Israel Iran War Updates : ತೆಹ್ರಾನ್‌ನಿಂದ ಇರಾನಿನ ನಾಗರಿಕರ ದೊಡ್ಡ ಪ್ರಮಾಣದ ಪಲಾಯನ ಮುಂದುವರಿಕೆ !

ಇಸ್ರೇಲ್ ಮತ್ತು ಅಮೆರಿಕದ ಎಚ್ಚರಿಕೆಯ ಪರಿಣಾಮ

ಟೆಲ್ ಅವಿವ್ (ಇಸ್ರೇಲ್) – ಇಸ್ರೇಲ್ ಮತ್ತು ಇರಾನ್ ನಡುವಿನ ಯುದ್ಧ ಪರಿಸ್ಥಿತಿ ಐದನೇ ದಿನವೂ ಮುಂದುವರಿದಿತ್ತು. ಜೂನ್ 16 ರಂದು ಇಸ್ರೇಲ್ ಇರಾನ್‌ನ ರಾಜಧಾನಿ ತೆಹ್ರಾನ್ ಮೇಲೆ ಹಲವು ವೈಮಾನಿಕ ದಾಳಿಗಳನ್ನು ನಡೆಸಿತು, ಇರಾನ್ ಇಸ್ರೇಲ್‌ನ ರಾಜಧಾನಿ ತೇಲ್ ಅವಿವ್ ಮತ್ತು ಹೈಫಾ ನಗರಗಳ ಮೇಲೆ ಬಾಂಬ್ ದಾಳಿ ನಡೆಸಿತು. ಇನ್ನೊಂದೆಡೆ, ಅಮೆರಿಕದ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು ಎಲ್ಲಾ ಜನರಿಗೆ ಇರಾನ್‌ನ ರಾಜಧಾನಿ ತೆಹ್ರಾನ್ ಅನ್ನು ತಕ್ಷಣವೇ ಖಾಲಿ ಮಾಡುವಂತೆ ಎಚ್ಚರಿಕೆ ನೀಡಿದ್ದಾರೆ. ಇಸ್ರೇಲ್ ಈಗಾಗಲೇ ತೆಹ್ರಾನ್ ಅನ್ನು ಖಾಲಿ ಮಾಡುವಂತೆ ಹೇಳಿತ್ತು.

ತೆಹ್ರಾನ್‌ನಲ್ಲಿನ ಜಲಮಾರ್ಗಗಳು ನಾಶವಾಗಿ ಪ್ರವಾಹ ಪರಿಸ್ಥಿತಿ!

ಇರಾನಿನ ನಾಗರಿಕರು ತೆಹ್ರಾನ್ ತೊರೆಯಲು ಪ್ರಾರಂಭಿಸಿದ್ದಾರೆ. ನಗರದ ಹೊರಗೆ ಹೋಗುವ ವಾಹನಗಳ ದೊಡ್ಡ ದಟ್ಟಣೆ ರಸ್ತೆಗಳಲ್ಲಿ ಗೋಚರಿಸುತ್ತಿದೆ. ಇಸ್ರೇಲ್ ಸಹ ತೆಹ್ರಾನ್ ಖಾಲಿ ಮಾಡುವಂತೆ ಮೊದಲೇ ಎಚ್ಚರಿಕೆ ನೀಡಿತ್ತು. ‘ಇರಾನ್‌ನ ದಾಳಿಯಿಂದ ಇಸ್ರೇಲ್‌ನ ತೇಲ್ ಅವಿವ್ ಮತ್ತು ಹೈಫಾ ನಗರಗಳಿಗೆ ದೊಡ್ಡ ಹಾನಿಯಾಗಿದ್ದು, ಇಸ್ರೇಲ್ ತೆಹ್ರಾನ್ ಮೇಲೆ ದೊಡ್ಡ ದಾಳಿ ನಡೆಸಿ ಪ್ರತೀಕಾರ ತೀರಿಸಿಕೊಳ್ಳಬಹುದು’ ಎಂದು ಹೇಳಲಾಗುತ್ತಿದೆ. ಅದಕ್ಕೂ ಮೊದಲು ಇಸ್ರೇಲ್ ತೆಹ್ರಾನ್‌ನಲ್ಲಿನ ಜಲಮಾರ್ಗಗಳ ಮೇಲೆ ಬಾಂಬ್ ದಾಳಿ ನಡೆಸಿ ಅವುಗಳನ್ನು ನಾಶಪಡಿಸಿದೆ, ಇದರಿಂದ ತೆಹ್ರಾನ್‌ನಲ್ಲಿ ಪ್ರವಾಹ ಪರಿಸ್ಥಿತಿ ಉಂಟಾಗಿದೆ.

ತೆಹ್ರಾನ್‌ನಲ್ಲಿ ಸುದ್ದಿವಾಹಿನಿ ಕಟ್ಟಡದ ಮೇಲೆ ಬಾಂಬ್ ದಾಳಿ!

ಇಸ್ರೇಲ್ ತೆಹ್ರಾನ್‌ನಲ್ಲಿರುವ ‘ಇಸ್ಲಾಮಿಕ್ ರಿಪಬ್ಲಿಕ್ ಆಫ್ ಇರಾನ್ ಬ್ರಾಡ್‌ಕಾಸ್ಟಿಂಗ್’ ಕಟ್ಟಡದ ಮೇಲೆ ಬಾಂಬ್ ಹಾಕಿದೆ. ಘಟನೆ ಸಂಭವಿಸಿದಾಗ, ಸುದ್ದಿವಾಹಿನಿಯ ನಿರೂಪಕಿಯೊಬ್ಬರು ವರದಿ ಮಾಡುತ್ತಿದ್ದರು. ಅದೇ ಸಮಯದಲ್ಲಿ ಬಾಂಬ್ ಸ್ಫೋಟ ಸಂಭವಿಸಿತು. ಅದರಲ್ಲಿ ಅವರು ಸ್ವಲ್ಪದರಲ್ಲೇ ಪಾರಾದರು. ಈ ಘಟನೆಯ ವಿಡಿಯೋವೊಂದು ಹೊರಬಿದ್ದಿದೆ, ಅದರಲ್ಲಿ ಈ ನಿರೂಪಕಿ ಸ್ಟುಡಿಯೋದಿಂದ ಓಡಿ ಹೋಗುತ್ತಿರುವುದು ಕಾಣುತ್ತಿದೆ. ಇಸ್ರೇಲಿ ಸೇನೆಯು ಒಂದು ಮನವಿಯನ್ನು ಬಿಡುಗಡೆ ಮಾಡಿ, ಇರಾನಿನ ಸೇನೆಯು ಮಿಲಿಟರಿ ಕಾರ್ಯಾಚರಣೆಗಳಿಗಾಗಿ ಈ ಸುದ್ದಿವಾಹಿನಿ ಕಚೇರಿಯನ್ನು ಬಳಸಿಕೊಳ್ಳುತ್ತಿತ್ತು. ಆದ್ದರಿಂದಲೇ ಈ ಕಚೇರಿಯ ಮೇಲೆ ದಾಳಿ ಮಾಡಲಾಗಿದೆ. ಸಾಮಾನ್ಯ ಜನರಿಗೆ ಕಡಿಮೆ ಹಾನಿಯಾಗುವಂತೆ ಈ ದಾಳಿಯನ್ನು ನಿಖರವಾಗಿ ನಡೆಸಲಾಗಿದೆ ಎಂದು ಹೇಳಿದೆ.

ತೆಹ್ರಾನ್‌ನಿಂದ ಭಾರತೀಯ ವಿದ್ಯಾರ್ಥಿಗಳ ಸ್ಥಳಾಂತರ !

ಭದ್ರತಾ ಕಾರಣಗಳಿಗಾಗಿ, ಇರಾನ್‌ನ ರಾಜಧಾನಿ ತೆಹ್ರಾನ್‌ನಲ್ಲಿರುವ ಭಾರತೀಯ ರಾಯಭಾರಿ ಕಚೇರಿಯು ಅಲ್ಲಿರುವ ಭಾರತೀಯ ವಿದ್ಯಾರ್ಥಿಗಳನ್ನು ನಗರದ ಹೊರಗಿನ ಸುರಕ್ಷಿತ ಸ್ಥಳಕ್ಕೆ ಸ್ಥಳಾಂತರಿಸಿದೆ. ಪರಿಸ್ಥಿತಿಯನ್ನು ಗಮನದಲ್ಲಿಟ್ಟುಕೊಂಡು, ಸ್ವತಃ ಪ್ರಯಾಣಿಸಲು ಸಾಧ್ಯವಾಗುವ ಭಾರತೀಯ ನಾಗರಿಕರಿಗೂ ತೆಹ್ರಾನ್ ತೊರೆಯಲು ಸಲಹೆ ನೀಡಲಾಗಿದೆ. ಕೆಲವು ಭಾರತೀಯ ನಾಗರಿಕರಿಗೆ ಇರಾನ್-ಅರ್ಮೇನಿಯಾ ಗಡಿಯಿಂದ ದೇಶವನ್ನು ತೊರೆಯಲು ಸಹಾಯ ಮಾಡಲಾಯಿತು. ಭಾರತೀಯ ರಾಯಭಾರಿ ಕಚೇರಿಯು ಭಾರತೀಯ ಸಮುದಾಯದೊಂದಿಗೆ ನಿರಂತರ ಸಂಪರ್ಕದಲ್ಲಿದೆ ಮತ್ತು ಎಲ್ಲ ರೀತಿಯ ಸಹಾಯವನ್ನು ಒದಗಿಸಲು ಪ್ರಯತ್ನಿಸುತ್ತಿದೆ. ಪರಿಸ್ಥಿತಿ ಬದಲಾಗುತ್ತಿದ್ದಂತೆ ಹೆಚ್ಚಿನ ಸೂಚನೆಗಳನ್ನು ನೀಡಬಹುದು ಎಂದು ರಾಯಭಾರಿ ಕಚೇರಿ ತಿಳಿಸಿದೆ.

ಖಮೇನಿಯವರನ್ನು ಕೊಂದರೆ ಯುದ್ಧ ಕೊನೆಗೊಳ್ಳುತ್ತದೆ! – ಇಸ್ರೇಲ್ ಪ್ರಧಾನಿ ನೆತನ್ಯಾಹು

ಇಸ್ರೇಲ್ ಪ್ರಧಾನಿ ಬೆಂಜಮಿನ್ ನೆತನ್ಯಾಹು ಸಂದರ್ಶನವೊಂದರಲ್ಲಿ, ನಾವು ಏನು ಮಾಡಬೇಕೋ ಅದನ್ನು ಮಾಡುತ್ತಿದ್ದೇವೆ. ಇರಾನ್‌ನ ಮುಖ್ಯಸ್ಥ ಅಯತುಲ್ಲಾ ಖಮೇನಿಯವರನ್ನು ಕೊಂದರೆ ಸಂಘರ್ಷ ಹೆಚ್ಚಾಗುವುದಿಲ್ಲ, ಅದು ಕೊನೆಗೊಳ್ಳುತ್ತದೆ. ನಾನು ವಿವರಗಳಿಗೆ ಹೋಗುವುದಿಲ್ಲ; ಆದರೆ ನಾವು ಅವರ ಅತ್ಯುನ್ನತ ಪರಮಾಣು ವಿಜ್ಞಾನಿಗಳನ್ನು ಗುರಿಯಾಗಿಸಿದ್ದೇವೆ. ಇದು ವಾಸ್ತವವಾಗಿ ಹಿಟ್ಲರ್‌ನ ಅಣು ತಂಡವಾಗಿದೆ ಎಂದು ಹೇಳಿದರು.

ಇಸ್ರೇಲಿ ದಾಳಿ, ಇದು ನಂಬಿಕೆ ದ್ರೋಹ! – ಟರ್ಕಿಯೆ ಅಧ್ಯಕ್ಷ ಎರ್ಡೊಗಾನ್

ಟರ್ಕಿಯೆ ಅಧ್ಯಕ್ಷ ರೆಸೆಪ್ ತಯ್ಯಿಪ್ ಎರ್ಡೊಗಾನ್ ರಷ್ಯಾದ ಅಧ್ಯಕ್ಷ ವ್ಲಾಡಿಮಿರ್ ಪುಟಿನ್ ಅವರೊಂದಿಗೆ ದೂರವಾಣಿ ಸಂಭಾಷಣೆ ನಡೆಸಿದ ನಂತರ ‘ಇರಾನ್ ಮೇಲಿನ ಇಸ್ರೇಲ್‌ನ ದಾಳಿ, ಇದು ನಂಬಿಕೆ ದ್ರೋಹ’ ಎಂದು ಹೇಳಿದರು. ಅಲ್ಲದೆ, ಇಬ್ಬರೂ ನಾಯಕರು ಇಸ್ರೇಲ್‌ನ ದಾಳಿಯನ್ನು ಖಂಡಿಸಿದರು ಮತ್ತು ತಕ್ಷಣದ ಯುದ್ಧವಿರಾಮಕ್ಕೆ ಒತ್ತಾಯಿಸಿದರು.

ಇರಾನ್‌ನ ಹೊಸ ಸೇನಾ ಮುಖ್ಯಸ್ಥರ ಸಾವು!

ಇಸ್ರೇಲ್ ಇರಾನ್ ಮೇಲೆ ನಡೆಸಿದ ದಾಳಿಯ ಮೊದಲ ದಿನವೇ ಇರಾನ್‌ನ ಸೇನಾ ಮುಖ್ಯಸ್ಥರನ್ನು ಕೊಂದಿತ್ತು. ಅದರ ನಂತರ, ಹೊಸದಾಗಿ ನೇಮಕಗೊಂಡಿದ್ದ ಶಾದ್ಮಾನಿ ಎಂಬ ಸೇನಾ ಮುಖ್ಯಸ್ಥರನ್ನೂ ಈಗ ಇಸ್ರೇಲ್ ಕೊಂದಿದೆ. ಶಾದ್ಮಾನಿ ಇರಾನ್‌ನ ಸರ್ವೋಚ್ಚ ನಾಯಕ ಅಯತುಲ್ಲಾ ಖಮೇನಿಯವರ ಆಪ್ತ ಮಿಲಿಟರಿ ಸಲಹೆಗಾರರಾಗಿದ್ದರು. ಶಾದ್ಮಾನಿ ‘ಇಸ್ಲಾಮಿಕ್ ರೆವಲ್ಯೂಷನರಿ ಗಾರ್ಡ್ ಕಾರ್ಪ್ಸ್’ ಮತ್ತು ಇರಾನಿನ ಸೇನೆ ಎರಡಕ್ಕೂ ನಾಯಕತ್ವ ವಹಿಸಿದ್ದರು.

ಇರಾನ್‌ನಿಂದ ‘ಮೊಸಾದ್’ನ ಪ್ರಧಾನ ಕಛೇರಿ ಮೇಲೆ ದಾಳಿ

ಇರಾನ್ ಇಸ್ರೇಲ್‌ನ ಗುಪ್ತಚರ ಸಂಸ್ಥೆ ‘ಮೊಸಾದ್‌’ದ ಪ್ರಧಾನ ಕಛೇರಿ ಮೇಲೆ ವೈಮಾನಿಕ ದಾಳಿ ನಡೆಸಿದೆ. ಈ ಪ್ರಧಾನ ಕಛೇರಿಯು ರಾಜಧಾನಿ ಟೇಲ್ ಅವೀವ್‌ನ ಹರ್ಜ್ಲಿಯಾ ಪ್ರದೇಶದಲ್ಲಿದೆ. ಇದಲ್ಲದೇ ಮಿಲಿಟರಿ ಗುಪ್ತಚರ ಸಂಸ್ಥೆಯಾದ AMAAನ್ ಗೆ ಸಂಬಂಧಿಸಿದ ಗುಪ್ತಚರ ಸಂಸ್ಥೆಯ ಕಟ್ಟಡವನ್ನೂ ಸಹ ಗುರಿಯಾಗಿಸಲಾಗಿತ್ತು. ಇರಾನ್‌ನ ‘ಇಸ್ಲಾಮಿಕ್ ರೆವಲ್ಯೂಷನರಿ ಗಾರ್ಡ್ ಕಾರ್ಪ್ಸ್’ ಮಾಧ್ಯಮಗಳಿಗೆ ನೀಡಿದ ಹೇಳಿಕೆಯಲ್ಲಿ ಎರಡೂ ದಾಳಿಗಳನ್ನು ಖಚಿತಪಡಿಸಿದೆ. ಮೊಸಾದ್ ಪ್ರಧಾನ ಕಛೇರಿ ಮೇಲಿನ ದಾಳಿಯ ವಿಡಿಯೋಗಳು ಸಾಮಾಜಿಕ ಮಾಧ್ಯಮಗಳಲ್ಲಿ ಹರಿದಾಡುತ್ತಿವೆ. ಇದರಲ್ಲಿ ಪ್ರಧಾನ ಕಛೇರಿಗೆ ದೊಡ್ಡ ಪ್ರಮಾಣದ ಬೆಂಕಿ ತಗುಲಿರುವುದು ಕಂಡುಬಂದಿದೆ.

‘ಇರಾನ್ ಜೊತೆ ಮಾತುಕತೆ ನಡೆಸುವುದಿಲ್ಲ!’ – ಡೊನಾಲ್ಡ್ ಟ್ರಂಪ್

ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು, “ನಾವು ಇರಾನ್ ಜೊತೆ ಮಾತುಕತೆ ನಡೆಸುವ ಮನಸ್ಥಿತಿಯಲ್ಲಿಲ್ಲ. ಇರಾನ್ ಮತ್ತು ಇಸ್ರೇಲ್ ನಡುವೆ ಕದನವಿರಾಮ ಇರಬೇಕು ಎಂದು ನಾನು ಹೇಳಿಲ್ಲ. ಇರಾನ್‌ನ ಅಣು ಶಸ್ತ್ರಾಸ್ತ್ರ ಸಮಸ್ಯೆಗೆ ಶಾಶ್ವತ ಪರಿಹಾರ ಬೇಕಾಗಿದೆ. ಇರಾನ್ ಸಂಪೂರ್ಣವಾಗಿ ಅಣು ಶಸ್ತ್ರಾಸ್ತ್ರಗಳನ್ನು ತ್ಯಜಿಸಬೇಕು’, ಎಂದು ನಾನು ಬಯಸುತ್ತೇನೆ. ಇರಾನ್ ಅಣುಬಾಂಬ್ ತಯಾರಿಸಬಾರದು” ಎಂದು ಹೇಳಿದ್ದಾರೆ. ಈ ಮೊದಲು ಟ್ರಂಪ್ ಅವರು ಅಮೆರಿಕ ಉಪಾಧ್ಯಕ್ಷ ಜೆ.ಡಿ. ವ್ಯಾನ್ಸ್ ಮತ್ತು ಅಮೆರಿಕದ ಮಧ್ಯಪ್ರಾಚ್ಯದ ರಾಯಭಾರಿ ಸ್ಟೀವ್ ವಿಟ್ಕಾಫ್ ಅವರನ್ನು ಚರ್ಚೆಗಾಗಿ ಕಳುಹಿಸಬಹುದು ಎಂದು ಹೇಳಿದ್ದರು.

“ಟ್ರಂಪ್‌ನಿಂದ ಪರಿಸ್ಥಿತಿ ಇನ್ನಷ್ಟು ಬಿಗಡಾಯಿಸುತ್ತದೆ!” – ಚೀನಾ ಆರೋಪ

ಅಮೆರಿಕ ಅಧ್ಯಕ್ಷ ಟ್ರಂಪ್ ಅವರು ತೆಹ್ರಾನ್‌ನ ಜನರಿಗೆ ತಕ್ಷಣವೇ ನಗರವನ್ನು ಖಾಲಿ ಮಾಡುವಂತೆ ಎಚ್ಚರಿಕೆ ನೀಡಿದ್ದರು. ಇದರ ಕುರಿತು ಚೀನಾದ ವಿದೇಶಾಂಗ ಸಚಿವಾಲಯದ ವಕ್ತಾರ ಗುವೋ ಜಿಯಾಕುನ್ ಅವರು, “ಬೆಂಕಿ ಹಚ್ಚುವುದು ಮತ್ತು ಬೆದರಿಕೆ ಹಾಕುವುದು ಪರಿಸ್ಥಿತಿಯನ್ನು ಸಾಮಾನ್ಯಗೊಳಿಸಲು ಸಹಾಯ ಮಾಡುವುದಿಲ್ಲ, ಬದಲಾಗಿ ಸಂಘರ್ಷವನ್ನು ಇನ್ನಷ್ಟು ಹೆಚ್ಚಿಸುತ್ತದೆ” ಎಂದು ಹೇಳಿದ್ದಾರೆ.

ಇರಾನ್ ಬ್ಯಾಂಕ್ ಮೇಲಿನ ಸೈಬರ್ ದಾಳಿಯಿಂದ ವಹಿವಾಟು ಸ್ಥಗಿತ

ಇರಾನ್‌ನ ಸೆಪಾಹ್ ಬ್ಯಾಂಕ್ ಮೇಲೆ ಸೈಬರ್ ದಾಳಿ ನಡೆದ ಕಾರಣ ಆನ್‌ಲೈನ್ ವಹಿವಾಟು ಸ್ಥಗಿತಗೊಂಡಿದೆ.