‘ಖಾಲಿದ್ ಕಾ ಶಿವಾಜಿ’ ಚಿತ್ರ ಪ್ರದರ್ಶಿಸಿದರೆ ಚಿತ್ರಮಂದಿರ ಉಳಿಯುವುದಿಲ್ಲ! : Khalid Ka Shivaji

ಮುಂಬಯಿ – ‘ಖಾಲಿದ್ ಕಾ ಶಿವಾಜಿ’ ಚಲನಚಿತ್ರದ ಸಂಭಾಷಣೆಗಳ ಬಗ್ಗೆ ಹಿಂದುತ್ವನಿಷ್ಠ ಸಂಘಟನೆಗಳು ಆಕ್ಷೇಪ ವ್ಯಕ್ತಪಡಿಸಿ, ಚಲನಚಿತ್ರವನ್ನು ನಿಷೇಧಿಸುವಂತೆ ಒತ್ತಾಯಿಸಿವೆ. “ನೀವು ‘ಖಾಲಿದ್ ಕಾ ಶಿವಾಜಿ’ ಚಿತ್ರವನ್ನು ಪ್ರದರ್ಶಿಸಿದರೆ ನಿಮ್ಮ ಚಿತ್ರಮಂದಿರ ಉಳಿಯುವುದಿಲ್ಲ” ಎಂದು ಅಣ್ಣಾಸಾಹೇಬ ಪಾಟೀಲ ಆರ್ಥಿಕ ಅಭಿವೃದ್ಧಿ ನಿಗಮದ ಅಧ್ಯಕ್ಷ ಶ್ರೀ. ನರೇಂದ್ರ ಪಾಟೀಲ ಅವರು ಮಲ್ಟಿಪ್ಲೆಕ್ಸ್ (ಚಿತ್ರಮಂದಿರ) ಮಾಲೀಕರಿಗೆ ಎಚ್ಚರಿಕೆ ನೀಡಿದ್ದಾರೆ. ಈ ಚಿತ್ರದ ಮೂಲಕ ಗಣೇಶೋತ್ಸವದ ಸಮಯದಲ್ಲಿ ಗಲಭೆ ಸೃಷ್ಟಿಸಲು ನಿರ್ದೇಶಕ ಪ್ರಯತ್ನಿಸುತ್ತಿದ್ದಾರೆ ಎಂದು ಅವರು ಮಾಧ್ಯಮಗಳೊಂದಿಗೆ ಮಾತನಾಡುತ್ತಾ ಆರೋಪಿಸಿದ್ದಾರೆ.

ಶ್ರೀ. ಪಾಟೀಲ ಅವರು ಚಿತ್ರದ ವಿವಾದದ ಹಿನ್ನೆಲೆಯಲ್ಲಿ, ಆಗಸ್ಟ್ 13 ರಂದು ಮುಖ್ಯಮಂತ್ರಿ ದೇವೇಂದ್ರ ಫಡ್ನವೀಸ ಅವರನ್ನು ಭೇಟಿಯಾದರು. ನಂತರ ಮಾತನಾಡಿದ ಅವರು, “‘ಖಾಲಿದ್ ಕಾ ಶಿವಾಜಿ’ ಟ್ರೈಲರ್ ಮೂಲಕ ಉದ್ದೇಶಪೂರ್ವಕವಾಗಿ ಮರಾಠಾ ಮತ್ತು ಮುಸ್ಲಿಂ ಸಮುದಾಯಗಳ ನಡುವೆ ಬಿರುಕು ಮೂಡಿಸುವ ಪ್ರಯತ್ನ ನಡೆಯುತ್ತಿದೆ. ಮಹಾರಾಜರ ಸರದಾರರು ಮೊಘಲ್ ಮನಸ್ಥಿತಿಯವರಾಗಿರಲಿಲ್ಲ. ಅವರು ಮೊಘಲರ ವಿರುದ್ಧ ಹೋರಾಡಿದ್ದರು. ಗಣೇಶೋತ್ಸವದ ಮೊದಲು ಈ ಚಿತ್ರವನ್ನು ಬಿಡುಗಡೆ ಮಾಡಲು ಇವರು ಬಯಸಿದ್ದರು. ನಂತರ ಭಿನ್ನಾಭಿಪ್ರಾಯಗಳನ್ನು ಸೃಷ್ಟಿಸಿ ಗಲಭೆಗಳನ್ನು ಹುಟ್ಟುಹಾಕಲು ನಿರ್ದೇಶಕರು ಯೋಜಿಸಿದ್ದರು” ಎಂದು ಅವರು ಹೇಳಿದರು. “ಚಿತ್ರವನ್ನು ಕನಿಷ್ಠ ಒಂದು ತಿಂಗಳ ಕಾಲ ಮುಂದೂಡಬೇಕೆಂದು ನಾವು ವಿನಂತಿಸುತ್ತೇವೆ” ಎಂದು ಅವರು ತಿಳಿಸಿದ್ದಾರೆ.

ತಪ್ಪು ಇತಿಹಾಸವನ್ನು ಏಕೆ ತೋರಿಸಲಾಗುತ್ತಿದೆ?

“ಶ್ರೀ. ಪಾಟೀಲ ಇವರು ಮಾತನಾಡಿ, ತಪ್ಪು ಇತಿಹಾಸವನ್ನು ಜನರಿಗೆ ಏಕೆ ತೋರಿಸಲಾಗುತ್ತಿದೆ? ಇದರ ಬಗ್ಗೆ ತನಿಖೆ ನಡೆಸಲು ಗೃಹ ಇಲಾಖೆಯಡಿ ವಿಶೇಷ ತಂಡವನ್ನು ರಚಿಸಬೇಕು ಮತ್ತು ತನಿಖಾ ಅಧಿಕಾರಿಯನ್ನು ನೇಮಿಸಬೇಕು ಎಂದು ನಾವು ಮುಖ್ಯಮಂತ್ರಿಗಳಿಗೆ ಮನವಿ ಮಾಡಿದ್ದೇವೆ. ಅವರು ನಮ್ಮ ಕಾರ್ಯಕರ್ತರ ಮಾತುಗಳನ್ನು ಆಲಿಸಿದ್ದಾರೆ. ಇದರ ಹಿಂದಿನ ಸೂತ್ರಧಾರರನ್ನು ಅವರು ಶೀಘ್ರದಲ್ಲೇ ಬಯಲಿಗೆ ತರುತ್ತಾರೆ. ಯಾರ ಮೂಲಕ ಈ ಚಿತ್ರವನ್ನು ಕಳುಹಿಸಲಾಗಿದೆ ಎಂಬ ಬಗ್ಗೆಯೂ ತನಿಖೆಯಾಗಬೇಕು” ಎಂದು ಅವರು ಒತ್ತಾಯಿಸಿದ್ದಾರೆ.