ಜಗತ್ತಿನಾದ್ಯಂತದ 100 ಉಷ್ಣ ನಗರಗಳ ಪೈಕಿ 97 ನಗರಗಳು ಭಾರತದಲ್ಲಿ !

ನವ ದೆಹಲಿ – ಜಗತ್ತಿನಾದ್ಯಂತದ 100 ಉಷ್ಣ ನಗರಗಳ ಪಟ್ಟಿಯಲ್ಲಿ ಭಾರತದ ಒಟ್ಟು 97 ನಗರಗಳು ಸೇರ್ಪಡೆಯಾಗಿವೆ. ಇಂತಹ ಅಂಕಿ-ಅಂಶಗಳು ಬಂದಿರುವುದು ಇದು ಸತತ ಎರಡನೇ ತಿಂಗಳಾಗಿದೆ. ಇದಕ್ಕೂ ಮುನ್ನ ಏಪ್ರಿಲ್ ತಿಂಗಳಿನಲ್ಲೂ ಜಗತ್ತಿನಾದ್ಯಂತದ 100 ಉಷ್ಣ ನಗರಗಳ ಪಟ್ಟಿಯಲ್ಲಿ ಭಾರತದ 95 ನಗರಗಳು ಸೇರಿದ್ದವು. ಸದ್ಯ ಭಾರತದ ಪಂಜಾಬ, ಉತ್ತರ ಪ್ರದೇಶ, ರಾಜಸ್ಥಾನ, ಮಧ್ಯಪ್ರದೇಶ ಸೇರಿದಂತೆ ಕೆಲವು ರಾಜ್ಯಗಳಲ್ಲಿ ಬಿಸಿಗಾಳಿಯ ಅಲೆಯ ಪರಿಸ್ಥಿತಿ ಇದೆ. ಇದರಿಂದಾಗಿ ತಾಪಮಾನದ ಮಟ್ಟವು 47-48 ಡಿಗ್ರಿಗಳಿಗೆ ತಲುಪಿದೆ.

ಜಗತ್ತಿನ ಅತ್ಯಂತ ಉಷ್ಣ ನಗರಗಳು ಭಾರತದ ಉತ್ತರ ಪ್ರದೇಶ ರಾಜ್ಯದಲ್ಲಿವೆ. ಈ ರಾಜ್ಯದ ಒಟ್ಟು 34 ನಗರಗಳು ಜಗತ್ತಿನ ಅತ್ಯಂತ ಉಷ್ಣ ನಗರಗಳ ಪಟ್ಟಿಯಲ್ಲಿವೆ. ಇದರಲ್ಲಿ ಪ್ರಯಾಗರಾಜ, ವಾರಾಣಸಿ, ಹಾಥರಸ, ಆಗ್ರಾ, ಹಾಗೆಯೇ ಪಿಲಿಭಿತ ಸೇರಿದಂತೆ ಹಲವು ನಗರಗಳು ಸೇರಿವೆ. ಮಹಾರಾಷ್ಟ್ರದ ನಾಗಪುರ, ಚಂದ್ರಾಪುರ, ಅಕೋಲಾ, ಅಮರಾವತಿ, ವರ್ಧಾ ಮತ್ತು ಬ್ರಹ್ಮಪುರಿ ನಗರಗಳೂ ಸಹ ಈ ಪಟ್ಟಿಯಲ್ಲಿ ಸೇರ್ಪಡೆಯಾಗಿವೆ.

ಹವಾಮಾನ ಇಲಾಖೆಯ ಮುನ್ಸೂಚನೆಯ ಪ್ರಕಾರ ಮುಂದಿನ ಕೆಲವು ದಿನಗಳವರೆಗೆ ಈ ಪ್ರದೇಶದಲ್ಲಿ ಇದೇ ಪರಿಸ್ಥಿತಿ ಮುಂದುವರಿಯಲಿದ್ದು, ವಿದರ್ಭದ ಕೆಲವು ಜಿಲ್ಲೆಗಳಿಗೆ ಉಷ್ಣತೆಯ ‘ರೆಡ್ ಅಲರ್ಟ್’ (ಹೆಚ್ಚಿನ ಅಪಾಯ), ಇನ್ನು ಕೆಲವು ಜಿಲ್ಲೆಗಳಿಗೆ ‘ಆರೆಂಜ್ ಅಲರ್ಟ್’ (ಮಧ್ಯಮ ಅಪಾಯ) ನೀಡಲಾಗಿದೆ.