ನೇಪಾಳವು ಹಲವು ಕಡೆಗಳಲ್ಲಿ ಭಾರತದ ಭೂಮಿಯನ್ನು ಕಬಳಿಸಿದೆ: ನೇಪಾಳ ಪ್ರಧಾನಮಂತ್ರಿ !

ಕಾಠಮಂಡು (ನೇಪಾಳ) – ನೇಪಾಳವು ಹಲವು ಕಡೆಗಳಲ್ಲಿ ಭಾರತದ ಭೂಮಿಯನ್ನು ಕಬಳಿಸಿದೆ ಎಂದು ನೇಪಾಳದ ಪ್ರಧಾನಮಂತ್ರಿ ಬಾಲೆನ್ ಶಾ ಅವರು ನೇಪಾಳದ ಸಂಸತ್ತಿನಲ್ಲಿ ಒಪ್ಪಿಕೊಂಡಿದ್ದಾರೆ. ಭಾರತವೂ ನೇಪಾಳದ ಭೂಭಾಗವನ್ನು ಅತಿಕ್ರಮಿಸಿದೆ ಎಂದು ಆರೋಪಿಸಿದ ಅವರು, ‘ಈ ವಿವಾದವನ್ನು ಇತಿಹಾಸಕಾರರು, ಭೂಮಾಪಕರು ಮತ್ತು ತಜ್ಞರ ಸಹಾಯದಿಂದ ಸೌಹಾರ್ದಯುತವಾಗಿ ಬಗೆಹರಿಸಿಕೊಳ್ಳಬೇಕು’ ಎಂದು ಕರೆ ನೀಡಿದರು.

ನೇಪಾಳದ ಅಧಿಕಾರ ಚುಕ್ಕಾಣಿ ಹಿಡಿದ ನಂತರ ಶಾ ಅವರು ಮೊದಲ ಬಾರಿಗೆ ನೇಪಾಳದ ಸಂಸತ್ತನ್ನು ಉದ್ದೇಶಿಸಿ ಮಾತನಾಡುತ್ತಿದ್ದರು. ಅವರು ಮಾತನಾಡಿ, ನಾನು ಪ್ರಧಾನಿಯಾದ ನಂತರ ನನಗೆ ಇತ್ತೀಚೆಗೆ ಒಂದು ಮಾಹಿತಿ ತಿಳಿಯಿತು, ಅದನ್ನು ಕೇಳಿದರೆ ನಿಮಗೂ ಆಶ್ಚರ್ಯವಾಗಬಹುದು. ಕೇವಲ ಭಾರತ ಮಾತ್ರ ನೇಪಾಳದ ಭೂಮಿಯನ್ನು ಅತಿಕ್ರಮಿಸಿಲ್ಲ, ನೇಪಾಳವೂ ಕೂಡ ಹಲವು ಕಡೆಗಳಲ್ಲಿ ಭಾರತದ ಭೂಮಿಯನ್ನು ಕಬಳಿಸಿದೆ. ಈಗ ಉಭಯ ದೇಶಗಳು ವಾಸ್ತವವನ್ನು ಅಧ್ಯಯನ ಮಾಡಿ ಮಿತ್ರರಂತೆ ಒಂದಾಗಿ ಈ ವಿವಾದವನ್ನು ಶಾಶ್ವತವಾಗಿ ಬಗೆಹರಿಸಿಕೊಳ್ಳಬೇಕು. ಈ ವಿಷಯದಲ್ಲಿ ಬ್ರಿಟನ್ ಕೂಡ ಆಸಕ್ತಿ ತೋರಿಸಬೇಕು ಎಂಬುದು ನಮ್ಮ ಸ್ಪಷ್ಟ ಅಭಿಪ್ರಾಯವಾಗಿದೆ; ಏಕೆಂದರೆ ಬ್ರಿಟಿಷರು ಭಾರತದಿಂದ ಹೋದಾಗಿನಿಂದ ಈ ಗಡಿ ವಿವಾದ ಬಾಕಿ ಉಳಿದಿದೆ. ಆದ್ದರಿಂದ ಈ ವಿಷಯದಲ್ಲಿ ಬ್ರಿಟನ್ ಮಧ್ಯಸ್ಥಿಕೆ ವಹಿಸುವುದು ಅಗತ್ಯವಾಗಿದೆ. ಹೀಗಾಗಿ ಈ ವಿವಾದವನ್ನು ಬಗೆಹರಿಸಲು ನಾವು ಕೇವಲ ಭಾರತದೊಂದಿಗೆ ಮಾತ್ರವಲ್ಲದೆ, ಚೀನಾ ಮತ್ತು ನೇರವಾಗಿ ಬ್ರಿಟನ್ ಸರಕಾರದೊಂದಿಗೂ ಸಂಪರ್ಕ ಸಾಧಿಸಿದ್ದೇವೆ ಎಂದರು.

🚨 Nepal PM admits in Parliament that Nepal has encroached on Indian land in several places.

⚠️ Separately, the Opposition has demanded an apology from the PM over reports that he sought British mediation on the India-Nepal border issue.

The backdrop is the ongoing dispute over… pic.twitter.com/aqcvLHoxfW

— Sanatan Prabhat (@SanatanPrabhat) June 1, 2026

ಪ್ರಧಾನಮಂತ್ರಿಯವರು ಕ್ಷಮೆಯಾಚಿಸಬೇಕು ! – ವಿರೋಧ ಪಕ್ಷಗಳ ಆಗ್ರಹ

ಶಾ ಅವರ ಹೇಳಿಕೆಯಿಂದಾಗಿ ನೇಪಾಳದ ಸಂಸತ್ತಿನಲ್ಲಿ ವಿರೋಧ ಪಕ್ಷಗಳು ಭಾರಿ ಗದ್ದಲ ಎಬ್ಬಿಸಿದವು. ಇದರ ಜೊತೆಗೆ ನೇಪಾಳಿ ಜನರಿಂದಲೂ ಕೂಡ ಶಾ ಅವರ ವಿರುದ್ಧ ತೀವ್ರ ಟೀಕೆಗಳು ವ್ಯಕ್ತವಾದವು. ಸಂಸತ್ತಿನಲ್ಲಿ ವಿರೋಧ ಪಕ್ಷಗಳು ‘ಶಾ ಅವರ ಹೇಳಿಕೆಯನ್ನು ಸಂಸತ್ತಿನ ಕಲಾಪದಿಂದ ತೆಗೆದುಹಾಕಬೇಕು ಮತ್ತು ಶಾ ಅವರು ಕ್ಷಮೆಯಾಚಿಸಬೇಕು’ ಎಂದು ಒತ್ತಾಯಿಸಿದವು. ‘ನೇಪಾಳಿ ಕಾಂಗ್ರೆಸ್’ ಪಕ್ಷದ ನಾಯಕಿ ಬಸ್ನಾ ಥಾಪಾ ಮತ್ತು ‘ನೇಪಾಳಿ ಕಮ್ಯುನಿಸ್ಟ್ ಪಕ್ಷ’ದ ರಮೇಶ್ ಮಲ್ಲಾ ಅವರು ಪ್ರಧಾನಿಯವರು ಈ ಹೇಳಿಕೆಗೆ ಪುರಾವೆಗಳನ್ನು ನೀಡಬೇಕು ಅಥವಾ ತಮ್ಮ ಮಾತನ್ನು ಹಿಂಪಡೆಯಬೇಕೆಂದು ಒತ್ತಾಯಿಸಿದರು. ನೇಪಾಳದ ಪ್ರಸಿದ್ಧ ಗಡಿ ತಜ್ಞ ಮತ್ತು ಭೂಗೋಳಶಾಸ್ತ್ರಜ್ಞ ಬುದ್ಧಿ ನಾರಾಯಣ ಶ್ರೇಷ್ಠ ಅವರು ಪ್ರಧಾನಿಯವರ ವಾದವನ್ನು ತಳ್ಳಿಹಾಕಿದರು. ನಾರಾಯಣ ಅವರು ಮಾತನಾಡಿ, ನೇಪಾಳವು ಎಂದಿಗೂ ಭಾರತದ ಭೂಮಿಯನ್ನು ಕಬಳಿಸಿಲ್ಲ. ಕೆಲವು ಗಡಿ ಪ್ರದೇಶಗಳಲ್ಲಿ ಗಡಿ ಕಂಬಗಳು ಇಲ್ಲದಿರುವುದರಿಂದ ಉಭಯ ದೇಶಗಳ ರೈತರು ಕೃಷಿಗಾಗಿ ಪರಸ್ಪರರ ಭೂಮಿಯನ್ನು ಬಳಸಿಕೊಳ್ಳುತ್ತಾರೆ ಎಂದರು.

ನೇಪಾಳದ ವಿದೇಶಾಂಗ ಸಚಿವಾಲಯದಿಂದ ತೇಪೆ ಹಚ್ಚುವ ಕೆಲಸ !

ಪ್ರಧಾನಮಂತ್ರಿಯವರ ಹೇಳಿಕೆಯಿಂದ ದೇಶದಲ್ಲಿ ವಿವಾದ ಸೃಷ್ಟಿಯಾದ ನಂತರ ನೇಪಾಳದ ವಿದೇಶಾಂಗ ಸಚಿವಾಲಯವು ತುರ್ತಾಗಿ ಸ್ಪಷ್ಟೀಕರಣ ನೀಡಬೇಕಾಗಿ ಬಂತು. ಸಚಿವಾಲಯವು, ಪ್ರಧಾನಿಯವರ ಗಮನವು ‘ನೋ ಮ್ಯಾನ್ಸ್ ಲ್ಯಾಂಡ್’ (ನಿರ್ಜನ ಪ್ರದೇಶ) ಮತ್ತು ಗಡಿ ಪ್ರದೇಶದ ನಾಗರಿಕರಿಂದ ನಡೆಯುವ ಭೂಮಿಯ ಪರಸ್ಪರ ಬಳಕೆಯ ಮೇಲಿತ್ತು ಎಂದು ಹೇಳಿದೆ. ಉಭಯ ದೇಶಗಳ ತಾಂತ್ರಿಕ ತಂಡಗಳು ಸದ್ಯ ಗಡಿ ಕಂಬಗಳ ದುರಸ್ತಿ ಮತ್ತು ‘ದಶಗಜಾ’ (ಉಭಯ ದೇಶಗಳ ನಡುವಿನ ಜಂಟಿ ಪಟ್ಟಿ) ಪ್ರದೇಶದ ಮಾಹಿತಿ ಸಂಗ್ರಹಿಸುವ ಕೆಲಸ ಮಾಡುತ್ತಿವೆ ಎಂದು ತಿಳಿಸಿದೆ.

ಮಾಜಿ ರಾಯಭಾರಿಗಳಿಂದಲೂ ಪ್ರಧಾನಿ ಶಾ ಅವರಿಗೆ ತರಾಟೆ !

ಭಾರತದಲ್ಲಿನ ನೇಪಾಳದ ಮಾಜಿ ರಾಯಭಾರಿ ನಿಲಾಂಬರ್ ಆಚಾರ್ಯ ಅವರು ಈ ಕುರಿತು ಮಾತನಾಡಿ, ಪ್ರಧಾನಿ ಶಾ ಅವರಿಗೆ ಗಡಿ ವಿವಾದದ ಬಗ್ಗೆ ಪೂರ್ಣ ಮಾಹಿತಿ ಇಲ್ಲ. ಉಭಯ ದೇಶಗಳ ನಡುವಿನ ಶೇಕಡಾ 97% ರಷ್ಟು ಗಡಿ ವಿವಾದವು ಈಗಾಗಲೇ ಬಗೆಹರಿದಿದೆ. ನೇಪಾಳವು ಭಾರತದ ಭೂಮಿಯನ್ನು ಅತಿಕ್ರಮಿಸಿದೆ ಎಂಬುದಕ್ಕೆ ಯಾವುದೇ ಅಧಿಕೃತ ದಾಖಲೆಗಳಿಲ್ಲ ಎಂದು ಹೇಳಿದರು. ಮತ್ತೊಬ್ಬ ಮಾಜಿ ರಾಯಭಾರಿ ದೀಪ ಕುಮಾರ್ ಉಪಾಧ್ಯಾಯ ಮಾತನಾಡಿ, ಭಾರತವೂ ಎಂದಿಗೂ ಭೂಮಿ ಕಬಳಿಸಿದ ಆರೋಪವನ್ನು ನೇಪಾಳದ ಮೇಲೆ ಅಧಿಕೃತವಾಗಿ ಮಾಡಿಲ್ಲ. ಪ್ರಧಾನಿಯವರು ಯಾವ ಆಧಾರದ ಮೇಲೆ ಈ ಹೇಳಿಕೆ ನೀಡಿದ್ದಾರೆ ? ಎಂದು ಪ್ರಶ್ನಿಸಿದರು.

ಕೈಲಾಸ ಮಾನಸಸರೋವರ ಯಾತ್ರೆಗೆ ನೇಪಾಳದ ವಿರೋಧ !

ಕೆಲವು ವಾರಗಳ ಹಿಂದಷ್ಟೇ ಭಾರತವು ಲಿಪುಲೇಖ್ ಕಣಿವೆಯ ಮೂಲಕ ಆರಂಭಿಸಿದ ‘ಕೈಲಾಸ ಮಾನಸಸರೋವರ ಯಾತ್ರೆ’ಯ ಹೊಸ ಮಾರ್ಗದ ಬಗ್ಗೆ ನೇಪಾಳವು ಆಕ್ಷೇಪ ವ್ಯಕ್ತಪಡಿಸಿತ್ತು. 1816 ರಲ್ಲಿ ನಡೆದ ‘ಸುಗೌಲಿ ಒಪ್ಪಂದ’ವನ್ನು ಉಲ್ಲೇಖಿಸಿ ಲಿಂಪಿಯಾಧುರಾ, ಲಿಪುಲೇಖ್ ಮತ್ತು ಕಾಲಾಪಾನಿ ನೇಪಾಳದ ಅವಿಭಾಜ್ಯ ಅಂಗಗಳಾಗಿವೆ ಎಂದು ನೇಪಾಳವು ವಾದಿಸಿತ್ತು. ಆದರೆ ಭಾರತವು ನೇಪಾಳದ ಈ ವಾದವನ್ನು ತಳ್ಳಿಹಾಕಿತ್ತು.

ಬಾಲೆನ್ ಶಾ ಅವರ ಹೇಳಿಕೆ ‘ರಾಷ್ಟ್ರವಿರೋಧಿ’ ಮತ್ತು ‘ಅಪಾಯಕಾರಿ’ ! – ಮಾಜಿ ಉಪಪ್ರಧಾನಿ ನಾರಾಯಣ್ ಕಾಜಿ ಶ್ರೇಷ್ಠ ಪ್ರಕಾಶ್

ನೇಪಾಳದ ಮಾಜಿ ಉಪಪ್ರಧಾನಿ ನಾರಾಯಣ್ ಕಾಜಿ ಶ್ರೇಷ್ಠ ಪ್ರಕಾಶ್ ಅವರು ಬಾಲೆನ್ ಶಾ ಅವರ ಹೇಳಿಕೆಯು ‘ರಾಷ್ಟ್ರವಿರೋಧಿ’ ಮತ್ತು ‘ಅಪಾಯಕಾರಿ’ ಎಂದು ಹೇಳಿದ್ದಾರೆ. ನಾರಾಯಣ್ ಕಾಜಿ ಅವರು, ನೇಪಾಳದ ರಾಷ್ಟ್ರೀಯ ಸಾರ್ವಭೌಮತ್ವ, ಪ್ರಾದೇಶಿಕ ಸಮಗ್ರತೆ, ಸ್ವಾತಂತ್ರ್ಯ ಮತ್ತು ಗೌರವದ ರಕ್ಷಣೆಗಾಗಿ ದೃಢವಾಗಿ ನಿಂತಿರುವ ಆ ದೇಶಭಕ್ತ ನೇಪಾಳಿ ನಾಗರಿಕರಿಗೆ ಪ್ರಧಾನಮಂತ್ರಿಯವರ ಹೇಳಿಕೆಯು ಮುಜುಗರ ಮತ್ತು ಆಕ್ರೋಶವನ್ನು ಉಂಟುಮಾಡಿದೆ ಎಂದು ಹೇಳಿದರು. ಈ ಹೇಳಿಕೆಯು ನೇಪಾಳದ ಆ ದೀರ್ಘಕಾಲದ ಅಭಿಯಾನವನ್ನು ಸಹ ದುರ್ಬಲಗೊಳಿಸಿದೆ, ಇದರ ಮೂಲಕ ನೇಪಾಳವು ಲಿಂಪಿಯಾಧುರಾ, ಲಿಪುಲೇಖ್, ಕಾಲಾಪಾನಿ ಮತ್ತು ಸುಸ್ತಾ ಭಾಗಗಳನ್ನು ತನ್ನ ಸಾರ್ವಭೌಮ ಅಧಿಕಾರ ವ್ಯಾಪ್ತಿಗೆ ಹಿಂಪಡೆಯಲು ಬಯಸುತ್ತದೆ. ಬಾಲೆನ್ ಶಾ ಅವರು ಪ್ರತಿನಿಧಿ ಸಭೆಯಲ್ಲಿ ‘ನೇಪಾಳವೂ ಭಾರತೀಯ ಪ್ರದೇಶವನ್ನು ಅತಿಕ್ರಮಿಸಿದೆ’ ಎಂದು ಹೇಳಿದ್ದಾರೆ. ಈ ಹೇಳಿಕೆಯು ಸಂಪೂರ್ಣವಾಗಿ ತಪ್ಪು, ರಾಷ್ಟ್ರವಿರೋಧಿ, ಬೇಜವಾಬ್ದಾರಿ ಮತ್ತು ಅಪಾಯಕಾರಿಯಾಗಿದೆ. ಪ್ರಧಾನಮಂತ್ರಿಯವರು ಈ ವಿಷಯಕ್ಕಾಗಿ ನೇಪಾಳದ ಜನತೆ ಮತ್ತು ಸಂಸತ್ತಿನ ಕ್ಷಮೆಯನ್ನು ತಕ್ಷಣವೇ ಯಾಚಿಸಬೇಕು. ಹಾಗೆಯೇ ಈ ಹೇಳಿಕೆಯನ್ನು ಸಂಸತ್ತಿನ ದಾಖಲೆಗಳಿಂದ ತೆಗೆದುಹಾಕಬೇಕು. ಈ ವಿಷಯವನ್ನು ನಿರ್ಲಕ್ಷಿಸುವಂತಹುದಲ್ಲ ಅಥವಾ ಬಿಟ್ಟುಬಿಡುವಂತಹುದಲ್ಲ ಎಂದೂ ಅವರು ಸ್ಪಷ್ಟಪಡಿಸಿದರು.

ಬಾಲೆನ್ ಶಾ ಅವರ ವಿರುದ್ಧ ವಿದ್ಯಾರ್ಥಿ ಸಂಘಟನೆಗಳು

ಬಾಲೆನ್ ಶಾ ಅವರ ಹೇಳಿಕೆಯಿಂದಾಗಿ ಈಗ ವಿದ್ಯಾರ್ಥಿಗಳೂ ರಸ್ತೆಗಿಳಿದಿದ್ದಾರೆ. ಆಲ್ ನೇಪಾಳ ನ್ಯಾಷನಲ್ ಫ್ರೀ ಸ್ಟೂಡೆಂಟ್ಸ್ ಯೂನಿಯನ್, ಅಖಿಲ್ (ಸೋಷಿಯಲಿಸ್ಟ್), ಅಖಿಲ್ (ಆರನೇ), ಸೈಂಟಿಫಿಕ್ ಸೋಷಿಯಲಿಸ್ಟ್ ಸ್ಟೂಡೆಂಟ್ಸ್ ಆರ್ಗನೈಸೇಶನ್ ನೇಪಾಳ ಮತ್ತು ಜನಪಕ್ಷೀಯ ಸ್ಟೂಡೆಂಟ್ ಯೂನಿಯನ್ ನೇಪಾಳ ಸೇರಿದಂತೆ 10 ವಿದ್ಯಾರ್ಥಿ ಸಂಘಟನೆಗಳು ಜಂಟಿ ಹೇಳಿಕೆಯಲ್ಲಿ ಪ್ರಧಾನಮಂತ್ರಿಯವರ ಹೇಳಿಕೆಯನ್ನು ರಾಷ್ಟ್ರವಿರೋಧಿ, ಶರಣಾಗತಿಯನ್ನು ಒಪ್ಪಿಕೊಳ್ಳುವಂತಹ ಮತ್ತು ರಾಷ್ಟ್ರೀಯ ಹಿತಾಸಕ್ತಿಗಳಿಗೆ ವಿರುದ್ಧವಾದುದು ಎಂದು ಕರೆದಿವೆ. ವಿದ್ಯಾರ್ಥಿ ಸಂಘಟನೆಗಳು, ಇಂತಹ ಟಿಪ್ಪಣಿಯಿಂದಾಗಿ ನೇಪಾಳದ ಸಾರ್ವಭೌಮತ್ವ, ಸ್ವಾತಂತ್ರ್ಯ ಮತ್ತು ಪ್ರಾದೇಶಿಕ ಸಮಗ್ರತೆಯು ದುರ್ಬಲಗೊಳ್ಳಬಹುದು ಎಂದು ತಿಳಿಸಿವೆ. ಈ ಹೇಳಿಕೆಯನ್ನು ಕೇವಲ ಒಂದು ಸಣ್ಣ ತಪ್ಪು ಎಂದು ನೋಡಬಾರದು, ಬದಲಿಗೆ ಇದು ರಾಷ್ಟ್ರೀಯ ಹಿತಾಸಕ್ತಿಗೆ ವಿರುದ್ಧವಾಗಿರುವ ಒಂದು ‘ರಾಜಕೀಯ ಮಾನಸಿಕತೆಯ ಅಭಿವ್ಯಕ್ತಿ’ಯಾಗಿದೆ. ಶಾ ಅವರು ತಮ್ಮ ಹೇಳಿಕೆಯನ್ನು ಹಿಂಪಡೆಯಬೇಕು ಮತ್ತು ನೇಪಾಳದ ಜನತೆಯ ಬಹಿರಂಗ ಕ್ಷಮೆ ಯಾಚಿಸಬೇಕು. ಒಂದು ವೇಳೆ ಈ ಬೇಡಿಕೆಗಳನ್ನು ನಿರ್ಲಕ್ಷಿಸಿದರೆ, ದೇಶಾದ್ಯಂತ ವಿದ್ಯಾರ್ಥಿಗಳು ಮತ್ತು ಯುವಕರು ತೀವ್ರ ಆಂದೋಲನವನ್ನು ಪ್ರಾರಂಭಿಸಲಿದ್ದಾರೆ ಎಂದು ಅವರು ಎಚ್ಚರಿಸಿದ್ದಾರೆ.