ಪಾಕಿಸ್ತಾನದ ಸೇನಾ ಮುಖ್ಯಸ್ಥ ಅಸಿಮ್ ಮುನೀರ್ ಅವರ ಅಧಿಕಾರಾವಧಿ ಅಧಿಕೃತವಾಗಿ ಮುಕ್ತಾಯ! : Asim Munir

ಮೂರು ಸೇನಾ ಪಡೆಗಳ ಮುಖ್ಯಸ್ಥರನ್ನಾಗಿ ನೇಮಕ ಮಾಡಿದ ಅಧಿಸೂಚನೆಯನ್ನು ಪಾಕಿಸ್ತಾನ ಸರಕಾರ ಇನ್ನೂ ಪ್ರಕಟಿಸಿಲ್ಲ!

ಇಸ್ಲಾಮಾಬಾದ್ (ಪಾಕಿಸ್ತಾನ) – ಪಾಕಿಸ್ತಾನದಲ್ಲಿ 27ನೇ ಸಂವಿಧಾನ ತಿದ್ದುಪಡಿ ಮಾಡಿ, ಸೇನಾ ಮುಖ್ಯಸ್ಥ ಅಸಿಮ್ ಮುನೀರ್ ಅವರನ್ನು ದೇಶದ ಮೊದಲ ‘ಚೀಫ್ ಆಫ್ ಡಿಫೆನ್ಸ್ ಫೋರ್ಸಸ್’ (ಮೂರು ಸೇನಾ ಪಡೆಗಳ ಮುಖ್ಯಸ್ಥ) ಆಗಿ ನೇಮಿಸಲಾಯಿತು. ಆದರೆ, ಈ ಬಗ್ಗೆ ಅಧಿಸೂಚನೆ ಇನ್ನೂ ಹೊರಡಿಸಲಾಗಿಲ್ಲ; ಈ ಆದೇಶವನ್ನು ನವೆಂಬರ್ 29ರೊಳಗೆ ಪ್ರಕಟಿಸಬೇಕಿತ್ತು; ಆದರೆ ಹಾಗಾಗದ ಕಾರಣ, ತಾಂತ್ರಿಕವಾಗಿ ಮುನೀರ್ ನಿವೃತ್ತ ಸೇನಾಧಿಕಾರಿಯಾಗಿದ್ದಾರೆ ಎಂದು ಹೇಳಲಾಗುತ್ತಿದೆ. ಪ್ರಧಾನಿ ಶಹಬಾಜ್ ಷರೀಫ್ ದೇಶದಲ್ಲಿ ಇಲ್ಲದಿರುವುದು ಅಧಿಸೂಚನೆ ಹೊರಡಿಸದಿರಲು ಕಾರಣ ಎಂದು ಹೇಳಲಾಗಿದೆ. ಅವರು ಲಂಡನ್‌ಗೆ ತೆರಳಿದ್ದಾರೆ.

ಮಾಧ್ಯಮ ವರದಿಗಳ ಪ್ರಕಾರ, ಮುನೀರ್ ಅವರ ಅವಧಿಯ ವಿಸ್ತರಣೆ ಅಥವಾ ‘ಚೀಫ್ ಆಫ್ ಡಿಫೆನ್ಸ್ ಫೋರ್ಸಸ್’ ನೇಮಕಾತಿ ಆದೇಶಕ್ಕೆ ಸಹಿ ಹಾಕಬೇಕಾದ ಪರಿಸ್ಥಿತಿ ಅವರಿಗೆ ಎದುರಾಗದಿರಲಿ ಎಂದು ಶಹಬಾಜ್ ಷರೀಫ್ ಅವರು ಉದ್ದೇಶಪೂರ್ವಕವಾಗಿ ಈ ಪ್ರಕ್ರಿಯೆಯಿಂದ ದೂರವಿದ್ದಾರೆ. ಈ ಹುದ್ದೆ ಸಿಗುತ್ತಿದ್ದಂತೆ ಮುನೀರ್ ಅವರ ಕೈಗೆ ಪಾಕಿಸ್ತಾನದ ಅಣುಬಾಂಬ್‌ನ ನಿಯಂತ್ರಣ ಸಿಗಲಿದೆ.

“ಅಧಿಸೂಚನೆ ಪ್ರಕ್ರಿಯೆ ಆರಂಭವಾಗಿದೆ!” – ರಕ್ಷಣಾ ಸಚಿವ

ರಕ್ಷಣಾ ಸಚಿವ ಖ್ವಾಜಾ ಆಸಿಫ್ ಅವರು ‘ಎಕ್ಸ್’ (X) ನಲ್ಲಿ ಪೋಸ್ಟ್ ಮಾಡಿ, ಸಿಡಿಎಫ್‌ (CDF) ಅಧಿಸೂಚನೆಯ ಪ್ರಕ್ರಿಯೆಯನ್ನು ಆರಂಭಿಸಲಾಗಿದೆ. ಶೀಘ್ರದಲ್ಲೇ ಅಧಿಸೂಚನೆ ಪ್ರಕಟಿಸಲಾಗುವುದು ಎಂದು ತಿಳಿಸಿದ್ದಾರೆ.

“ಮುನೀರ್ ಏನಾದರೂ ಮಾಡಬಹುದು!” – ತಿಲಕ್ ದೇವೇಶರ್

ಈ ಕುರಿತು, ಭಾರತದ ಮಾಜಿ ರಾಷ್ಟ್ರೀಯ ಭದ್ರತಾ ಸಲಹೆಗಾರ ಮಂಡಳಿಯ ಸದಸ್ಯ ತಿಲಕ್ ದೇವೇಶರ್ ಅವರು, ಪ್ರಧಾನಿ ಶಹಬಾಜ್ ಷರೀಫ್ ಉದ್ದೇಶಪೂರ್ವಕವಾಗಿ ಹೀಗೆ ಮಾಡಿದ್ದಾರೆ ಎಂದು ಹೇಳಿದ್ದಾರೆ. ಅಸಿಮ್ ಮುನೀರ್ ತಮ್ಮ ಶಕ್ತಿ ಪ್ರದರ್ಶಿಸಲು ಭಾರತದ ವಿರುದ್ಧ ಯಾವುದೇ ಉದ್ವಿಗ್ನತೆಯನ್ನು ಸೃಷ್ಟಿಸಲು ಪ್ರಯತ್ನಿಸಬಹುದು. ಮುನೀರ್ ಈಗ ಅಧಿಕೃತವಾಗಿ ಸೇನಾ ಮುಖ್ಯಸ್ಥರಾಗಿದ್ದಾರೆಯೇ ಇಲ್ಲವೇ ಎಂಬುದು ಸ್ಪಷ್ಟವಾಗಿಲ್ಲವಾದರೂ, ಅವರ ಪ್ರಭಾವ ಎಷ್ಟಿದೆಯೆಂದರೆ ಅವರು ಏನಾದರೂ ಮಾಡಬಹುದು. ಪಾಕಿಸ್ತಾನಕ್ಕೇ ಸೇನಾ ಮುಖ್ಯಸ್ಥರು ಯಾರು ಎಂಬ ಬಗ್ಗೆ ಖಚಿತತೆ ಇಲ್ಲ. ಭಾರತದ ಮೇಲೆ ಒತ್ತಡ ಹೇರುವ ಅಥವಾ ಯಾವುದೇ ಘಟನೆಯನ್ನು ಪ್ರಚೋದಿಸುವ ಯೋಚನೆ ಮುನೀರ್ ಅವರ ಮನಸ್ಸಿನಲ್ಲಿ ಬಂದರೆ, ಪರಿಸ್ಥಿತಿ ಇನ್ನಷ್ಟು ಅಪಾಯಕಾರಿಯಾಗಲಿದೆ.

ಮುನೀರ್ ಮತ್ತು ಶಹಬಾಜ್ ಷರೀಫ್ ನಡುವೆ ಒಪ್ಪಂದ: ಇಮ್ರಾನ್ ಖಾನ್‌ರನ್ನು ‘ನಿರ್ನಾಮ’ ಮಾಡುವ ಷರತ್ತು

ಅಸಿಮ್ ಮುನೀರ್ ಅವರನ್ನು ಮೂರು ರಕ್ಷಣಾ ಪಡೆಗಳ ಮುಖ್ಯಸ್ಥರನ್ನಾಗಿ ಮಾಡುವ ಬದಲಾಗಿ, ಪ್ರಧಾನಿ ಶಹಬಾಜ್ ಷರೀಫ್ ಮತ್ತು ಅವರ ಸಹೋದರ ಹಾಗೂ ಲಂಡನ್‌ನಲ್ಲಿ ನೆಲೆಸಿರುವ ಮಾಜಿ ಪ್ರಧಾನಿ ನವಾಜ್ ಷರೀಫ್ ಅವರು ಮುನೀರ್ ಅವರೊಂದಿಗೆ ಒಪ್ಪಂದ ಮಾಡಿಕೊಂಡಿದ್ದಾರೆ ಎಂದು ಪಾಕಿಸ್ತಾನದಲ್ಲಿ ಹೇಳಲಾಗುತ್ತಿದೆ. ಈ ಒಪ್ಪಂದದ ಅಡಿಯಲ್ಲಿ, ಮುನೀರ್ ಅವರನ್ನು ಮೂರು ಪಡೆಗಳ ಮುಖ್ಯಸ್ಥರನ್ನಾಗಿ ನೇಮಿಸುವಾಗ, ಅವರು ಪ್ರಸ್ತುತ ಪಾಕಿಸ್ತಾನದ ಜೈಲಿನಲ್ಲಿರುವ ಮಾಜಿ ಪ್ರಧಾನಿ ಇಮ್ರಾನ್ ಖಾನ್ ಅವರನ್ನು ರಾಜಕೀಯದಿಂದ ಹೊರಹಾಕಲು ಪ್ರಯತ್ನಿಸಬೇಕು, ಅಥವಾ ಅವರನ್ನು ದೇಶದಿಂದ ಹೊರ ಕಳುಹಿಸಬೇಕು, ಅಥವಾ ಬೇರೆ ಯಾವುದೇ ರೀತಿಯಲ್ಲಿ ಅವರನ್ನು ‘ದೂರ’ ಮಾಡಬೇಕು ಎಂಬ ಷರತ್ತನ್ನು ಇಡಲಾಗಿದೆ. ಇದರಿಂದಾಗಿಯೇ ಇಮ್ರಾನ್ ಖಾನ್ ಜೀವಂತವಾಗಿದ್ದಾರೋ ಇಲ್ಲವೋ ಎಂಬುದು ಸ್ಪಷ್ಟವಾಗಿಲ್ಲ. ಖಾನ್ ಅವರನ್ನು ಭೇಟಿ ಮಾಡಲು ಯಾರಿಗೂ ಅನುಮತಿ ನೀಡದ ಕಾರಣ ಪ್ರತಿಭಟನೆಯನ್ನೂ ನಡೆಸಲಾಗುತ್ತಿದೆ.