ಕಾರ್ಲಾ (ಪುಣೆ) ಶ್ರೀ ಎಕವೀರಾ ದೇವಸ್ಥಾನದಲ್ಲಿ ವಸ್ತ್ರ ಸಂಹಿತೆ ಜಾರಿ!

ತುಂಡು ಮತ್ತು ದೇಹ ಪ್ರದರ್ಶಿಸುವ ಬಟ್ಟೆಗಳನ್ನು ಧರಿಸಿ ಬಂದರೆ ಪ್ರವೇಶ ನಿಷಿದ್ಧ!

(ವಸ್ತ್ರ ಸಂಹಿತೆ ಎಂದರೆ ದೇವಸ್ಥಾನ ಪ್ರವೇಶಿಸುವಾಗ ಧರಿಸಬೇಕಾದ ಉಡುಪುಗಳ ನಿಯಮಗಳು)

ಕಾರ್ಲಾ (ತಾ. ಮಾವಳ್, ಜಿಲ್ಲೆ ಪುಣೆ) – ಇಲ್ಲಿನ ಶ್ರೀ ಎಕವೀರಾ ದೇವಸ್ಥಾನ ಟ್ರಸ್ಟ್, ಆಯಿ(ಅಮ್ಮ) ಶ್ರೀ ಎಕವೀರಾ ದೇವಿ ದರ್ಶನಕ್ಕೆ ಬರುವ ಭಕ್ತರಿಗಾಗಿ ವಸ್ತ್ರ ಸಂಹಿತೆಯನ್ನು ಜಾರಿಗೊಳಿಸಲು ನಿರ್ಧರಿಸಿದೆ. ಲಕ್ಷಾಂತರ ಭಕ್ತರ ಶ್ರದ್ಧಾ ಕೇಂದ್ರ ಹಾಗೂ ಆಗರಿ ಮತ್ತು ಕೋಳಿ ಸಮಾಜದ ಕುಲದೇವತೆ ಆಗಿರುವ ಕುಲಸ್ವಾಮಿನಿ ಅಮ್ಮ ಎಕವೀರಾ ದೇವಿ ಮಂದಿರಕ್ಕೆ ಬರುವ ಭಕ್ತರಿಗಾಗಿ, ಅಂದರೆ ಮಹಿಳೆಯರು ಮತ್ತು ಪುರುಷರಿಗಾಗಿ ಜುಲೈ 7 ರಿಂದ ಈ ವಸ್ತ್ರ ನಿಯಮಾವಳಿ ಅನ್ವಯವಾಗಲಿದೆ. ವ್ಯಾಪಾರಿಗಳು ಮತ್ತು ಸ್ಥಳೀಯರಿಗೂ ಈ ನಿಯಮ ಅನ್ವಯವಾಗುತ್ತದೆ.

‘ಈ ನಿರ್ಧಾರದ ಪ್ರಕಾರ ದೇವಸ್ಥಾನಕ್ಕೆ ಬರುವ ಭಕ್ತರು ಭಾರತೀಯ ಸಾಂಪ್ರದಾಯಿಕ ಉಡುಗೆಗಳನ್ನು ಧರಿಸಬೇಕು. ತುಂಡು ಮತ್ತು ದೇಹ ಪ್ರದರ್ಶಿಸುವ ಬಟ್ಟೆಗಳನ್ನು ಧರಿಸಿ ಬಂದರೆ ಭಕ್ತರಿಗೆ ದೇವಸ್ಥಾನದಲ್ಲಿ ಪ್ರವೇಶ ನೀಡುವುದಿಲ್ಲ’ ಎಂದು ದೇವಸ್ಥಾನದಿಂದ ಸ್ಪಷ್ಟಪಡಿಸಲಾಗಿದೆ. ಜೂನ್ 27 ರಂದು ದೇವಸ್ಥಾನ ಟ್ರಸ್ಟ್‌ನ ಈ ಕುರಿತು ಸಭೆ ನಡೆಯಿತು. ಅದರಲ್ಲಿ ಎಲ್ಲಾ ಸದಸ್ಯರ ಸರ್ವಾನುಮತದಿಂದ ಈ ನಿರ್ಧಾರವನ್ನು ತೆಗೆದುಕೊಳ್ಳಲಾಗಿದೆ. ದೇವಸ್ಥಾನದ ಧಾರ್ಮಿಕ ವಾತಾವರಣದ ಪವಿತ್ರತೆಯನ್ನು ಕಾಪಾಡಲು ಈ ನಿರ್ಧಾರವನ್ನು ತೆಗೆದುಕೊಳ್ಳಲಾಗಿದೆ ಎಂದು ಟ್ರಸ್ಟ್‌ನ ಪರವಾಗಿ ತಿಳಿಸಲಾಗಿದೆ.