ಕಳೆದ ಐದೂವರೆ ವರ್ಷಗಳಲ್ಲಿ ಸಾರ್ವಜನಿಕ ಬ್ಯಾಂಕುಗಳಿಂದ ೬ ಲಕ್ಷ ಕೋಟಿ ರೂಪಾಯಿ ಸಾಲ ಮನ್ನಾ : Public Sector Bank Loan Waiver

ನವದೆಹಲಿ – ಭಾರತೀಯ ರಿಸರ್ವ್ ಬ್ಯಾಂಕ್ ನ ಅಂಕಿ ಅಂಶಗಳ ಪ್ರಕಾರ ಕಳೆದ ಐದೂವರೆ ವರ್ಷಗಳಲ್ಲಿ ಸಾರ್ವಜನಿಕ ವಲಯದ ಬ್ಯಾಂಕುಗಳು ಒಟ್ಟು ೬ ಲಕ್ಷ ೧೫ ಸಾವಿರದ ೬೪೭ ಕೋಟಿ ರೂಪಾಯಿಗಳ ಒಟ್ಟು ಸಾಲದ ಮೊತ್ತವನ್ನು ಮನ್ನಾ ಮಾಡಿವೆ, ಎಂದು ಕೇಂದ್ರ ಹಣಕಾಸು ರಾಜ್ಯ ಸಚಿವ ಪಂಕಜ್ ಚೌಧರಿ ಅವರು ಲೋಕಸಭೆಯಲ್ಲಿ ಲಿಖಿತ ಉತ್ತರದಲ್ಲಿ ತಿಳಿಸಿದರು. ಈ ಬ್ಯಾಂಕುಗಳು ಏಪ್ರಿಲ್ ೧, ೨೦೨೨ ರಿಂದ ಸೆಪ್ಟೆಂಬರ್ ೩೦, ೨೦೨೫ ರ ಅವಧಿಯಲ್ಲಿ ಷೇರುಗಳು ಮತ್ತು ಡಿಬೆಂಚರ್‌ಗಳ ಮೂಲಕ ಮಾರುಕಟ್ಟೆಯಿಂದ ೧ ಲಕ್ಷ ೭೯ ಸಾವಿರ ಕೋಟಿ ರೂಪಾಯಿ ಬಂಡವಾಳವನ್ನು ಸಂಗ್ರಹಿಸಿವೆ ಎಂದು ಸಚಿವ ಚೌಧರಿ ಅವರು ತಿಳಿಸಿದರು. ೨೦೨೨-೨೩ ರ ಆರ್ಥಿಕ ವರ್ಷದಿಂದ ಸರಕಾರವು ಸಾರ್ವಜನಿಕ ವಲಯದ ಬ್ಯಾಂಕುಗಳಲ್ಲಿ ಯಾವುದೇ ಬಂಡವಾಳ ಹೂಡಿಕೆ ಮಾಡಿಲ್ಲ, ಎಂದೂ ಅವರು ಹೇಳಿದರು.

ಸೆಪ್ಟೆಂಬರ್ ೨೦೨೫ ರವರೆಗೆ ಕಳೆದ ನಾಲ್ಕೂವರೆ ವರ್ಷಗಳಲ್ಲಿ, ೩ ಸಾವಿರದ ೫೮೮ ಕೋಟಿ ೨೨ ಲಕ್ಷ ರೂಪಾಯಿಗಳ ವಂಚನೆಯ ೫ ಲಕ್ಷ ೮೩ ಸಾವಿರದ ೨೯೧ ಪ್ರಕರಣಗಳು ದಾಖಲಾಗಿವೆ. ಈ ಪೈಕಿ ೨೩೮ ಕೋಟಿ ೮೩ ಲಕ್ಷ ರೂಪಾಯಿಗಳನ್ನು ವಸೂಲಿ ಮಾಡಲಾಗಿದೆ ಎಂದು ಸಚಿವ ಚೌಧರಿ ಅವರು ಮಾಹಿತಿ ನೀಡಿದರು.