ಬಂಗಾಳ ಮತ್ತು ಇತರ ರಾಜ್ಯಗಳಿಂದ ಬಂದ ಸಾವಿರಾರು ಮುಸ್ಲಿಮರು ಕೂಡ ಉಪಸ್ಥಿತರಿದ್ದರು. ಅನೇಕರು ತಮ್ಮ ತಲೆಯ ಮೇಲೆ ಇಟ್ಟಿಗೆಗಳನ್ನು ತಂದರು. ಕಬೀರ್ ಕಳೆದ ವರ್ಷವೇ ಈ ಬಗ್ಗೆ ಘೋಷಣೆ ಮಾಡಿದ್ದರು ಮತ್ತು ಅವರು ಅದನ್ನು ಕಾರ್ಯರೂಪಕ್ಕೆ ತಂದಿದ್ದಾರೆ ಎಂದು ಇಲ್ಲಿ ಹೇಳಲಾಗುತ್ತಿದೆ. ಈ ಸಂದರ್ಭದಲ್ಲಿ ಪೊಲೀಸರು ಭಾರಿ ಬಂದೋಬಸ್ತ್ ಏರ್ಪಡಿಸಿದ್ದರು. ಈ ಕಾರ್ಯಕ್ರಮದಲ್ಲಿ ಭಾಗವಹಿಸಿದವರಿಗೆ ಊಟದ ವ್ಯವಸ್ಥೆ ಮಾಡಲಾಗಿತ್ತು. ಕಾರ್ಯಕ್ರಮಕ್ಕಾಗಿ 150 ಅಡಿ ಉದ್ದ ಮತ್ತು 80 ಅಡಿ ಅಗಲದ ವೇದಿಕೆಯನ್ನು ನಿರ್ಮಿಸಲಾಗಿತ್ತು. ಇಡೀ ಕಾರ್ಯಕ್ರಮದ ವೆಚ್ಚ ಸುಮಾರು 60 ರಿಂದ 70 ಲಕ್ಷ ರೂಪಾಯಿ ಆಗಿರುವ ಸಾಧ್ಯತೆ ಇದೆ ಎಂದು ಅಂದಾಜಿಸಲಾಗಿದೆ.

ಬಾಬರ್ ಹೆಸರಿನಲ್ಲಿ ಒಂದು ಇಟ್ಟಿಗೆಯನ್ನು ಇಟ್ಟರೂ ಅದನ್ನು ಭಾಜಪ ಕಿತ್ತುಹಾಕುತ್ತದೆ! – ಉತ್ತರ ಪ್ರದೇಶದ ಉಪಮುಖ್ಯಮಂತ್ರಿ ಕೇಶವ ಪ್ರಸಾದ್ ಮೌರ್ಯ ಅವರ ಎಚ್ಚರಿಕೆ!

ಇದೆಲ್ಲವೂ ತೃಣಮೂಲ ಕಾಂಗ್ರೆಸ್‌ನ ತೋರಿಕೆಯಾಗಿದೆ. ಬಂಗಾಳದಲ್ಲಿ ಭಾಜಪ ಸರಕಾರ ಬರಲಿದೆ. ಬಾಬರ್ ಹೆಸರಿನಲ್ಲಿ ಒಂದು ಇಟ್ಟಿಗೆಯನ್ನು ಇಟ್ಟರೂ ಅದನ್ನು ಭಾಜಪ ಕಿತ್ತುಹಾಕುತ್ತದೆ, ಎಂದು ಉಪಮುಖ್ಯಮಂತ್ರಿ ಕೇಶವ ಪ್ರಸಾದ್ ಮೌರ್ಯ ಹೇಳಿದ್ದಾರೆ.

ಹುಮಾಯೂನ್ ಕಬೀರ್ ಭಾಜಪದ ವ್ಯಕ್ತಿ! – ಕಾಂಗ್ರೆಸ್

ಉತ್ತರಪ್ರದೇಶದ ಕಾಂಗ್ರೆಸ್ ಸಂಸದ ಇಮ್ರಾನ್ ಮಸೂದ್ ಅವರು, ಹುಮಾಯೂನ್ ಕಬೀರ್ ಭಾಜಪದ ವ್ಯಕ್ತಿ ಎಂದು ಆರೋಪಿಸಿದರು. ಅವರು 2019 ರಲ್ಲಿ ಭಾಜಪದಿಂದ ಚುನಾವಣೆಯಲ್ಲಿ ಸ್ಪರ್ಧಿಸಿದ್ದರು. ಅವರು ದೇಶದಲ್ಲಿ ದ್ವೇಷವನ್ನು ಹರಡಲು ನೋಡುತ್ತಿದ್ದಾರೆ. ಮಸೀದಿಯು ಪ್ರಾರ್ಥನೆಗಾಗಿ ಇರುತ್ತದೆ. “ನೀವು (ಕಬೀರ್) ಇಷ್ಟು ಧರ್ಮನಿಷ್ಠರಾಗಿದ್ದರೆ, 2019 ರಲ್ಲಿ ಭಾಜಪದಿಂದ ಏಕೆ ಸ್ಪರ್ಧಿಸಿದ್ದೀರಿ? ಆ ಸಮಯದಲ್ಲಿ ನಿಮಗೆ ಭಾಜಪದ ನಿಲುವುಗಳ ಬಗ್ಗೆ ತಿಳಿದಿರಲಿಲ್ಲವೇ?” ಎಂದು ಮಸೂದ್ ಪ್ರಶ್ನಿಸಿದ್ದಾರೆ. ಹುಮಾಯೂನ್ ಕಬೀರ್ ಅವರ ರಾಜಕೀಯ ಪಯಣ ಕಾಂಗ್ರೆಸ್, ಭಾಜಪ ಮತ್ತು ನಂತರ ತೃಣಮೂಲ ಕಾಂಗ್ರೆಸ್ ಅನ್ನು ಒಳಗೊಂಡಿದೆ. ತೃಣಮೂಲ ಇತ್ತೀಚೆಗೆ ಅವರನ್ನು ಪಕ್ಷದಿಂದ ಅಮಾನತುಗೊಳಿಸಿದೆ.

ಬಾಬರ್ ಹೆಸರಿನಲ್ಲಿ ಮಸೀದಿ ನಿರ್ಮಿಸುವುದು ರಾಜಕೀಯ ಉದ್ದೇಶ! – ಇಂಡೋ-ಇಸ್ಲಾಮಿಕ್ ಕಲ್ಚರಲ್ ಫೌಂಡೇಶನ್

‘ಇಂಡೋ-ಇಸ್ಲಾಮಿಕ್ ಕಲ್ಚರಲ್ ಫೌಂಡೇಶನ್’ನ ಕಾರ್ಯದರ್ಶಿ ಅಥರ್ ಹುಸೇನ್ ಅವರು, ಮಸೀದಿಯು ಸರಿಯಾದ ಸ್ಥಳದಲ್ಲಿ ಇದ್ದು, ಅದರ ನಕ್ಷೆಯನ್ನು ಅನುಮೋದಿಸಿದರೆ, ಧಾರ್ಮಿಕ ಜನರು ಅಲ್ಲಿ ನಿರ್ಮಾಣವನ್ನು ಮಾಡಬಹುದು; ಆದರೆ ಕೇವಲ ಬಾಬರ್ ಹೆಸರಿನಲ್ಲಿ ಮಸೀದಿ ನಿರ್ಮಿಸುವುದು ರಾಜಕೀಯ ಉದ್ದೇಶವಾಗಿದೆ. ಇಂತಹ ಕೆಲಸದಿಂದ ನಿಜವಾದ ಶ್ರದ್ಧೆಯ ಭಾವನೆ ಕಡಿಮೆಯಾಗುತ್ತದೆ. ಹುಮಾಯೂನ್ ಕಬೀರ್ ಮಸೀದಿ ನಿರ್ಮಿಸಲು ಬಯಸಿದರೆ, ಹೆಸರು ಇಡುವ ವಿಷಯದಲ್ಲಿ ಒತ್ತಾಯ ಮಾಡಬಾರದು ಎಂದು ಹೇಳಿದ್ದಾರೆ.