ಅಮೆರಿಕಾದಿಂದ ಹಿಂದೂ ಮಹಾಸಾಗರದಲ್ಲಿ ಇರಾನ್‌ನ ೧೦ ಲಕ್ಷ ಬ್ಯಾರೆಲ್‌ನ ಆಯಿಲ್ ಟ್ಯಾಂಕರ್ ಜಪ್ತಿ!

ತೆಹರಾನ್ (ಇರಾನ್) – ಅಮೆರಿಕಾದ ಅಧಿಕಾರಿಗಳು ನೀಡಿದ ಅಧಿಕೃತ ಮಾಹಿತಿಯ ಪ್ರಕಾರ, ಅಮೆರಿಕಾವು ಹಿಂದೂ ಮಹಾಸಾಗರದಲ್ಲಿ ಇರಾನ್‌ಗೆ ಸಂಬಂಧಿಸಿದ ಒಂದು ದೊಡ್ಡ ತೈಲ ಟ್ಯಾಂಕರ್ ಅನ್ನು ಜಪ್ತಿ ಮಾಡಿದೆ. ಈ ಬೃಹತ್ ನೌಕೆಯ ಹೆಸರು ‘ಸ್ಕೈವೇವ್’ ಎಂದಾಗಿದೆ. ಇರಾನ್ ಮೇಲಿನ ಅಂತರರಾಷ್ಟ್ರೀಯ ನಿರ್ಬಂಧಗಳನ್ನು ಉಲ್ಲಂಘಿಸಿ, ಕಾನೂನುಬಾಹಿರವಾಗಿ ತೈಲ ಸಾಗಣೆಗೆ ಈ ಟ್ಯಾಂಕರ್ ಅನ್ನು ಬಳಸಲಾಗುತ್ತಿತ್ತು ಎಂದು ಅಮೆರಿಕಾ ಆರೋಪಿಸಿದೆ. ಈ ಟ್ಯಾಂಕರ್‌ನಲ್ಲಿ ಬರೋಬ್ಬರಿ ೧೦ ಲಕ್ಷ ಬ್ಯಾರೆಲ್‌ಗಿಂತಲೂ ಹೆಚ್ಚು ಕಚ್ಚಾ ತೈಲ ಇರುವ ಸಾಧ್ಯತೆಯನ್ನು ವ್ಯಕ್ತಪಡಿಸಲಾಗಿದೆ.

ಅಮೆರಿಕಾವು ಇರಾನ್‌ನ ತೈಲ ಸಾಗಣೆ ನೌಕೆಗಳ ಮೇಲೆ ಇಂತಹ ಕ್ರಮ ಕೈಗೊಳ್ಳುತ್ತಿರುವುದು ಇದೇ ಮೊದಲಲ್ಲ. ಇದಕ್ಕೂ ಮುನ್ನ ಏಪ್ರಿಲ್ ತಿಂಗಳಿನಲ್ಲಿಯೂ ಅಮೆರಿಕಾವು ಹಿಂದೂ ಮಹಾಸಾಗರದಿಂದ ಇರಾನ್‌ನ ‘ಮೆಜೆಸ್ಟಿಕ್ ಎಕ್ಸ್’ ಮತ್ತು ‘ಟಿಫಾನಿ’ ಎಂಬ ೨ ದೊಡ್ಡ ತೈಲ ಸಾಗಣೆ ನೌಕೆಗಳನ್ನು ಜಪ್ತಿ ಮಾಡಿತ್ತು.