ಸೈಬರ್ ಅಪರಾಧಿಗಳ ಪ್ರಮುಖ ಗುರಿ ಭಾರತ ! – ‘ಮೆಟಾ’ ವರದಿ

ನವ ದೆಹಲಿ – ‘ಮೆಟಾ’ ಸಂಸ್ಥೆಯ 2026ರ ಹೊಸ ವರದಿಯ ಪ್ರಕಾರ, ಸೈಬರ್ ವಂಚನೆಗೆ ಅತಿ ಹೆಚ್ಚು ಗುರಿಯಾಗುತ್ತಿರುವ ದೇಶಗಳಲ್ಲಿ ಭಾರತವೂ ಒಂದಾಗಿದೆ. ಇದರಲ್ಲಿ ಪ್ರಮುಖವಾಗಿ ‘ಎಐ’ (ಆರ್ಟಿಫಿಶಿಯಲ್ ಇಂಟೆಲಿಜೆನ್ಸ್ – ಕೃತಕ ಬುದ್ಧಿಮತ್ತೆ) ಬಳಸಿ ದೊಡ್ಡ ಪ್ರಮಾಣದಲ್ಲಿ ಹಗರಣಗಳು ನಡೆಯುತ್ತಿರುವುದು ಕಂಡುಬರುತ್ತಿದೆ.

ಎಐ ಮೂಲಕ ನಡೆಯುವ ಹಗರಣಗಳನ್ನು ಗುರುತಿಸುವುದು ಅತ್ಯಂತ ಕಠಿಣ

ವರದಿಯ ಪ್ರಕಾರ, ಸೈಬರ್ ಹಗರಣಗಳಿಗಾಗಿ ಸಾಮಾಜಿಕ ಮಾಧ್ಯಮಗಳನ್ನು ವ್ಯಾಪಕವಾಗಿ ದುರ್ಬಳಕೆ ಮಾಡಿಕೊಳ್ಳಲಾಗುತ್ತಿದೆ. ಇದರೊಂದಿಗೆ ಸಂಘಟಿತ ಅಪರಾಧ ಗುಂಪುಗಳು ಒಂದು ವ್ಯವಹಾರದ ಮಾದರಿಯಲ್ಲಿ ಈ ಹಗರಣಗಳನ್ನು ನಡೆಸುತ್ತಿವೆ. ಎಐ ಸಹಾಯದಿಂದ ನಕಲಿ ಸಂಭಾಷಣೆ, ಇ-ಮೇಲ್ ಮತ್ತು ಜಾಲತಾಣಗಳನ್ನು ಸೃಷ್ಟಿಸಲಾಗುತ್ತಿದೆ. ಹಾಗೆಯೇ ವಿವಿಧ ಭಾಷೆಗಳಲ್ಲಿ ವಂಚನೆಯ ಸಂದೇಶಗಳನ್ನು ಸುಲಭವಾಗಿ ರಚಿಸಲಾಗುತ್ತಿದೆ. ಇದರ ಜೊತೆಗೆ ಸಂಪೂರ್ಣ ನಕಲಿ ವ್ಯವಹಾರದ ಜಾಲವನ್ನು ರೂಪಿಸಿ ಜನರನ್ನು ವಂಚಿಸಲಾಗುತ್ತಿದೆ. ಹೀಗಾಗಿ, ಎಐ ಮೂಲಕ ನಡೆಯುವ ಹಗರಣಗಳನ್ನು ಪತ್ತೆಹಚ್ಚುವುದು ಈಗ ಬಹಳ ಕಠಿಣವಾಗುತ್ತಿದೆ.

ವಿದೇಶಗಳಿಂದ ನಡೆಯುತ್ತಿವೆ ಸೈಬರ್ ಹಗರಣಗಳು

ವರದಿಯಲ್ಲಿ ಉಲ್ಲೇಖಿಸಿರುವಂತೆ ‘ನ್ಯೂಡಿಫೈ ಆಪ್ಸ್’ (Nudify Apps) ಹೆಸರಿನ ಎಐ ಬಗ್ಗೆ ಗಂಭೀರ ಎಚ್ಚರಿಕೆ ನೀಡಲಾಗಿದೆ. ಈ ಆಪ್‌ಗಳ ಮೂಲಕ ವ್ಯಕ್ತಿಯೊಬ್ಬರ ನಕಲಿ ಅಶ್ಲೀಲ ಚಿತ್ರ ಅಥವಾ ವಿಡಿಯೋಗಳನ್ನು ಸುಲಭವಾಗಿ ಸೃಷ್ಟಿಸಲಾಗುತ್ತದೆ. ‘ಡೀಪ್‌ಫೇಕ್’ (ಎಐ ಬಳಸಿ ಸೃಷ್ಟಿಸಿದ ನಕಲಿ ಚಿತ್ರ, ವಿಡಿಯೋ ಅಥವಾ ಧ್ವನಿ. ಇದು ನೈಜವಾಗಿ ಕಾಣುತ್ತದೆ, ಆದರೆ ವಾಸ್ತವದಲ್ಲಿ ನಕಲಿಯಾಗಿರುತ್ತದೆ) ತಂತ್ರಜ್ಞಾನದಿಂದಾಗಿ ಸೈಬರ್ ಅಪರಾಧಗಳ ಸ್ವರೂಪವು ಹೆಚ್ಚು ಅಪಾಯಕಾರಿಯಾಗಿದೆ. ಇದರಿಂದಾಗಿಯೇ, ಇರಾನ್, ಪಾಕಿಸ್ತಾನ, ರಷ್ಯಾ ಮತ್ತು ಚೀನಾದಂತಹ ದೇಶಗಳಿಗೆ ಸಂಬಂಧಿಸಿದ ನೆಟ್‌ವರ್ಕ್‌ಗಳಿಂದ ಕೆಲವು ಸೈಬರ್ ಕಾರ್ಯಾಚರಣೆಗಳು ನಡೆಯುತ್ತಿರುವುದು ಮೆಟಾದ ತನಿಖೆಯಲ್ಲಿ ಕಂಡುಬಂದಿದೆ.

ಎಐ ಆಧಾರಿತ ವಂಚನೆಗಳನ್ನು ತಡೆಯಲು ಹೊಸ ಕಾನೂನುಗಳು ಅಗತ್ಯ

ತಜ್ಞರ ಪ್ರಕಾರ, ಈ ನಿಟ್ಟಿನಲ್ಲಿ ಕೇವಲ ಕಠಿಣ ಕಾನೂನುಗಳನ್ನು ಜಾರಿಗೆ ತಂದರೆ ಮಾತ್ರ ಸಾಲದು, ಬದಲಿಗೆ ಎಲ್ಲರಲ್ಲಿಯೂ ಡಿಜಿಟಲ್ ಸಾಕ್ಷರತೆಯನ್ನು ಹೆಚ್ಚಿಸುವುದು ಅತ್ಯಗತ್ಯವಾಗಿದೆ. ಕೇವಲ ಇಷ್ಟಕ್ಕೇ ಸೀಮಿತವಾಗದೆ, ಎಐ ಆಧಾರಿತ ವಂಚನೆಗಳನ್ನು ತಡೆಗಟ್ಟಲು ಹೊಸ ಕಾನೂನುಗಳನ್ನು ರೂಪಿಸುವುದು ಕೂಡ ಈಗ ಅಷ್ಟೇ ಅವಶ್ಯಕವಾಗಿದೆ.