ಬಂಗಾಳ: ಮದರಸಾಗಳಲ್ಲಿ ‘ವಂದೇ ಮಾತರಂ’ ಕಡ್ಡಾಯ; ಕಟ್ಟರವಾದಿ ಮುಸ್ಲಿಮರ ವಿರೋಧ

ಕೊಲಕಾತಾ (ಬಂಗಾಳ) – ಬಂಗಾಳದ ಭಾಜಪ ಸರಕಾರವು ರಾಜ್ಯದ ಎಲ್ಲಾ ಮದರಸಾಗಳಲ್ಲಿ ‘ವಂದೇ ಮಾತರಂ’ ಗೀತೆಯನ್ನು ಕಡ್ಡಾಯಗೊಳಿಸಿರುವ ನಿರ್ಧಾರಕ್ಕೆ ಮುಸ್ಲಿಂ ಸಂಘಟನೆಗಳು ವಿರೋಧ ವ್ಯಕ್ತಪಡಿಸಿವೆ. ‘ಆಮ್ ಆದ್ಮಿ ಉನ್ನಯನ್ ಪಾರ್ಟಿ’ಯ ಅಧ್ಯಕ್ಷರೂ ಆಗಿರುವ ಶಾಸಕ ಹುಮಾಯೂನ್ ಕಬೀರ್ ಈ ಬಗ್ಗೆ ಮಾತನಾಡಿ, ಮದರಸಾಗಳಲ್ಲಿರುವವರು ಈ ನಿರ್ಧಾರವನ್ನು ಎಂದಿಗೂ ಒಪ್ಪುವುದಿಲ್ಲ. ಮದರಸಾಗಳನ್ನು ನಡೆಸಲು ಸರಕಾರ ಯಾವುದೇ ಆರ್ಥಿಕ ಸಹಾಯ ನೀಡುತ್ತಿಲ್ಲ. ಮುಸ್ಲಿಮರು ತಮ್ಮದೇ ದೇಣಿಗೆಯ ಮೂಲಕ ಮದರಸಾಗಳನ್ನು ನಡೆಸುತ್ತಿದ್ದಾರೆ. ಬಡ ಮಕ್ಕಳಿಗೆ ಕುರಾನ್ ಶಿಕ್ಷಣವನ್ನು ನೀಡಲಾಗುತ್ತಿದೆ. ಇಂತಹ ಪರಿಸ್ಥಿತಿಯಲ್ಲಿ ಸರಕಾರದ ನೀತಿಯನ್ನು ಹೀಗೆ ಹೇರಲು ಸಾಧ್ಯವಿಲ್ಲ. ಹಿಂದೂ ಇರಲಿ ಅಥವಾ ಮುಸ್ಲಿಂ ಇರಲಿ, ಪ್ರತಿಯೊಬ್ಬರಿಗೂ ತಮ್ಮ ಧರ್ಮವನ್ನು ಪಾಲಿಸುವ ಹಕ್ಕಿದೆ. ಅಗತ್ಯ ಬಿದ್ದರೆ ನಾವು ನ್ಯಾಯಾಲಯದ ಮೊರೆ ಹೋಗುತ್ತೇವೆ ಎಂದು ಹೇಳಿದ್ದಾರೆ.

1. ಮೌಲಾನಾಗಳ ಪ್ರಕಾರ, ಇದು ಅವರ ಧಾರ್ಮಿಕ ಸ್ವಾತಂತ್ರ್ಯದ ಉಲ್ಲಂಘನೆಯಾಗಿದೆ. ನಾವು ಈ ಆದೇಶದ ವಿರುದ್ಧ ಬೀದಿಗಿಳಿದು ಪ್ರತಿಭಟನೆ ಮಾಡುತ್ತೇವೆ ಎಂದಿದ್ದಾರೆ.

2. ಕೊಲಕಾತಾ ಖಿಲಾಫತ್ ಸಮಿತಿಯ ಮುಖ್ಯಸ್ಥ ಮಹಮ್ಮದ್ ಅಶ್ರಫ್ ಅಲಿ ಕಾಸಮಿ ಅವರೂ ಕೂಡ ಸರಕಾರದ ಈ ನಿರ್ಧಾರವನ್ನು ವಿರೋಧಿಸಿದ್ದಾರೆ. ನಾವು ಈ ದೇಶದಲ್ಲಿ ವಾಸಿಸುತ್ತಿದ್ದೇವೆ ಮತ್ತು ದೇಶದ ಮೇಲೆ ನಮಗೆ ಪ್ರೀತಿಯಿದೆ; (ಆದರೆ ಈ ಪ್ರೀತಿ ಎಂದಿಗೂ, ಕಂಡುಬರುವುದಿಲ್ಲವೇಕೆ? – ಸಂಪಾದಕರು) ಆದರೆ ನಾವು ದೇಶವನ್ನು ‘ಪೂಜಿಸಲು’ ಸಾಧ್ಯವಿಲ್ಲ. ಇಸ್ಲಾಂ ಧರ್ಮದ ಪ್ರಕಾರ ಮುಸ್ಲಿಮರು ಕೇವಲ ಅಲ್ಲಾಹನನ್ನು ಮಾತ್ರ ಪೂಜಿಸುತ್ತಾರೆ. ‘ವಂದೇ ಮಾತರಂ’ ನಲ್ಲಿರುವ ಕೆಲವು ಸಾಲುಗಳು ನಮ್ಮ ಧರ್ಮದ ಮೂಲಭೂತ ತತ್ವಗಳಿಗೆ ವಿರುದ್ಧವಾಗಿವೆ. ಸರಕಾರವು ಈ ನಿರ್ಧಾರವನ್ನು ಹಿಂಪಡೆಯಬೇಕು” ಎಂದು ಅಲಿ ಕಾಸಮಿ ಆಗ್ರಹಿಸಿದ್ದಾರೆ.

ಸರಕಾರವು ಧರ್ಮದ ಕಡೆಗಲ್ಲ, ಅಭಿವೃದ್ಧಿಯ ಕಡೆಗೆ ಗಮನ ಹರಿಸಲಿ!

ಮುಸ್ಲಿಂ ಸಂಘಟನೆಗಳ ಪ್ರಕಾರ, ಉದ್ಯೋಗ ನೀಡುವುದು ಮತ್ತು ಅಭಿವೃದ್ಧಿ ಮಾಡುವುದು ಸರಕಾರದ ಕೆಲಸವಾಗಿದೆ. ಸರಕಾರವು ಆರೋಗ್ಯ, ರಸ್ತೆ ಮತ್ತು ಕಾನೂನು-ಸುವ್ಯವಸ್ಥೆಯ ಕಡೆಗೆ ಗಮನ ಹರಿಸಬೇಕು. ಯಾರದೇ ಧಾರ್ಮಿಕ ವಿಷಯಗಳಲ್ಲಿ ಹಸ್ತಕ್ಷೇಪ ಮಾಡುವುದು ಸರಕಾರದ ಕೆಲಸವಲ್ಲ. (ಧರ್ಮದ ಆಧಾರದ ಮೇಲೆ ಸೌಲಭ್ಯಗಳನ್ನು ಕೇಳುವಾಗ ಈ ಅಂಶಗಳು ಹೇಗೆ ನೆನಪಿಗೆ ಬರುವುದಿಲ್ಲ? – ಸಂಪಾದಕರು)

ಶಾಲೆಗಳಲ್ಲಿ ಈ ನಿಯಮವಿರುವಾಗ, ಮದರಸಾಗಳಲ್ಲಿ ಏಕೆ ಇರಬಾರದು? – ಮದರಸಾ ಶಿಕ್ಷಣ ಸಚಿವರು

ರಾಜ್ಯದ ಮದರಸಾ ಶಿಕ್ಷಣ ಸಚಿವ ಖುದೀರಾಂ ತುಡು ಈ ಕುರಿತು ಮಾತನಾಡಿ, ಶಾಲೆಗಳಲ್ಲಿ ಈ ನಿಯಮವಿರುವಾಗ, ಮದರಸಾಗಳಲ್ಲಿ ಏಕೆ ಇರಬಾರದು? ಸರಕಾರವು ಹಳೆಯ ಎಲ್ಲಾ ನಿಯಮಗಳನ್ನು ರದ್ದುಗೊಳಿಸಿ ಈ ಆದೇಶವನ್ನು ಜಾರಿಗೆ ತಂದಿದೆ ಎಂದಿದ್ದಾರೆ.