Russia Ukraine War : ಮಾಸ್ಕೋ: ವಸತಿ ಕಟ್ಟಡದ ಮೇಲೆ ಯುಕ್ರೇನ್‌ ಡ್ರೋನ್ ದಾಳಿ

ಮಾಸ್ಕೋ (ರಷ್ಯಾ) – ರಷ್ಯಾ ಮತ್ತು ಯುಕ್ರೇನ್ ನಡುವೆ ಯುದ್ಧ ಮುಂದುವರೆದಿದ್ದು, ರಷ್ಯಾದ ರಾಜಧಾನಿ ಮಾಸ್ಕೋದ ಒಂದು ಬಹುಮಹಡಿ ವಸತಿ ಕಟ್ಟಡವೊಂದರ ಮೇಲೆ ಯುಕ್ರೇನ್‌ ಡ್ರೋನ್ ದಾಳಿ ನಡೆಸಿದೆ. ಈ ದಾಳಿಯಿಂದಾಗಿ ಕಟ್ಟಡಕ್ಕೆ ಭಾರಿ ಹಾನಿಯಾಗಿದೆ. ಇದುವರೆಗೆ ಯಾವುದೇ ಪ್ರಾಣಹಾನಿಯಾದ ಬಗ್ಗೆ ವರದಿಯಾಗಿಲ್ಲ. ಈ ಘಟನೆಯ ನಂತರ ಇಡೀ ರಾಜಧಾನಿಯಲ್ಲಿ ಅತಿದಕ್ಷತೆಯ (ಹೈ ಅಲರ್ಟ್) ಎಚ್ಚರಿಕೆ ನೀಡಲಾಗಿದೆ. ತಜ್ಞರ ಪ್ರಕಾರ, ಯುದ್ಧವು ಈಗ ಗಡಿಗಳನ್ನು ದಾಟಿ ದೊಡ್ಡ ನಗರಗಳನ್ನು ತಲುಪುತ್ತಿದೆ ಎಂಬುದೇ ಈ ದಾಳಿಯ ಸಂಕೇತವಾಗಿದೆ. ಇತ್ತೀಚಿನ ತಿಂಗಳುಗಳಲ್ಲಿ ಯುಕ್ರೇನ್ ದೂರಗಾಮಿ ಡ್ರೋನ್‌ಗಳನ್ನು ಅಭಿವೃದ್ಧಿಪಡಿಸಿದ್ದು, ಈ ಡ್ರೋನ್ ಗಳು ರಷ್ಯಾದ ಮಧ್ಯಭಾಗದವರೆಗೆ ದಾಳಿ ಮಾಡುವ ಸಾಮರ್ಥ್ಯವನ್ನು ಹೊಂದಿವೆ.