ಅಮೆರಿಕದ ಆಕಾಶದಲ್ಲಿ ಗಂಟೆಗೆ ಬರೋಬ್ಬರಿ 1 ಲಕ್ಷ 20 ಸಾವಿರ ಕಿ.ಮೀ. ವೇಗದಲ್ಲಿ ಬಂದ ಉಲ್ಕಾಶಿಲೆಯ ಭೀಕರ ಸ್ಫೋಟ!

ನ್ಯೂಯಾರ್ಕ್ (ಅಮೆರಿಕ) – ಅಮೆರಿಕದ ನ್ಯೂ ಇಂಗ್ಲೆಂಡ್ ಭಾಗದಲ್ಲಿ ಮೇ 30ರ ಮಧ್ಯಾಹ್ನ ದಿಢೀರನೆ 2 ಭೀಕರ ಸ್ಫೋಟಗಳ ಸದ್ದು ಕೇಳಿಬಂದಿದೆ. ಇದರಿಂದಾಗಿ ಮ್ಯಾಸಚೂಸೆಟ್ಸ್ ಮತ್ತು ರೋಡ್ ಐಲ್ಯಾಂಡ್ ರಾಜ್ಯಗಳ ಹಲವು ಭಾಗಗಳಲ್ಲಿನ ಜನರಲ್ಲಿ ಭೀತಿ ಆವರಿಸಿತು. ಆದಾಗ್ಯೂ, ಈ ಸ್ಫೋಟಗಳು ಅಮೆರಿಕದ ಆಕಾಶದಲ್ಲಿ ಸ್ಫೋಟಗೊಂಡ ಉಲ್ಕಾಶಿಲೆಯಿಂದ ಸಂಭವಿಸಿವೆ ಎಂಬುದು ನಂತರ ಬೆಳಕಿಗೆ ಬಂದಿತು. ಸ್ಫೋಟಗಳು ಎಷ್ಟು ಪ್ರಬಲವಾಗಿದ್ದವು ಎಂದರೆ ತಮ್ಮ ಮನೆಗಳು ಮತ್ತು ಕಟ್ಟಡಗಳು ನಡುಗಿದವು ಎಂದು ಹಲವು ನಾಗರಿಕರು ತಿಳಿಸಿದ್ದಾರೆ.

ಭೀಕರ ಸ್ಫೋಟಗಳ ಹಿಂದಿನ ಕಾರಣ !

ಈ ಸ್ಫೋಟಗಳು ಯಾವುದೇ ಅಪಘಾತ ಅಥವಾ ದಾಳಿಯಿಂದ ಸಂಭವಿಸಿಲ್ಲ ಎಂದು ಅಮೆರಿಕದ ಬಾಹ್ಯಾಕಾಶ ಸಂಸ್ಥೆ ‘ನಾಸಾ’ ಸ್ಪಷ್ಟಪಡಿಸಿದೆ. ವಾತಾವರಣದಲ್ಲಿ ದೊಡ್ಡ ಉಲ್ಕಾಶಿಲೆಯೊಂದು ಸ್ಫೋಟಗೊಂಡಿದ್ದರಿಂದ ಈ ಸ್ಫೋಟಗಳು ಸಂಭವಿಸಿವೆ. ಸುಮಾರು 3 ಅಡಿ ಅಗಲದ ಈ ಉಲ್ಕಾಶಿಲೆಯು ಗಂಟೆಗೆ ಅಂದಾಜು 1 ಲಕ್ಷ 20 ಸಾವಿರ ಕಿಲೋಮೀಟರ್ ವೇಗದಲ್ಲಿ ಭೂಮಿಯ ವಾತಾವರಣವನ್ನು ಪ್ರವೇಶಿಸಿದೆ. ಮ್ಯಾಸಚೂಸೆಟ್ಸ್ ಮತ್ತು ನ್ಯೂ ಹ್ಯಾಂಪ್‌ಶೈರ್ ಗಡಿಯಲ್ಲಿ ಅಂದಾಜು 64 ಕಿಲೋಮೀಟರ್ ಎತ್ತರದಲ್ಲಿ ಈ ಉಲ್ಕಾಶಿಲೆಯು ಸ್ಫೋಟಗೊಂಡು ಚದುರಿಹೋಗಿದೆ.

ವಿಜ್ಞಾನಿಗಳ ಪ್ರಕಾರ, ಈ ಸ್ಫೋಟದಿಂದ ಸುಮಾರು 300 ಟನ್ ಟಿ.ಎನ್.ಟಿ. (ಟ್ರೈನೈಟ್ರೋಟೊಲ್ಯೂಯಿನ್ – ಸ್ಫೋಟಕ ಶಕ್ತಿಯನ್ನು ಅಳೆಯುವ ಮಾನದಂಡ) ಗೆ ಸಮಾನವಾದ ಶಕ್ತಿ ಹೊರಹೊಮ್ಮಿದೆ. ಇದರಿಂದಾಗಿ ಪ್ರಖರವಾದ ಬೆಳಕು ಮತ್ತು ಪ್ರಬಲವಾದ ಸ್ಫೋಟಗಳ ಸದ್ದು ಕೇಳಿಬಂದಿದೆ.