​‘ಹಿಂದೂಸ್ತಾನ್ ಯೂನಿಲಿವರ್ ಲಿಮಿಟೆಡ್’ ಸಂಸ್ಥೆಗೆ ಗ್ರಾಹಕನಿಗೆ ೫೦ ಸಾವಿರ ರೂಪಾಯಿ ನಷ್ಟ ಪರಿಹಾರ ನೀಡುವಂತೆ ಆದೇಶ : Hindustan Unilever Compensation

ಡೆಹ್ರಾಡೂನ್ (ಉತ್ತರಾಖಂಡ) – ‘ಉತ್ತರಾಖಂಡ ರಾಜ್ಯ ಗ್ರಾಹಕರ ವ್ಯಾಜ್ಯಗಳ ಪರಿಹಾರ ಆಯೋಗ’ವು ‘ಹಿಂದೂಸ್ತಾನ್ ಯೂನಿಲಿವರ್ ಲಿಮಿಟೆಡ್’ ಸಂಸ್ಥೆಗೆ ಪ್ಯಾಕೆಟ್ ಮೇಲೆ ೯೦ ಗ್ರಾಂ ತೂಕವನ್ನು ಮುದ್ರಿಸಿ ವಾಸ್ತವವಾಗಿ ೭೦ ಗ್ರಾಂ ‘ಡಿಟರ್ಜೆಂಟ್ ಪೌಡರ್’ ಮಾರಾಟ ಮಾಡಿದ ಪ್ರಕರಣದಲ್ಲಿ ದೋಷಿ ಎಂದು ತೀರ್ಮಾನಿಸಿ ಗ್ರಾಹಕನಿಗೆ ೫೦ ಸಾವಿರ ರೂಪಾಯಿಗಳ ನಷ್ಟಪರಿಹಾರ ನೀಡುವಂತೆ ಆದೇಶಿಸಿದೆ.

ಸೆಪ್ಟೆಂಬರ್ ೨೦೨೦ ರಲ್ಲಿ ನೈನಿತಾಲ್ ಜಿಲ್ಲೆಯ ರಾಮನಗರದ ನಿವಾಸಿ ಜ್ಞಾನಚಂದ್ರ ಗರ್ಗ್ ಅವರು ೫೧೨ ರೂಪಾಯಿಗೆ ‘ಸರ್ಫ್ ಎಕ್ಸೆಲ್ ಇಡಬ್ಲ್ಯೂ’ನ ಒಂದು ಬಾಕ್ಸ್ ಖರೀದಿಸಿದ್ದರು. ಅವರು ಇದರಲ್ಲಿನ ಪ್ಯಾಕೆಟ್‌ಗಳ ತೂಕವನ್ನು ಪರಿಶೀಲಿಸಿದಾಗ, ಪ್ಯಾಕೆಟ್ ಮೇಲೆ ೯೦ ಗ್ರಾಂ ಎಂದು ಬರೆದಿದ್ದರೂ ವಾಸ್ತವವಾಗಿ ಅದರಲ್ಲಿ ೭೦ ಗ್ರಾಂ ಡಿಟರ್ಜೆಂಟ್ ಕಂಡುಬಂದಿದೆ. ಈ ವಂಚನೆಯ ವಿರುದ್ಧ ಅವರು ಮೊದಲು ಸಂಸ್ಥೆಗೆ ಕಾನೂನು ನೋಟಿಸ್ ಕಳುಹಿಸಿದರು ಮತ್ತು ನಂತರ ‘ನೈನಿತಾಲ್ ಜಿಲ್ಲಾ ಗ್ರಾಹಕ ವೇದಿಕೆ’ಗೆ ದೂರು ನೀಡಿ ೧ ಲಕ್ಷ ರೂಪಾಯಿ ಪರಿಹಾರಕ್ಕೆ ಆಗ್ರಹಿಸಿದರು. ಜಿಲ್ಲಾ ವೇದಿಕೆಯ ವಿಚಾರಣೆಯ ಸಮಯದಲ್ಲಿ ಸಂಸ್ಥೆಯ ವಕೀಲರ ಸಮ್ಮುಖದಲ್ಲೇ ಆ ಸೀಲ್ ಮಾಡಿದ ಪ್ಯಾಕೆಟ್ ಅನ್ನು ಎಲೆಕ್ಟ್ರಾನಿಕ್ ತೂಕದ ಯಂತ್ರದಲ್ಲಿ ತೂಗಿದಾಗ, ಅದರ ತೂಕ ೭೦ ಗ್ರಾಮ್ ಮಾತ್ರ ಇತ್ತು. ಈ ಕುರಿತು ಸಂಸ್ಥೆಯ ವಕೀಲರು ಯಾವುದೇ ಆಕ್ಷೇಪ ಎತ್ತಲು ಸಾಧ್ಯವಾಗಲಿಲ್ಲ.