ದೇಶದಲ್ಲಿ 76 ರಿಂದ 80 ದಿನಗಳ ಇಂಧನ ದಾಸ್ತಾನು ಬಾಕಿ ! – ಪೆಟ್ರೋಲಿಯಂ ಸಚಿವ

ನವದೆಹಲಿ – ದೇಶದಲ್ಲಿ 76 ರಿಂದ 80 ದಿನಗಳ ಇಂಧನ ದಾಸ್ತಾನು ಬಾಕಿ ಇದೆ ಎಂದು ಕೇಂದ್ರ ಪೆಟ್ರೋಲಿಯಂ ಸಚಿವ ಹರ್ದೀಪ್ ಸಿಂಗ್ ಪುರಿ ಮಾಹಿತಿ ನೀಡಿದ್ದಾರೆ. ಈ ದಾಸ್ತಾನಿನಲ್ಲಿ ಪೆಟ್ರೋಲಿಯಂ ದಾಸ್ತಾನು, ರಿಫೈನರಿ ದಾಸ್ತಾನು ಮತ್ತು ವಾಣಿಜ್ಯ ದಾಸ್ತಾನುಗಳು ಸೇರಿವೆ. ಅವರು ಮಾತನಾಡುತ್ತಾ, ಮಧ್ಯಪ್ರಾಚ್ಯದಲ್ಲಿ ಅಮೆರಿಕ ಮತ್ತು ಇರಾನ್ ನಡುವೆ ಹೆಚ್ಚುತ್ತಿರುವ ಉದ್ವಿಗ್ನತೆಯ ನಡುವೆಯೂ ದೇಶದ ತೈಲ ಪೂರೈಕೆ ಸಂಪೂರ್ಣ ಸುರಕ್ಷಿತವಾಗಿದೆ. ಜಾಗತಿಕ ಮಾರುಕಟ್ಟೆಯಲ್ಲಿ ಕಚ್ಚಾ ತೈಲ ಬೆಲೆಗಳು ದೀರ್ಘಕಾಲದವರೆಗೆ ಗರಿಷ್ಠ ಮಟ್ಟದಲ್ಲಿ ಇರುವುದಿಲ್ಲ. ಆದಾಗ್ಯೂ ಮಧ್ಯಪ್ರಾಚ್ಯದ ಸಂಘರ್ಷವು ನಿರೀಕ್ಷೆಗಿಂತ ಹೆಚ್ಚು ಕಾಲ ಮುಂದುವರಿದರೆ, ಸವಾಲುಗಳು ಬದಲಾಗಬಹುದು. ಆದ್ದರಿಂದ ಸರಕಾರಿ ತೈಲ ಸಂಸ್ಥೆಗಳು ದೀರ್ಘಾವಧಿಯ ಸುರಕ್ಷತೆಗಾಗಿ ಕ್ರಮಗಳನ್ನು ಕೈಗೊಳ್ಳಲು ಕೆಲಸ ಮಾಡುತ್ತಿದ್ದು, ಇದರಿಂದ ಇಂಧನದ ಮೇಲಿನ ನಮ್ಮ ಅವಲಂಬನೆ ಕಡಿಮೆಯಾಗಲಿದೆ.

ತೈಲ ಸಂಸ್ಥೆಗಳಿಗೆ ಪ್ರತಿದಿನ 600 ರಿಂದ 700 ಕೋಟಿ ರೂಪಾಯಿಗಳ ನಷ್ಟವಾಗುತ್ತಿದೆ! – ಪ್ರವೀಣ್ ಖನೂಜಾ

ಇನ್ನೊಂದೆಡೆ ಪೆಟ್ರೋಲಿಯಂ ಸಚಿವಾಲಯದ ಹೆಚ್ಚುವರಿ ಕಾರ್ಯದರ್ಶಿ ಪ್ರವೀಣ್ ಖನೂಜಾ ಅವರು ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿ, ಎಲ್.ಪಿ.ಜಿ. ಹೊರತುಪಡಿಸಿ, ತೈಲ ಕಂಪನಿಗಳಿಗೆ ಪ್ರಸ್ತುತ ಡೀಸೆಲ್ ಮೇಲೆ ಪ್ರತಿ ಲೀಟರ್‌ಗೆ 30 ರೂಪಾಯಿ ಮತ್ತು ಪೆಟ್ರೋಲ್ ಮೇಲೆ ಪ್ರತಿ ಲೀಟರ್‌ಗೆ 6 ರೂಪಾಯಿ (ಒಟ್ಟು 600 ರಿಂದ 700 ಕೋಟಿ ರೂಪಾಯಿ) ನಷ್ಟ ಉಂಟಾಗುತ್ತಿದೆ ಎಂದು ತಿಳಿಸಿದರು.

ಎಲ್.ಪಿ.ಜಿ. ಸಂಪರ್ಕಗಳು 14 ಕೋಟಿಯಿಂದ 33 ಕೋಟಿಗಿಂತಲೂ ಅಧಿಕವಾಗಿವೆ!

ಪೆಟ್ರೋಲಿಯಂ ಸಚಿವರು ಮಾತನಾಡಿ, ದೇಶದಲ್ಲಿ 2014 ನೇ ವರ್ಷದಲ್ಲಿ ಅಂದಾಜು 14 ಕೋಟಿ ಎಲ್.ಪಿ.ಜಿ. ಸಂಪರ್ಕಗಳು ಇದ್ದವು, ಅವು ಈಗ ಹೆಚ್ಚಾಗಿ 33 ಕೋಟಿಗಿಂತಲೂ ಅಧಿಕವಾಗಿವೆ. ದೇಶದ ಮೂಲಭೂತ ಇಂಧನ ಮೂಲಸೌಕರ್ಯಗಳನ್ನು ಸಕ್ಷಮಗೊಳಿಸಲು ಎಲ್.ಪಿ.ಜಿ. ಸಂಗ್ರಹಣಾ ಸಾಮರ್ಥ್ಯ ಮತ್ತು ದೇಶೀಯ ತೈಲ ಪರಿಶೋಧನೆ ಮೇಲಿನ ವೆಚ್ಚವನ್ನು ಗಣನೀಯವಾಗಿ ಹೆಚ್ಚಿಸಲಾಗಿದೆ. ಇದರೊಂದಿಗೆ ಅಂಡಮಾನ್ ಬೆಸಿನ್ ಒಳಗೊಂಡಂತೆ ವಿವಿಧ ದೇಶೀಯ ಉತ್ಖನನ ಯೋಜನೆಗಳಲ್ಲಿ ಹೂಡಿಕೆಯನ್ನು ಹೆಚ್ಚಿಸಲಾಗಿದೆ.