ಸ್ವಾಮಿನಾರಾಯಣ ಮಂದಿರಕ್ಕೆ ಭೇಟಿ ನೀಡಿದ ಬ್ರಿಟನ್‌ನ ರಾಜ ಚಾರ್ಲ್ಸ್ ತೃತೀಯ ಮತ್ತು ರಾಣಿ ಕ್ಯಾಮಿಲ್ಲಾ

ಲಂಡನ್ – ಬ್ರಿಟನ್ನಿನ ರಾಜ ಚಾರ್ಲ್ಸ್ ತೃತೀಯ ಮತ್ತು ಅವರ ಪತ್ನಿ ರಾಣಿ ಕ್ಯಾಮಿಲ್ಲಾ ಅವರು ಇತ್ತೀಚೆಗೆ ನಗರದ ಬಿ.ಎ.ಪಿ.ಎಸ್. (ಬೋಚಾಸನವಾಸಿ ಶ್ರೀ ಅಕ್ಷರ ಪುರುಷೋತ್ತಮ ಸ್ವಾಮಿ ನಾರಾಯಣ ಸಂಸ್ಥಾ) ಸ್ವಾಮಿನಾರಾಯಣ ಮಂದಿರಕ್ಕೆ ಭೇಟಿ ನೀಡಿದರು. ದೀಪಾವಳಿ ಮತ್ತು ಮಂದಿರದ 30ನೇ ವಾರ್ಷಿಕೋತ್ಸವದ ನಿಮಿತ್ತ ಅವರು ಮಂದಿರಕ್ಕೆ ಭೇಟಿ ನೀಡಿದರು. 1995 ರಿಂದ ಇಂದಿನವರೆಗೂ ಈ ಮಂದಿರವು ವಿದೇಶದಲ್ಲಿರುವ ಹಿಂದೂಗಳಿಗೆ ಒಂದು ಪ್ರಮುಖ ಸ್ಥಳವಾಗಿದ್ದು, ಅನೇಕ ಜನರು ಈ ಮಂದಿರಕ್ಕೆ ಭೇಟಿ ನೀಡುತ್ತಾರೆ. ಈ ಮಂದಿರವು ಲಂಡನ್ ನಲ್ಲಿ ‘ನೀಸ್‌ಡೆನ್ ಮಂದಿರ’ ಎಂಬ ಹೆಸರಿನಿಂದ ಪರಿಚಿತವಾಗಿದೆ.

ರಾಜ ಚಾರ್ಲ್ಸ್ ತೃತೀಯ ಮತ್ತು ರಾಣಿ ಕ್ಯಾಮಿಲ್ಲಾ ಅವರ ಮಂದಿರ ಭೇಟಿಯ ವೇಳೆ, ಮಂದಿರದ ಟ್ರಸ್ಟಿ ಮಂಡಳಿಯ ಅಧ್ಯಕ್ಷರಾದ ಜಿತುಭಾಯಿ ಪಟೇಲ್ ಅವರು ರಾಜರನ್ನು ಸ್ವಾಗತಿಸಿದರು. ಈ ವೇಳೆ, ರಾಜ ಚಾರ್ಲ್ಸ್ ಮತ್ತು ರಾಣಿ ಕ್ಯಾಮಿಲ್ಲಾ ಅವರು ಮಂದಿರದ ಕಾರ್ಯಗಳ ಕುರಿತು ಮಾಹಿತಿ ಪಡೆದುಕೊಂಡರು. ಸೆಪ್ಟೆಂಬರ್ 2026 ರಲ್ಲಿ ಫ್ರಾನ್ಸ್‌ ನಲ್ಲಿ ಉದ್ಘಾಟನೆಯಾಗಲಿರುವ ಸ್ವಾಮಿನಾರಾಯಣ ಮಂದಿರದ ಕುರಿತು ಸಹ ಅವರು ಮಾಹಿತಿ ಪಡೆದರು. ಫ್ರಾನ್ಸ್‌ ನಲ್ಲಿ ನಿರ್ಮಾಣವಾಗುತ್ತಿರುವ ಹಿಂದೂ ಮಂದಿರವು ಅಲ್ಲಿನ ಮೊದಲ ಸಾಂಪ್ರದಾಯಿಕ ಹಿಂದೂ ಮಂದಿರವಾಗಲಿದೆ.