ಸಂತರ ಧೈರ್ಯದ ಮುಂದೆ ಸನಾತನ ಧರ್ಮವಿರೋಧಿಗಳ ಸೋಲು ! – ಮುಖ್ಯಮಂತ್ರಿ ಯೋಗಿ

ಪ್ರಯಾಗರಾಜ ಕುಂಭಮೇಳ 2025

ಮೌನಿ ಅಮವಾಸ್ಯೆಯಂದು ಸಂಭವಿಸಿದ ದುರಂತವನ್ನು ಎದುರಿಸಿದ ಕೀರ್ತಿ ಸಂತರಿಗೆ ಸಲ್ಲುತ್ತದೆ

ಪ್ರಯಾಗರಾಜ್ – ಮೌನಿ ಅಮವಾಸ್ಯೆಯ ದಿನದಂದು ನಡೆದ ದುರಂತದಲ್ಲಿ ಸಂತರು ತೋರಿಸಿದ ಧೈರ್ಯದಿಂದ ಸನಾತನ ಧರ್ಮದ ವಿರೋಧಿಗಳು ಸೋತರು ಎಂದು ಉತ್ತರ ಪ್ರದೇಶ ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥ ಇವರು ಹೇಳಿದ್ದಾರೆ. ಮಹಾಕುಂಭ ಕ್ಷೇತ್ರದ ಸೆಕ್ಟರ್ 22 ರಲ್ಲಿ ಸಂತೋಷ ದಾಸ್ ಸತುವಾ ಬಾಬಾ ಮತ್ತು ಸ್ವಾಮಿ ರಾಮ ಕಮಲಾಚಾರ್ಯ ಈ ಸಂತರ ಪಟ್ಟಾಭಿಷೇಕ ಸಮಾರಂಭದಲ್ಲಿ ಅವರು ಮಾತನಾಡುತ್ತಿದ್ದರು. ತುಳಸಿ ಪೀಠಾಧೀಶ್ವರ ಜಗದ್ಗುರು ಸ್ವಾಮಿ ರಾಮಭದ್ರಾಚಾರ್ಯರು ಇಬ್ಬರೂ ಸಂತರನ್ನು ಜಗದ್ಗುರು ಹುದ್ದೆಗೆ ನಾಮನಿರ್ದೇಶನ ಮಾಡಿದರು. ಜಗದ್ಗುರು ಸ್ವಾಮಿ ರಾಮಭದ್ರಾಚಾರ್ಯರು, ರಾಮ ಕಮಲಾಚಾರ್ಯ ಮಹಾರಾಜ ಅವರನ್ನು ಇನ್ನು ಮುಂದೆ ‘ಜಗದ್ಗುರು ಸ್ವಾಮಿ ರಾಮ ಕಮಲಾಚಾರ್ಯ ಮಹಾರಾಜ್’ ಮತ್ತು ಸಂತೋಷ ದಾಸ್ ಅವರನ್ನು ‘ಜಗದ್ಗುರು ವಿಷ್ಣು ಸ್ವಾಮಿ ಸಂತೋಷ ದಾಸ ಮಹಾರಾಜ್ ಸತುವಾ ಬಾಬಾ’ ಎಂದು ಕರೆಯಲಾಗುತ್ತದೆ ಎಂದು ಘೋಷಿಸಿದರು. ಈ ಸಂದರ್ಭದಲ್ಲಿ ಮುಖ್ಯಮಂತ್ರಿಗಳು ಸಂತರ ಆಶೀರ್ವಾದ ಪಡೆದು, ಹೊಸದಾಗಿ ನೇಮಕಗೊಂಡ ಜಗದ್ಗುರುಗಳಿಗೆ ಶುಭ ಹಾರೈಸಿದರು.

ಮುಖ್ಯಮಂತ್ರಿಗಳು ಮಾತು ಮುಂದುವರೆಸುತ್ತಾ, “ಮೌನಿ ಅಮವಾಸ್ಯೆಯ ದಿನದಂದು ನಡೆದ ಘಟನೆಯಲ್ಲಿ ಸಂತರು ಅಪಾರ ಧೈರ್ಯವನ್ನು ತೋರಿಸಿದರು. ಕೆಲವು ಸಂತರು ಅಪಘಾತಗಳಲ್ಲಿ ತಮ್ಮ ಪ್ರಾಣವನ್ನು ಕಳೆದುಕೊಂಡರು; ಆದರೆ ಆ ಸನ್ನಿವೇಶದಲ್ಲಿ, ನಮ್ಮ ಸಂತರು ರಕ್ಷಕನ ಪಾತ್ರದಲ್ಲಿ ಕಾಣಿಸಿಕೊಂಡರು. ಒಂದು ಕುಟುಂಬವು ಬಿಕ್ಕಟ್ಟನ್ನು ಎದುರಿಸಿದಾಗ, ಕುಟುಂಬದ ಮುಖ್ಯಸ್ಥನು ಹೆದರುವುದಿಲ್ಲ, ಹಾಗೆಯೇ ಈ ಸಂತರು ಸಹ ಬಿಕ್ಕಟ್ಟಿನ ಸಂದರ್ಭದಲ್ಲಿ ದೃಢವಾಗಿ ನಿಂತು ಎಲ್ಲರಿಗೂ ಮಾರ್ಗದರ್ಶನ ನೀಡಿದರು. ಪ್ರತಿಕೂಲ ಸಂದರ್ಭಗಳಲ್ಲಿಯೂ ಧೈರ್ಯದಿಂದ ಸವಾಲುಗಳನ್ನು ಎದುರಿಸುವ ಮೂಲಕ ಈ ಅಭಿಯಾನವನ್ನು ಮುಂದುವರಿಸಬೇಕು; ಏಕೆಂದರೆ ಸನಾತನ ಧರ್ಮವು ಮಾನವೀಯತೆಯ ಧರ್ಮವಾಗಿದೆ. ಸನಾತನ ಉಳಿದರೆ, ಮಾನವ ಧರ್ಮ ಉಳಿಯುತ್ತದೆ. ನೀವೆಲ್ಲ ಸಂತರು ಸನಾತನ ಧರ್ಮದ ಆಧಾರಸ್ತಂಭಗಳಾಗಿದ್ದೀರಿ. ಸನಾತನ ಧರ್ಮದ ವಿರೋಧಿಗಳು ಸಂತರ ಧೈರ್ಯವನ್ನು ದುರ್ಬಲಗೊಳಿಸಲು ಪ್ರಯತ್ನಿಸಿದರು ಮತ್ತು ಪ್ರಪಂಚದಾದ್ಯಂತ ಹಿಂದೂ ಧರ್ಮವನ್ನು ನಗೆಪಾಟಲಿಗೆ ಈಡುಮಾಡಲು ಪ್ರಯತ್ನಿಸಿದರು; ಆದರೆ ಸಂತರಿಂದಾಗಿ ಅವರು ಯಶಸ್ವಿಯಾಗಲು ಸಾಧ್ಯವಾಗಲಿಲ್ಲ.” ಎಂದು ಹೇಳಿದರು.