ಫತೇಪುರ (ಉತ್ತರ ಪ್ರದೇಶ): ಮಕ್ಬರಾ ಮೂಲತಃ ಶಿವ ದೇವಸ್ಥಾನದ ಕುರಿತು ಅರ್ಜಿಗೆ ಮುಂದಾದ ಭಾಜಪ!

ಆಗಸ್ಟ್ 11ರಂದು ಹಿಂದೂ ಕಾರ್ಯಕರ್ತರಿಂದ ಅಲ್ಲಿನ ಗೋರಿ ಧ್ವಂಸ

(ಮಕಬರಾ ಎಂದರೆ ಮುಸ್ಲಿಂ ವ್ಯಕ್ತಿಯನ್ನು ಮಣ್ಣು ಮಾಡಿದ ನಂತರ ಆ ಜಾಗದಲ್ಲಿ ನಿರ್ಮಿಸಲಾದ ಕಟ್ಟಡ)

ಫತೇಪುರ (ಉತ್ತರ ಪ್ರದೇಶ) – ನವಾಬ್ ಅಬ್ದುಲ್ ಸಮದ್ ಮಕಬರಾ ಹಿಂದೆ ಶಿವ ದೇವಾಲಯವಾಗಿತ್ತು ಎಂದು ಹೇಳುವ ಮೂಲಕ ಆಗಸ್ಟ್ 11 ರಂದು ಹಿಂದೂ ಸಂಘಟನೆಗಳ ಕಾರ್ಯಕರ್ತರು ಅಲ್ಲಿನ ಸಮಾಧಿಯನ್ನು ಧ್ವಂಸಗೊಳಿಸಿ ಭಗವಾನ್ ಶಿವನ ಪೂಜೆ ಮಾಡಿದ್ದರು. ಇದೀಗ, ಈ ಸ್ಥಳವು ಮೂಲತಃ ಶಿವ ದೇವಸ್ಥಾನ ಎಂದು ಹೇಳಿ ಅದರ ಮಾಲೀಕತ್ವಕ್ಕಾಗಿ ನ್ಯಾಯಾಲಯದಲ್ಲಿ ಅರ್ಜಿ ಸಲ್ಲಿಸುವುದಾಗಿ ಬಿಜೆಪಿ ಹೇಳಿದೆ. ಫತೇಪುರ ಬಿಜೆಪಿ ಜಿಲ್ಲಾಧ್ಯಕ್ಷ ಮುಖಲಾಲ್ ಪಾಲ್ ಈ ಕುರಿತು ಮಾತನಾಡಿ,

ಈ ದೇವಸ್ಥಾನಕ್ಕೆ ಸಂಬಂಧಿಸಿದ ಐತಿಹಾಸಿಕ ದಾಖಲೆಗಳನ್ನು ಸಂಗ್ರಹಿಸಲಾಗುತ್ತಿದೆ ಎಂದು ಹೇಳಿದ್ದಾರೆ. ಶ್ರೀಕೃಷ್ಣ ಜನ್ಮಾಷ್ಟಮಿಯ ದಿನದಂದು ಕೂಡ ಹಿಂದೂ ಸಂಘಟನೆಗಳು ಈ ಸ್ಥಳವನ್ನು ದೇವಸ್ಥಾನವೆಂದು ಹೇಳಿ ಪೂಜೆ ಮಾಡುವ ಘೋಷಣೆ ಮಾಡಿದ್ದರು; ಆದರೆ ಸ್ಥಳೀಯ ಸರ್ಕಾರವು ಇದಕ್ಕೆ ಆಕ್ಷೇಪ ವ್ಯಕ್ತಪಡಿಸಿದ ಕಾರಣ, ಹಿಂದೂಗಳು ಈ ಸ್ಥಳದ ಚಿತ್ರಕ್ಕೆ ಪೂಜೆ ಮಾಡಿ ಅದರ ಮೇಲೆ ಸಾಂಕೇತಿಕವಾಗಿ ತಮ್ಮ ನಿಯಂತ್ರಣ ಸಾಧಿಸಿರುವುದಾಗಿ ಹೇಳಿಕೊಂಡಿದ್ದರು.
ಪ್ರಸ್ತುತ ಈ ಕಟ್ಟಡ ಪೊಲೀಸರ ವಶದಲ್ಲಿದೆ. ವಿವಾದದಿಂದಾಗಿ ಆಗಸ್ಟ್ 17ರವರೆಗೆ ಜಾರಿಯಲ್ಲಿದ್ದ ಸೆಕ್ಷನ್ 144 ಅನ್ನು 2 ತಿಂಗಳುಗಳವರೆಗೆ ವಿಸ್ತರಿಸಲಾಗಿದೆ. ಈ ಅವಧಿಯಲ್ಲಿ ಎಲ್ಲಾ ಹಬ್ಬಗಳಿಗೂ ಈ ಆದೇಶ ಅನ್ವಯವಾಗುತ್ತದೆ.

2012ಕ್ಕಿಂತ ಮೊದಲು ದೇವಸ್ಥಾನವಾಗಿತ್ತು!

2012ಕ್ಕಿಂತ ಮೊದಲು ಈ ಪುರಾತನ ಕಟ್ಟಡ ದೇವಸ್ಥಾನವಾಗಿತ್ತು ಮತ್ತು ಇಲ್ಲಿ ಹಿಂದೂ ಸಮುದಾಯದವರು ಪೂಜೆ ಸಲ್ಲಿಸುತ್ತಿದ್ದರು. ಹಿಂದೂಗಳ ಭೂಮಿಯ ಮೇಲೆ ಮುಸ್ಲಿಮರು ತಮ್ಮ ಧಾರ್ಮಿಕ ಸ್ಥಳವನ್ನು ನಿರ್ಮಿಸಿದ್ದಾರೆ. ಈ ಭೂಮಿ ರಾಮ್ ನರೇಶ್ ಸಿಂಗ್ ಎಂಬ ಹಿಂದೂ ವ್ಯಕ್ತಿಗೆ ಸೇರಿದೆ. ಕಟ್ಟಡದಲ್ಲಿ ಕಮಲದ ಹೂವು ಮತ್ತು ತ್ರಿಶೂಲದ ಚಿತ್ರಗಳಿವೆ, ಈ ಚಿಹ್ನೆಗಳು ಕೇವಲ ಹಿಂದೂ ಧಾರ್ಮಿಕ ಸ್ಥಳಗಳಲ್ಲಿ ಮಾತ್ರ ಕಂಡುಬರುತ್ತವೆ. ದೇವಸ್ಥಾನದಲ್ಲಿ ಗಂಟೆ ಕಟ್ಟಲು ಬಳಸುವ ಸರಪಳಿ ಕೂಡ ಈ ಕಟ್ಟಡದಲ್ಲಿದೆ. ಮುಸ್ಲಿಂ ಧಾರ್ಮಿಕ ಸ್ಥಳಗಳಲ್ಲಿ ಇವು ಇರುವುದಿಲ್ಲ.