೧೫ ದಿನಗಳ ಒಳಗೆ ಗೋರಿ ತೆರವುಗೊಳಿಸಿ; ಇಲ್ಲದಿದ್ದರೆ ವಿಶ್ವವಿದ್ಯಾಲಯದ ಆಡಳಿತ ಮಂಡಳಿಯಿಂದಲೇ ಕ್ರಮ!

ಲಕ್ಷ್ಮಣಪುರಿ (ಉತ್ತರಪ್ರದೇಶ): ಅತಿಕ್ರಮಣ ಮಾಡಿ ನಿರ್ಮಿಸಲಾಗಿದ್ದ ಮಜಾರ್ (ಗೋರಿ) ತೆರವುಗೊಳಿಸಲು ನೋಟಿಸ್!

(ಮಜಾರ್ ಎಂದರೆ ಇಸ್ಲಾಮಿ ಪೀರ್ ಅಥವಾ ಫಕೀರರ ಗೋರಿ)

ಲಕ್ಷ್ಮಣಪುರಿ (ಉತ್ತರಪ್ರದೇಶ) – ಇಲ್ಲಿನ ಚೌಕ್ ಪ್ರದೇಶದಲ್ಲಿರುವ ‘ಕ್ವೀನ್ ಮೇರಿ’ ಆಸ್ಪತ್ರೆಯ ಪಕ್ಕದಲ್ಲಿ ಅತಿಕ್ರಮಣ ಮಾಡಿ ನಿರ್ಮಿಸಲಾಗಿರುವ ಗೋರಿಯನ್ನು ತೆರವುಗೊಳಿಸುವಂತೆ ‘ಕಿಂಗ್ ಜಾರ್ಜ್ ಮೆಡಿಕಲ್ ಯೂನಿವರ್ಸಿಟಿ’ಯ ಆಡಳಿತ ಮಂಡಳಿಯು ಗೋರಿಯ ಉಸ್ತುವಾರಿ ನೋಡಿಕೊಳ್ಳುತ್ತಿರುವ ಮುಸಲ್ಮಾನ ಕುಟುಂಬಕ್ಕೆ ನೋಟಿಸ್ ನೀಡಿದೆ. ಈ ನೋಟಿಸ್ ನಲ್ಲಿ ‘ಮಜಾರ್(ಗೋರಿ) ತೆರವುಗೊಳಿಸಲು ೧೫ ದಿನಗಳ ಕಾಲಾವಕಾಶ ನೀಡಲಾಗಿದೆ. ಸಂಬಂಧಪಟ್ಟವರು ಸ್ವತಃ ಮಜಾರ್ (ಗೋರಿ) ತೆರವುಗೊಳಿಸದಿದ್ದರೆ ಕಿಂಗ್ ಜಾರ್ಜ್ ಮೆಡಿಕಲ್ ಯೂನಿವರ್ಸಿಟಿಯ ಆಡಳಿತ ಮಂಡಳಿಯೇ ಅದನ್ನು ತೆರವುಗೊಳಿಸಲಿದೆ. ಈ ಮಜಾರ್(ಗೋರಿ) ಅನ್ನು ಅತಿಕ್ರಮಣ ಮಾಡಿ ನಿರ್ಮಿಸಲಾಗಿದೆ’ ಎಂದು ತಿಳಿಸಲಾಗಿದೆ. ಒಂದು ವೇಳೆ ಆಡಳಿತ ಮಂಡಳಿಯೇ ಈ ಕ್ರಮ ಕೈಗೊಂಡರೆ, ಅದರ ಸಂಪೂರ್ಣ ವೆಚ್ಚವನ್ನು ಸಂಬಂಧಪಟ್ಟವರಿಂದಲೇ ವಸೂಲಿ ಮಾಡಲಾಗುವುದು ಎಂದು ಸ್ಪಷ್ಟಪಡಿಸಲಾಗಿದೆ.

ಮಜಾರ್ ಉಸ್ತುವಾರಿ ನೋಡಿಕೊಳ್ಳುವ ಮುಜಾವಿರ್ ಮಹಮ್ಮದ್ ಶಕೀಲ್ ಅವರು ಮಾತನಾಡಿ, ಇದು ಶೇಖ್ ಫರೀದುಲ್ ಹಕ್ ಶಾ ಅವರ ಮಜಾರ್ ಆಗಿದೆ. ನಾವು ಅನೇಕ ವರ್ಷಗಳಿಂದ ಈ ಮಜಾರ್ ಸೇವೆ ಮಾಡುತ್ತಿದ್ದೇವೆ. ಪ್ರತಿ ವರ್ಷ ಇಲ್ಲಿ ಉರುಸ್ (ಉರುಸ್ ಎಂದರೆ ಮುಸಲ್ಮಾನ ಧರ್ಮಗುರುಗಳ ಪುಣ್ಯತಿಥಿಯ ಅಂಗವಾಗಿ ಆಯೋಜಿಸುವ ಉತ್ಸವ) ನಡೆಯುತ್ತದೆ ಮತ್ತು ಅದಕ್ಕಾಗಿ ಸರಕಾರದಿಂದ ಅನುಮತಿಯನ್ನೂ ನೀಡಲಾಗುತ್ತದೆ ಎಂದು ಹೇಳಿದ್ದಾರೆ. ನೋಟಿಸ್ ನೀಡಿರುವ ಕಿಂಗ್ ಜಾರ್ಜ್ ಮೆಡಿಕಲ್ ಯೂನಿವರ್ಸಿಟಿಯ ನೋಡಲ್ ಅಧಿಕಾರಿ ಪ್ರೊಫೆಸರ್ ಕೆ.ಕೆ. ಸಿಂಗ್ ಅವರು, ಮಜಾರ್ ತೆರವುಗೊಳಿಸುವ ಬಗ್ಗೆ ಒಂದೂವರೆ ವರ್ಷದ ಹಿಂದೆಯೇ ಕುಲಪತಿಗಳು ಆದೇಶ ನೀಡಿದ್ದರು. ಈ ಮಜಾರ್ ೪೦ ವರ್ಷ ಹಳೆಯದಾಗಿದೆ ಎಂದು ಸ್ಪಷ್ಟಪಡಿಸಿದ್ದಾರೆ. (ಹಾಗಾದರೆ ಇಷ್ಟು ವರ್ಷಗಳ ಕಾಲ ವಿಶ್ವವಿದ್ಯಾಲಯದ ಆಡಳಿತ ಮಂಡಳಿ ಏನು ಮಾಡುತ್ತಿತ್ತು? – ಸಂಪಾದಕರು)