ಗುಜರಾತ್‌ನ ಮುಂದ್ರಾ ಬಂದರಿನಲ್ಲಿರುವ ವಿದೇಶಿ ಹಡಗಿನಿಂದ 1 ಸಾವಿರದ 200 ಕೋಟಿ ರೂಪಾಯಿ ಮೌಲ್ಯದ ಕೊಕೇನ್ ವಶ

ಮುಂದ್ರಾ (ಗುಜರಾತ್) – ಮುಂದ್ರಾ ಬಂದರಿನಲ್ಲಿ ಮಾದಕ ವಸ್ತುಗಳು ಪತ್ತೆಯಾಗುವ ಸರಣಿ ಮುಂದುವರಿದಿದ್ದು, ಮೇ 28 ರಂದು ಇಲ್ಲಿ 1 ಸಾವಿರದ 200 ಕೋಟಿ ರೂಪಾಯಿ ಬೆಲೆಬಾಳುವ 118 ಕೆಜಿ ಕೊಕೇನ್ ವಶಪಡಿಸಿಕೊಳ್ಳಲಾಗಿದೆ. ಭಾರತೀಯ ಕರಾವಳಿ ಕಾವಲು ಪಡೆ ಮತ್ತು ಗುಜರಾತ್ ಭಯೋತ್ಪಾದನಾ ನಿಗ್ರಹ ದಳ ಜಂಟಿಯಾಗಿ ಈ ಕಾರ್ಯಾಚರಣೆ ನಡೆಸಿವೆ. ಈ ಪ್ರಕರಣದಲ್ಲಿ 3 ವಿದೇಶಿ ಪ್ರಜೆಗಳನ್ನು ಬಂಧಿಸಲಾಗಿದೆ. ಸೈಪ್ರಸ್‌ನ ಸರಕು ಸಾಗಣೆ ಹಡಗಿನಲ್ಲಿ ನಡೆಸಿದ ಶೋಧದ ವೇಳೆ ಈ ಕೊಕೇನ್ ಪತ್ತೆಯಾಗಿದೆ. ಈ ಹಡಗು ಬ್ರೆಜಿಲ್, ದಕ್ಷಿಣ ಅಮೇರಿಕಾ, ಮೆಕ್ಸಿಕೋ ಮತ್ತು ಪಾಕಿಸ್ತಾನದ ಕರಾಚಿ ಬಂದರಿನ ಮೂಲಕ ಗುಜರಾತ್ ಕರಾವಳಿಗೆ ಬಂದಿತ್ತು. ಕಾರ್ಯಾಚರಣೆಯ ನಂತರ ಈ ಹಡಗನ್ನು ಕಚ್ ಬಂದರಿಗೆ ತರಲಾಗಿದೆ.

ವಶಪಡಿಸಿಕೊಂಡ ಕೊಕೇನ್ ಅನ್ನು ದೆಹಲಿಯ ದ್ವಾರಕಾದಲ್ಲಿ ವಾಸಿಸುವ 2 ಜನರಿಗೆ ತಲುಪಿಸಬೇಕಿತ್ತು ಎಂದು ಪೊಲೀಸರಿಂದ ಬಂಧಿತನಾದ ಆರೋಪಿ ಮಾಹಿತಿ ನೀಡಿದ್ದಾನೆ. ಈ ಹಿಂದೆಯೂ ಮುಂದ್ರಾ ಬಂದರಿನಲ್ಲಿ ಸಾವಿರಾರು ಕೋಟಿ ರೂಪಾಯಿ ಮೌಲ್ಯದ ಮಾದಕ ವಸ್ತುಗಳನ್ನು ಹಲವು ಬಾರಿ ಹಿಡಿಯಲಾಗಿದೆ. ಮುಂದ್ರಾ ಬಂದರು ಖಾಸಗಿ ಬಂದರಾಗಿದ್ದು, ಅದಾನಿ ಸಮೂಹದ ಒಡೆತನದಲ್ಲಿದೆ.