ಆಸ್ಟ್ರೇಲಿಯಾ: ಭಾರತೀಯರನ್ನು ಬೆದರಿಸುತ್ತಿದ್ದ ‘ನಿಯೋ-ನಾಜಿ’ ಸಂಘಟನೆಯ ಮೇಲೆ ನಿಷೇಧ!

ಕ್ಯಾನ್ಬೆರಾ (ಆಸ್ಟ್ರೇಲಿಯಾ) – ಪಂಜಾಬಿ ಸಮುದಾಯ ಸೇರಿದಂತೆ ಭಾರತೀಯರ ವಿರುದ್ಧ ಜನಾಂಗೀಯ ನಿಂದನೆ ಮಾಡುತ್ತಿದ್ದ ಮತ್ತು ಮೆರವಣಿಗೆ ನಡೆಸಿ ಬೆದರಿಕೆ ಹಾಕುತ್ತಿದ್ದ ‘ನಿಯೋ-ನಾಜಿ’ ಸಂಘಟನೆಯನ್ನು ಆಸ್ಟ್ರೇಲಿಯಾ ಸರಕಾರವು ಶಾಶ್ವತವಾಗಿ ನಿಷೇಧಿಸಿದೆ. ಗೃಹ ಸಚಿವ ಟೋನಿ ಬರ್ಕ್ ಈ ಘೋಷಣೆ ಮಾಡಿದ್ದಾರೆ. ಇನ್ನು ಮುಂದೆ ಈ ಸಂಘಟನೆಯಲ್ಲಿ ಪಾಲ್ಗೊಳ್ಳುವ, ಪ್ರಚಾರ ಮಾಡುವ ಅಥವಾ ಅದರ ಚಟುವಟಿಕೆಗಳಲ್ಲಿ ಭಾಗವಹಿಸುವ ಯಾವುದೇ ವ್ಯಕ್ತಿಗೆ ೧೫ ವರ್ಷಗಳವರೆಗೆ ಜೈಲು ಶಿಕ್ಷೆಯಾಗಬಹುದು.

​ಈ ಸಂಘಟನೆಯು ಕಳೆದ ಕೆಲವು ವರ್ಷಗಳಿಂದ ಅಡಾಲ್ಫ್ ಹಿಟ್ಲರ್ ನ ನಾಜಿ ಸಿದ್ಧಾಂತವನ್ನು ಪ್ರಚಾರ ಮಾಡುತ್ತಿತ್ತು ಮತ್ತು ದೇಶದಲ್ಲಿ ವಾಸಿಸುವ ಕಪ್ಪು ವರ್ಣೀಯ ವಲಸಿಗರನ್ನು ಗುರಿಯಾಗಿಸಿಕೊಂಡಿತ್ತು. ವಿಶೇಷವಾಗಿ: ಮೆಲ್ಬೋರ್ನ್ ಮತ್ತು ಸಿಡ್ನಿಯಂತಹ ಪ್ರಮುಖ ನಗರಗಳಲ್ಲಿ ಈ ಗುಂಪಿನ ನಾಯಕ ಥಾಮಸ್ ಸೆವೆಲ್ ವಲಸಿಗರ ವಿರುದ್ಧ ಹಲವಾರು ಪ್ರತಿಭಟನಾ ಮೆರವಣಿಗೆಗಳನ್ನು ನಡೆಸಿದ್ದನು. ಈ ಗುಂಪು ನಿರಂತರವಾಗಿ ಆಸ್ಟ್ರೇಲಿಯಾದ ಸಮಾಜವನ್ನು ವಿಭಜಿಸಲು ಮತ್ತು ಅಲ್ಪಸಂಖ್ಯಾತರ ವಿರುದ್ಧ ಹಿಂಸಾತ್ಮಕ ವಾತಾವರಣವನ್ನು ನಿರ್ಮಿಸಲು ಪ್ರಯತ್ನಿಸುತ್ತಿತ್ತು.