ಅಮೇರಿಕದ ಸೋಶಿಯಲ್ ಮೀಡಿಯಾ ಇನ್ಫ್ಲುಯೆನ್ಸರ್‌ನಿಂದ ಭಾರತೀಯ ಹೆಸರುಗಳ ಅಪಹಾಸ್ಯ

(ಸೋಶಿಯಲ್ ಮೀಡಿಯಾ ಇನ್ಫ್ಲುಯೆನ್ಸರ್, ಅಂದರೆ ಸಾಮಾಜಿಕ ಜಾಲತಾಣಗಳ ಮೂಲಕ ಸಮಾಜದ ಮೇಲೆ ಪ್ರಭಾವ ಬೀರುವ ವ್ಯಕ್ತಿ)

ನ್ಯೂಯಾರ್ಕ್ – ಟೆಕ್ಸಾಸ್‌ನ ಬಲಪಂಥೀಯ ಸೋಶಿಯಲ್ ಮೀಡಿಯಾ ಇನ್ಫ್ಲುಯೆನ್ಸರ್ ಎಲಿಜಾ ಶೇಫರರವರ ವಿಡಿಯೋವೊಂದು ವ್ಯಾಪಕವಾಗಿ ಪ್ರಸಾರವಾಗಿದೆ. ಇದರಲ್ಲಿ ಆತನು ಭಾರತೀಯ ಹೆಸರುಗಳನ್ನು ಅಪಹಾಸ್ಯ ಮಾಡಿದ್ದಾನೆ ಮತ್ತು ಸಾಂಸ್ಕೃತಿಕ ಹಾಗೂ ಧಾರ್ಮಿಕ ಸಂಗತಿಗಳ ಮೇಲೆ ಆಕ್ಷೇಪಾರ್ಹ ಟಿಪ್ಪಣಿ ಮಾಡಿದ್ದಾನೆ.

೧. ವಿಡಿಯೋದಲ್ಲಿ ಶೇಫರ್ ಸ್ಥಳೀಯ ಚುನಾವಣೆಗೆ ಸ್ಪರ್ಧಿಸುತ್ತಿರುವ ಅಭ್ಯರ್ಥಿಗಳ ಹೆಸರುಗಳ ಅಪಹಾಸ್ಯ ಮಾಡುತ್ತಿರುವುದು ಕಂಡುಬರುತ್ತದೆ. ಅವನು ಸಾಯಿ ಕೃಷ್ಣ, ಶ್ರೀಕಾಂತ ರೆಡ್ಡಿ, ವಿಜಯ ಕಾರ್ತಿಕ ಮತ್ತು ಬಾಬು ವೆಂಕಟ ಮುಂತಾದ ಹೆಸರುಗಳನ್ನು ‘ನಾಟ್ ಅಮೇರಿಕನ್ ಎನಫ್’, ಅಂದರೆ ‘ಸಾಕಷ್ಟು ಅಮೇರಿಕನ್ ಅನಿಸುತ್ತಿಲ್ಲ’, ಎಂದು ಕರೆಯುತ್ತಾ ಅವರನ್ನು ಅಪಹಾಸ್ಯ ಮಾಡಿದ್ದಾನೆ.

೨. ಚುನಾವಣೆಯಲ್ಲಿ ಯಹೂದಿ, ಭಾರತೀಯ ಮತ್ತು ಮುಸ್ಲಿಂ ಅಭ್ಯರ್ಥಿಗಳು ಹೆಚ್ಚಾಗಿದ್ದಾರೆ, ಆದರೆ ಕ್ರೈಸ್ತ ಅಭ್ಯರ್ಥಿಗಳು ಕಡಿಮೆಯಿದ್ದಾರೆ ಎಂದೂ ಆತ ಹೇಳಿದ್ದಾನೆ. ಇದರೊಂದಿಗೆ ಆತನು ನಗರದಲ್ಲಿ ದೇವಾಲಯಗಳು ಮತ್ತು ಮಸೀದಿಗಳ ಅಸ್ತಿತ್ವದ ಬಗ್ಗೆಯೂ ಪ್ರಶ್ನಿಸಿದ್ದಾನೆ.

೩. ವಿಡಿಯೋ ಪ್ರಸಾರವಾದ ನಂತರ ಸಾಮಾಜಿಕ ಜಾಲತಾಣಗಳಲ್ಲಿ ತೀವ್ರ ಪ್ರತಿಕ್ರಿಯೆಗಳು ವ್ಯಕ್ತವಾಗಿವೆ. ಅನೇಕರು ಇದನ್ನು ‘ಜನಾಂಗೀಯ ನಿಂದನೆ’ ಮತ್ತು ‘ಪ್ರಚೋದನಕಾರಿ’ ಎಂದು ಕರೆದಿದ್ದಾರೆ. ಭಾರತೀಯ ಸಮುದಾಯವು ಅಮೇರಿಕಾದಲ್ಲಿ ಉನ್ನತ ಶಿಕ್ಷಣ ಪಡೆದು ಕಠಿಣ ಪರಿಶ್ರಮ ಮತ್ತು ಕಾನೂನುಬದ್ಧ ಮಾರ್ಗಗಳ ಮೂಲಕ ತಮ್ಮದೇ ಆದ ಗುರುತನ್ನು ನಿರ್ಮಿಸಿಕೊಳ್ಳುತ್ತಿದೆ, ಆದ್ದರಿಂದ ಇಂತಹ ಟೀಕೆಗಳು ತಪ್ಪು ಮತ್ತು ಆಕ್ಷೇಪಾರ್ಹವಾಗಿವೆ ಎಂದು ಜನರು ಹೇಳುತ್ತಿದ್ದಾರೆ.