ಜಮ್ಮು-ಕಾಶ್ಮೀರ ವಿಧಾನಸಭೆಯಲ್ಲಿ ಭಾರಿ ಗದ್ದಲದ ನಡುವೆ ಕಲಂ 370 ಅನ್ನು ಮರುಸ್ಥಾಪಿಸುವ ಪ್ರಸ್ತಾಪನೆಯ ಅಂಗೀಕಾರ

ಶ್ರೀನಗರ (ಜಮ್ಮು-ಕಾಶ್ಮೀರ) – ಉಪಮುಖ್ಯಮಂತ್ರಿ ಸುರಿಂದರ ಚೌಧರಿ ಅವರು ಕಲಂ 370 ಅನ್ನು ಮರುಸ್ಥಾಪಿಸಲು ಆಗ್ರಹಿಸುವ ನಿರ್ಣಯವನ್ನು ಮಂಡಿಸಿದ ನಂತರ, ಜಮ್ಮು-ಕಾಶ್ಮೀರ ವಿಧಾನಸಭೆಯಲ್ಲಿ ಮೂರನೇ ದಿನವೂ ಗದ್ದಲವಾಯಿತು. ಪ್ರಚಂಡ ಗದ್ದಲದ ಬಳಿಕ ಈ ಪ್ರಸ್ತಾವನೆಯನ್ನು ವಿಧಾನಸಭೆಯಲ್ಲಿ ಅಂಗೀಕರಿಸಲಾಯಿತು. ಭಾಜಪ ಶಾಸಕ ಹಾಗೂ ವಿರೋಧ ಪಕ್ಷದ ನಾಯಕ, ಸುನಿಲ್ ಶರ್ಮಾ ಅವರು ಈ ನಿರ್ಣಯವನ್ನು ಬಲವಾಗಿ ವಿರೋಧಿಸಿದರು. `ಉಪರಾಜ್ಯಪಾಲರ ಭಾಷಣವನ್ನು ಚರ್ಚಿಸುವ ಕೆಲಸವಿರುವಾಗ ಈ ಪ್ರಸ್ತಾವನೆಯನ್ನು ಹೇಗೆ ಮಂಡಿಸಲಾಯಿತು ?’, ಎಂದು ಅವರು ಪ್ರಶ್ನಿಸಿದರು. ಪಕ್ಷಾತೀತ ಶಾಸಕರಾದ ಶೇಖ್ ಖುರ್ಷಿದ್ ಮತ್ತು ಶಬ್ಬೀರ್ ಕುಲ್ಲೆ, ಪೀಪಲ್ಸ್ ಕಾನ್ಫರೆನ್ಸ್ ಪಕ್ಷದ ಮುಖ್ಯಸ್ಥ ಸಜ್ಜದ್ ಲೋನ್ ಮತ್ತು ಪಾಪ್ಯುಲರ್ ಡೆಮಾಕ್ರಟಿಕ್ ಪಕ್ಷದ ಮೂವರು ಶಾಸಕರು ಈ ಠರಾವನ್ನು ಬೆಂಬಲಿಸಿದರು.

ಪ್ರಸ್ತಾವನೆ ಏನು?

ಸರಕಾರ ಮಂಡಿಸಿದ ಪ್ರಸ್ತಾವನೆಯಲ್ಲಿ, ಈ ವಿಧಾನಸಭೆ ಜಮ್ಮು ಮತ್ತು ಕಾಶ್ಮೀರದ ಜನರ ಗುರುತು, ಸಂಸ್ಕೃತಿ ಮತ್ತು ಹಕ್ಕುಗಳನ್ನು ರಕ್ಷಿಸುವ ವಿಶೇಷ ಮತ್ತು ಸಂವಿಧಾನಾತ್ಮಕ ಭರವಸೆಯ ಮಹತ್ವಕ್ಕೆ ಒತ್ತು ನೀಡುತ್ತದೆ, ಹಾಗೆಯೇ ಈ ಭರವಸೆಯನ್ನು ಏಕಪಕ್ಷೀಯವಾಗಿ ತೆಗೆದುಹಾಕಿರುವ ಬಗ್ಗೆ ನಾವು ಚಿಂತೆ ವ್ಯಕ್ತಪಡಿಸುತ್ತೇವೆ. ಈ ವಿಧಾನಸಭೆಯು ಭಾರತ ಸರಕಾರಕ್ಕೆ ವಿಶೇಷ ಸ್ಥಾನಮಾನ, ಸಂವಿಧಾನಾತ್ಮಕ ಭರವಸೆ ಮತ್ತು ಈ ನಿಬಂಧನೆಗಳನ್ನು ಪುನಃ ಸ್ಥಾಪಿಸಲು ಸಂವಿಧಾನಾತ್ಮಕ ಆಡಳಿತವನ್ನು ಕಾರ್ಯಗತಗೊಳಿಸಲು ಜಮ್ಮು ಮತ್ತು ಕಾಶ್ಮೀರದ ಜನರ ಚುನಾಯಿಸಿಲ್ಪಟ್ಟಿರುವ ಪ್ರತಿನಿಧಿಗಳೊಂದಿಗೆ ಸಂವಾದವನ್ನು ಪ್ರಾರಂಭಿಸುವಂತೆ ಆಗ್ರಹಿಸುತ್ತದೆ. ಈ ವಿಧಾನಸಭೆ ಮರುಸ್ಥಾಪನೆಯ ಯಾವುದೇ ಪ್ರಕ್ರಿಯೆಯಲ್ಲಿ, ರಾಷ್ಟ್ರೀಯ ಏಕತೆ ಮತ್ತು ಜಮ್ಮೂ-ಕಾಶ್ಮೀರದ ಜನರ ನ್ಯಾಯಯುತ ಆಕಾಂಕ್ಷೆಗಳನ್ನು ರಕ್ಷಿಸಬೇಕು ಎನ್ನುವುದನ್ನು ಒತ್ತಿ ಹೇಳುತ್ತದೆ ಎಂದು ಹೇಳಲಾಗಿದೆ.