ಕಲಬುರಗಿ : ಅತ್ಯಾಚಾರಿ ರಜಾಕ್‌ನಿಗೆ ಜೀವಾವಧಿ ಶಿಕ್ಷೆ ವಿಧಿಸಿದ ನ್ಯಾಯಾಲಯ

ಕಲಬುರಗಿ – ಮದುವೆಯ ಸುಳ್ಳು ಆಶ್ವಾಸನೆ ನೀಡಿ ಅಪ್ರಾಪ್ತ ಬಾಲಕಿಯ ಮೇಲೆ ಪದೇ ಪದೇ ಲೈಂಗಿಕ ದೌರ್ಜನ್ಯ ಎಸಗಿದ 20 ವರ್ಷದ ಯುವಕನಿಗೆ ಇಲ್ಲಿನ ವಿಶೇಷ ‘ಪೋಕ್ಸೊ’ ನ್ಯಾಯಾಲಯವು ಜೀವಾವಧಿ ಶಿಕ್ಷೆ ವಿಧಿಸಿದೆ. ಈ ಸಂದರ್ಭದಲ್ಲಿ ಅವನಿಗೆ 55 ಸಾವಿರ ರೂಪಾಯಿ ದಂಡವನ್ನೂ ವಿಧಿಸಲಾಯಿತು. ಒಂದು ತಿಂಗಳ ಒಳಗಾಗಿ ಸಂತ್ರಸ್ತೆಗೆ 5 ಲಕ್ಷ ರೂಪಾಯಿ ಪರಿಹಾರ ನೀಡಬೇಕೆಂದು ನ್ಯಾಯಾಲಯವು ಸೂಚಿಸಿದೆ. ರಜಾಕ್ ಸಬ್ ಶೇಖ್ ಅತ್ಯಾಚಾರಿ ಯುವಕನ ಹೆಸರಾಗಿದ್ದು, ಅವನು ಕಲಬುರಗಿ ಉಪನಗರ ಪೊಲೀಸ್ ಠಾಣೆಯ ವ್ಯಾಪ್ತಿಯಲ್ಲಿ ಬರುವ ‘ಎ.ಪಿ.ಎಂ.ಸಿ. ಯಾರ್ಡ್’ ಪ್ರದೇಶದ ‘ಹಮಾಲ ಸಂಘ’ದ ನಿವಾಸಿಯಾಗಿದ್ದಾನೆ.

ರಜಾಕ್ ಮದುವೆಯ ಆಮಿಷವೊಡ್ಡಿ 16 ವರ್ಷದ ಬಾಲಕಿಯನ್ನು ಪುಸಲಾಯಿಸಿ ಕರೆದೊಯ್ದಿದ್ದನು. ಅವನು ಆಕೆಯನ್ನು ಕಲಬುರಗಿ ನಗರದ ರಾಮನಗರದ ಕಾರ್ಖಾನೆಯೊಂದಕ್ಕೆ ಕರೆದೊಯ್ದು, ಅಲ್ಲಿ ನಿರಂತರವಾಗಿ ಲೈಂಗಿಕ ದೌರ್ಜನ್ಯ ಎಸಗಿದ್ದನು.