ಬ್ರಿಟನ್‌ನ ಪ್ರಸಿದ್ಧ ‘ಇಸ್ಲಾಂ ಚಾನೆಲ್’ನಿಂದ ಜಿಹಾದಿ ಭಯೋತ್ಪಾದಕರ ಬೆಂಬಲ!

ಬ್ರಿಟನ್‌ನಿಂದ ತನಿಖೆ ಪ್ರಾರಂಭ!

ಲಂಡನ್ (ಬ್ರಿಟನ್) – ಬ್ರಿಟನ್‌ನ ಪ್ರಸಿದ್ಧ ‘ಇಸ್ಲಾಂ ಚಾನೆಲ್’ ಎಂಬ ದೂರದರ್ಶನ ವಾಹಿನಿಯಲ್ಲಿ ಹಿಂಸಾತ್ಮಕ ಇಸ್ಲಾಮಿಕ್ ಚಳುವಳಿಗಳನ್ನು ಶ್ಲಾಘಿಸುವ, ಪಾಶ್ಚಿಮಾತ್ಯ ದೇಶಗಳ ವಿರುದ್ಧ ದ್ವೇಷವನ್ನು ಹುಟ್ಟುಹಾಕುವ ಮತ್ತು ಜಿಹಾದಿ ಕಾರಣಗಳನ್ನು ಸಹಾನುಭೂತಿಯಿಂದ ಮಂಡಿಸುವ ಆರೋಪ ಮಾಡಲಾಗಿದೆ. ಇದರ ಬಗ್ಗೆ ಬ್ರಿಟನ್‌ನ ‘ಆಫ್‌ಕಾಮ್’ ಸಂಸ್ಥೆಯಿಂದ ತನಿಖೆ ಪ್ರಾರಂಭಿಸಲಾಗಿದೆ. ಈ ವಾಹಿನಿಯನ್ನು ಪ್ರತಿದಿನ 20 ಲಕ್ಷ ಜನರು ವೀಕ್ಷಿಸುತ್ತಾರೆ ಎಂದು ಹೇಳಲಾಗುತ್ತದೆ.
ಅಕ್ಟೋಬರ್ 7, 2023 ರಂದು, ‘ಇಸ್ಲಾಂ ಚಾನೆಲ್’ ಹಮಾಸ್ ಇಸ್ರೇಲ್ ಮೇಲೆ ಮಾಡಿದ ದಾಳಿಯನ್ನು ಶ್ಲಾಘಿಸಿತ್ತು ಮತ್ತು ಇಸ್ರೇಲ್ ಅನ್ನು ನಾಜಿಗಳಿಗೆ ಹೋಲಿಸಿತ್ತು. ಈ ವಾಹಿನಿಯು ಭಯೋತ್ಪಾದಕರಿಗೆ ಸಹಾಯ ಮಾಡಿದೆ, ಸುದ್ದಿ ಪ್ರಸಾರದಲ್ಲಿ ನಿಷ್ಪಕ್ಷಪಾತವನ್ನು ಕಾಪಾಡಲಿಲ್ಲ ಮತ್ತು ಪ್ರಮುಖ ಸತ್ಯಗಳ ಬಗ್ಗೆ ವೀಕ್ಷಕರನ್ನು ದಾರಿ ತಪ್ಪಿಸಿದೆ ಎಂದು ಆರೋಪಿಸಲಾಗಿದೆ.

1. ‘ಆಕ್ಸ್‌ಫರ್ಡ್ ಇನ್‌ಸ್ಟಿಟ್ಯೂಟ್ ಫಾರ್ ಬ್ರಿಟಿಷ್ ಇಸ್ಲಾಂ’ ನಿರ್ದೇಶಕ ಡಾ. ತಾಜ್ ಹರಗೈ ಈ ಬಗ್ಗೆ ‘ಆಫ್‌ಕಾಮ್’ ಗೆ ದೂರು ನೀಡಿದ್ದಾರೆ. ಡಾ. ಹರಗೈ ಅವರನ್ನು ಬ್ರಿಟಿಷ್ ಇಸ್ಲಾಂನಲ್ಲಿ ಉದಾರವಾದಿ ಚಿಂತಕ ಎಂದು ಪರಿಗಣಿಸಲಾಗುತ್ತದೆ. ನವೆಂಬರ್ 2024 ರಿಂದ ಜನವರಿ 2025 ರವರೆಗೆ ‘ಇಸ್ಲಾಂ ಚಾನೆಲ್’ ಪ್ರಸಾರ ನಿಯಮಗಳನ್ನು ನಿರಂತರವಾಗಿ ಉಲ್ಲಂಘಿಸಿದೆ ಎಂದು ಅವರು ಹೇಳಿದ್ದಾರೆ.

2. ‘ಇಸ್ಲಾಂಗೆ ಪಾಶ್ಚಿಮಾತ್ಯದಿಂದ ಅಪಾಯವಿದೆ’ ಎಂದು ವಾಹಿನಿ ಚಿತ್ರಿಸುತ್ತದೆ ಮತ್ತು ಹಮಾಸ್, ಇರಾನ್ ಮತ್ತು ‘ಇಸ್ಲಾಮಿಕ್ ಜಿಹಾದಿ ಗುಂಪುಗಳನ್ನು ಪಾಶ್ಚಿಮಾತ್ಯ ಜಾತ್ಯತೀತ ಪ್ರಜಾಪ್ರಭುತ್ವಗಳ ವಿರುದ್ಧ ಕಾನೂನುಬದ್ಧ ಪ್ರತಿರೋಧ ಚಳುವಳಿಗಳು’ ಎಂದು ಚಿತ್ರಿಸುತ್ತದೆ ಎಂದು ಡಾ. ಹರಗೈ ಆರೋಪಿಸಿದ್ದಾರೆ. ಗಾಜಾದ ಸುದ್ದಿಯಲ್ಲಿ ಅದು ಏಕಪಕ್ಷೀಯ ನಿಲುವು ತೆಗೆದುಕೊಳ್ಳುತ್ತದೆ ಮತ್ತು ಇಸ್ರೇಲ್ ಬೆಂಬಲಿಸುವ ವಕ್ತಾರರಿಗೆ ಅವಕಾಶ ನೀಡುವುದಿಲ್ಲ.

3. ಇಸ್ಲಾಂ ಚಾನೆಲ್ ‘ವಹಾಬಿ’ ಮತ್ತು ‘ಸಲಾಫಿ’ ಇಸ್ಲಾಂ ಅನ್ನು ಉತ್ತೇಜಿಸುತ್ತದೆ ಮತ್ತು ಶಿಯಾ, ಸೂಫಿ, ಅಹ್ಮದಿ ಮತ್ತು ಜಾತ್ಯತೀತ ಮುಸ್ಲಿಮರನ್ನು ನಿರ್ಲಕ್ಷಿಸುತ್ತದೆ, ಎಂದು ಡಾ. ಹರಗೈ ಹೇಳಿದರು. ‘ಇಸ್ಲಾಂ ಚಾನೆಲ್’ ಬ್ರಿಟನ್‌ನಲ್ಲಿನ ಅಪಾಯಕಾರಿ ಇಸ್ಲಾಮಿಕ್ ಕಟ್ಟರವಾದದ ಸಂಕೇತವಾಗಿದೆ. ಈ ಚಾನೆಲ್ ‘ಬ್ರಿಟಿಷ್ ಮುಸ್ಲಿಮರನ್ನು’ ಪ್ರತಿನಿಧಿಸುತ್ತದೆ ಎಂದು ಹೇಳಿಕೊಳ್ಳುತ್ತದೆ; ಆದರೆ ಚಾನೆಲ್‌ನ ಸಂಕುಚಿತ ಮನೋಭಾವವು ಮುಸ್ಲಿಂ ಉಗ್ರವಾದ ಮತ್ತು ಮತಾಂಧತೆಯನ್ನು ಉತ್ತೇಜಿಸಲು ಪ್ರಯತ್ನಿಸುತ್ತಿದೆ. ‘ನಾವು ಮತ್ತು ಅವರು’ ಎಂಬ ಸಿದ್ಧಾಂತಕ್ಕೆ ಉತ್ತೇಜನ ನೀಡುತ್ತದೆ, ಇದು ಸಮಾಜದಲ್ಲಿನ ಏಕತೆಯನ್ನು ಹಾಳುಮಾಡುತ್ತದೆ. ಆಫ್‌ಕಾಮ್ ಈ ಚಾನೆಲ್‌ನ ಪ್ರಚೋದನಕಾರಿ ಭಾಷೆ ಮತ್ತು ಬ್ರಿಟಿಷ್ ಮೌಲ್ಯಗಳಲ್ಲಿ ನಂಬಿಕೆ ಇಲ್ಲದ ಪಕ್ಷಪಾತಿಗಳ ವಿರುದ್ಧ ಕ್ರಮ ಕೈಗೊಳ್ಳಬೇಕು, ಎಂದು ಅವರು ಒತ್ತಾಯಿಸಿದ್ದಾರೆ.