ಪಾಕಿಸ್ತಾನವು ‘ಚೀನಾ-ಪಾಕಿಸ್ತಾನ ಆರ್ಥಿಕ ಕಾರಿಡಾರ್’ ನ ಲಾಭ ಪಡೆಯಲು ಸಾಧ್ಯವಾಗಲಿಲ್ಲ! – China Pakistan Economic Corridor

ಪಾಕಿಸ್ತಾನದ ಯೋಜನಾ ಸಚಿವ ಅಹ್ಸಾನ್ ಇಕ್ಬಾಲ್ ಅವರ ಹೇಳಿಕೆ

ಇಸ್ಲಾಮಾಬಾದ್ (ಪಾಕಿಸ್ತಾನ) – ಅಭಿವೃದ್ಧಿಯ ಅವಕಾಶಗಳನ್ನು ಪಾಕಿಸ್ತಾನದ ಆರ್ಥಿಕತೆಯು ಪದೇ-ಪದೇ ಕಳೆದುಕೊಂಡಿದೆ ಮತ್ತು ಪರಿವರ್ತಿತಗೊಳಿಸಬಹುದಾದ ‘ಚೀನಾ-ಪಾಕಿಸ್ತಾನ ಆರ್ಥಿಕ ಕಾರಿಡಾರ್’ (‘CPEC’) ನ ಲಾಭ ಪಡೆಯಲು ವಿಫಲವಾಗಿದೆ. ಚೀನಾದ ಹೂಡಿಕೆಯ ಘನತೆಯನ್ನು ಇಮ್ರಾನ್ ಖಾನ್ ಅವರ ‘ಪಾಕಿಸ್ತಾನ ತೆಹ್ರೀಕ್-ಎ-ಇನ್ಸಾಫ್’ ಸರಕಾರ ಹಾಳುಮಾಡಿದೆ ಎಂದು ಪಾಕಿಸ್ತಾನದ ಯೋಜನಾ ಸಚಿವ ಅಹ್ಸಾನ್ ಇಕ್ಬಾಲ್ ಅವರು ಒಂದು ಕಾರ್ಯಕ್ರಮದಲ್ಲಿ ಆರೋಪಿಸಿದರು.

ಈ ಯೋಜನೆಗಾಗಿ ಚೀನಾ ಇದುವರೆಗೆ ಶತಕೋಟಿ ರೂಪಾಯಿಗಳನ್ನು ಖರ್ಚು ಮಾಡಿದೆ. ಸಿಪಿಇಸಿ ಚೀನಾದ ‘ಬೆಲ್ಟ್ ಅಂಡ್ ರೋಡ್ ಇನಿಶಿಯೇಟಿವ್’ (BRI) ಎಂಬ ಜಾಗತಿಕ ಮಹತ್ವದ ಯೋಜನೆಯ ಒಂದು ಭಾಗವಾಗಿದ್ದು, ಈ ಯೋಜನೆಯ ಮೂಲಕ ಚೀನಾ ವಿಶ್ವದ ಅತಿದೊಡ್ಡ ಆರ್ಥಿಕ ಶಕ್ತಿಯಾಗುವ ತನ್ನ ಕನಸನ್ನು ಪೂರೈಸಲು ಬಯಸುತ್ತಿದೆ.

2018 ರಿಂದ ಈ ಯೋಜನೆಯಲ್ಲಿ ಯಾವುದೇ ಗಮನಾರ್ಹ ಪ್ರಗತಿಯಾಗಿಲ್ಲ.

ಸಿಪಿಇಸಿ ಯಿಂದ ಪಾಕಿಸ್ತಾನಕ್ಕೆ ಕೆಲವು ಸಣ್ಣ-ಪುಟ್ಟ ಪ್ರಯೋಜನಗಳು ದೊರೆತಿವೆ; ಆದರೆ ದೀರ್ಘಕಾಲಿಕ ಉದ್ದೇಶ ಈಡೇರಲಿಲ್ಲ. ಸಿಪಿಇಸಿಯ ಎರಡನೇ ಹಂತವನ್ನು ಸಹ ಪ್ರಾರಂಭಿಸಲು ಸಾಧ್ಯವಾಗಲಿಲ್ಲ. ‘ಚೀನೀ ಉದ್ಯಮಗಳನ್ನು ಪಾಕಿಸ್ತಾನಕ್ಕೆ ಸ್ಥಳಾಂತರಿಸುವುದು ಮತ್ತು ದೇಶದ ರಫ್ತು ಹೆಚ್ಚಿಸುವುದಕ್ಕಾಗಿ ಕೈಗಾರಿಕೀಕರಣ ಮಾಡುವುದು’ ಈ ಯೋಜನೆಯ ಎರಡನೇ ಹಂತದ ಉದ್ದೇಶವಾಗಿತ್ತು.