ಎ.ಟಿ.ಎಮ್.ನಲ್ಲಿನ ನಗದು ಪೂರೈಕೆ ಸಮಸ್ಯೆ; ವರದಿ ಸಲ್ಲಿಸುವಂತೆ ಬ್ಯಾಂಕ್ ಗಳಿಗೆ ಆದೇಶ

ನವ ದೆಹಲಿ – ದೇಶದ ಎ.ಟಿ.ಎಮ್.ಗಳಲ್ಲಿ ನಗದು ಲಭ್ಯತೆಯ ಕುರಿತು ಉದ್ಭವಿಸಿರುವ ಆತಂಕದ ಹಿನ್ನೆಲೆಯಲ್ಲಿ ಕೇಂದ್ರ ಸರಕಾರವು ಎಲ್ಲಾ ಬ್ಯಾಂಕುಗಳಿಂದ ತುರ್ತು ಮಾಹಿತಿಯನ್ನು ಕೋರಿದೆ. ಹಣಕಾಸು ಸೇವೆಗಳ ಇಲಾಖೆಯು ಬ್ಯಾಂಕುಗಳ ಮುಖ್ಯ ಕಾರ್ಯನಿರ್ವಾಹಕ ಅಧಿಕಾರಿಗಳಿಗೆ (ಸಿ.ಇ.ಒ.) ಎ.ಟಿ.ಎಮ್.ಗಳಲ್ಲಿ ನಗದು ತುಂಬುವ ಪ್ರಕ್ರಿಯೆಯಲ್ಲಿ ಯಾವ ತೊಂದರೆ ಎದುರಾಗುತ್ತಿವೆಯೇ?, ಹಾಗೆಯೇ ಅವುಗಳನ್ನು ನಿವಾರಿಸಲು ಯಾವ ಕ್ರಮಗಳನ್ನು ಕೈಗೊಳ್ಳಲಾಗುತ್ತಿದೆ?, ಎಂಬಿತ್ಯಾದಿ ವಿಷಯಗಳ ಕುರಿತು ವರದಿ ಸಲ್ಲಿಸುವಂತೆ ಸೂಚಿಸಿದೆ.

ಕೆಲವು ಸಂಸ್ಥೆಗಳು ಕೆಲವು ಪ್ರದೇಶಗಳಲ್ಲಿ ನಗದು ಪೂರೈಕೆಯಲ್ಲಿ ವ್ಯತ್ಯಯ ಉಂಟಾಗುತ್ತಿರುವುದನ್ನು ‘ಭಾರತೀಯ ಬ್ಯಾಂಕ್ ಸಂಘಟನೆ’ಯ ಗಮನಕ್ಕೆ ತಂದ ನಂತರ ಸರಕಾರವು ಪರಿಸ್ಥಿತಿಯ ಪರಿಶೀಲನೆಯನ್ನು ಆರಂಭಿಸಿದೆ. ಗ್ರಾಮೀಣ ಮತ್ತು ಅರೆ-ನಗರ ಪ್ರದೇಶಗಳಲ್ಲಿ ನಗದು ವಹಿವಾಟಿನ ಪ್ರಮಾಣವು ಇಂದಿಗೂ ದೊಡ್ಡದಾಗಿರುವುದರಿಂದ ಎ.ಟಿ.ಎಮ್.ಗಳಲ್ಲಿ ನಗದು ಲಭ್ಯತೆಯು ಅತ್ಯಂತ ಮುಖ್ಯವೆಂದು ಪರಿಗಣಿಸಲಾಗಿದೆ. ಸರಕಾರಿ ಯೋಜನೆಗಳ ಫಲಾನುಭವಿಗಳು, ಪಿಂಚಣಿದಾರರು ಮತ್ತು ಸರ್ವಸಾಮಾನ್ಯ ನಾಗರಿಕರು ಹೆಚ್ಚಿನ ಪ್ರಮಾಣದಲ್ಲಿ ಎ.ಟಿ.ಎಮ್.ಗಳ ಮೇಲೆಯೇ ಅವಲಂಬಿತರಾಗಿರುವುದರಿಂದ, ಎ.ಟಿ.ಎಮ್.ಗಳಲ್ಲಿ ನಗದು ಕೊರತೆಯಾದರೆ ಅದರ ನೇರ ಪರಿಣಾಮ ಜನಸಾಮಾನ್ಯರ ಮೇಲೆ ಉಂಟಾಗಬಹುದು.