‘ಗೋಲ್ಡನ್ ಟ್ರಯಾಂಗಲ್’ನಲ್ಲಿ ೮೦೦ ಭಾರತೀಯರು ಒತ್ತೆಯಾಳಗಳಲ್ಲಿ ಮಹಾರಾಷ್ಟ್ರದ ೨೫ ಯುವಕರು

ನವದೆಹಲಿ – ಥೈಲ್ಯಾಂಡ್-ಮ್ಯಾನ್ಮಾರ್ ಗಡಿಯ ಕುಖ್ಯಾತ ‘ಗೋಲ್ಡನ್ ಟ್ರಯಾಂಗಲ್’ ಪ್ರದೇಶದ ಸೈಬರ್ ವಂಚಕರ ಅಡ್ಡೆಗಳಲ್ಲಿ ವಿವಿಧ ದೇಶಗಳ ಸುಮಾರು ೫ ಸಾವಿರದ ೩೦೦ ನಾಗರಿಕರನ್ನು ಒತ್ತೆಯಾಳಾಗಿ ಇರಿಸಲಾಗಿದ್ದು, ಅದರಲ್ಲಿ ಸುಮಾರು ೮೦೦ ಭಾರತೀಯ ನಾಗರಿಕರು ಸೇರಿದ್ದಾರೆ. ಮಹಾರಾಷ್ಟ್ರದ ಕನಿಷ್ಠ ೨೫ ಯುವಕರು ಸಹ ಇದರಲ್ಲಿ ಸೇರಿದ್ದಾರೆ. ಬ್ಯಾಂಕಾಕ್‌ನಲ್ಲಿ ಉತ್ತಮ ಸಂಬಳದ ಕೆಲಸದ ಆಮಿಷ ಒಡ್ಡಿ ಅವರನ್ನು ಅಲ್ಲಿಗೆ ಕರೆದೊಯ್ಯಲಾಗಿತ್ತು ಎಂಬ ಮಾಹಿತಿ ಬೆಳಕಿಗೆ ಬಂದಿದೆ.

‘ಸಿವಿಲ್ ಸೊಸೈಟಿ ನೆಟ್‌ವರ್ಕ್ ಫಾರ್ ಹ್ಯೂಮನ್ ಟ್ರಾಫಿಕಿಂಗ್ ವಿಕ್ಟಿಮ್ ಅಸಿಸ್ಟೆನ್ಸ್’ ಸಂಸ್ಥೆ ನೀಡಿರುವ ಮಾಹಿತಿ ಪ್ರಕಾರ, ೫ ಸಾವಿರದ ೩೦೦ ಒತ್ತೆಯಾಳುಗಳಲ್ಲಿ ಚೀನಾದ ೧ ಸಾವಿರದ ೬೦೦ ನಾಗರಿಕರು, ಮ್ಯಾನ್ಮಾರ್‌ನ ೨೦೦, ಥೈಲ್ಯಾಂಡ್‌ನ ೨೦ ನಾಗರಿಕರು, ಹಾಗೆಯೇ ಫಿಲಿಪೈನ್ಸ್, ತೈವಾನ್, ಮಲೇಷ್ಯಾ, ಬ್ರೆಜಿಲ್, ರಷ್ಯಾ, ಕೀನ್ಯಾ, ಉಗಾಂಡಾ, ರವಾಂಡಾ ಮತ್ತು ಜಿಂಬಾಬ್ವೆ ದೇಶಗಳ ನಾಗರಿಕರು ಸೇರಿದ್ದಾರೆ.

ಒತ್ತೆಯಾಳುಗಳ ಬಿಡುಗಡೆಗಾಗಿ ಕೇಂದ್ರ ಮತ್ತು ಮಹಾರಾಷ್ಟ್ರ ಸರಕಾರಗಳ ಪ್ರಯತ್ನ

ಈ ಯುವಕರ ಬಿಡುಗಡೆಗಾಗಿ ಕೇಂದ್ರ ಮತ್ತು ಮಹಾರಾಷ್ಟ್ರ ರಾಜ್ಯ ಸರಕಾರಗಳು ಪ್ರಯತ್ನಗಳನ್ನು ಆರಂಭಿಸಿವೆ. ವಿದೇಶಾಂಗ ಸಚಿವಾಲಯ ಮತ್ತು ಬ್ಯಾಂಕಾಕ್‌ನಲ್ಲಿರುವ ಭಾರತೀಯ ರಾಯಭಾರ ಕಚೇರಿಯೊಂದಿಗೆ ಸಮನ್ವಯ ಸಾಧಿಸಲಾಗುತ್ತಿದ್ದು, ಮಹಾರಾಷ್ಟ್ರದ ಸಚಿವ ಗಿರೀಶ್ ಮಹಾಜನ್, ಸಂಸದ ಅಶೋಕ್ ಚವಾಣ್ ಮತ್ತು ಮಾಜಿ ಸಚಿವ ಧನಂಜಯ್ ಮುಂಡೆ ಅವರೂ ಈ ವಿಷಯದಲ್ಲಿ ನೇತೃತ್ವ ವಹಿಸಿದ್ದಾರೆ. ವಿಶ್ವಸಂಸ್ಥೆಯ ಅಂದಾಜಿನ ಪ್ರಕಾರ, ಮ್ಯಾನ್ಮಾರ್‌ನ ಇಂತಹ ಕೇಂದ್ರಗಳಲ್ಲಿ ೧ ಲಕ್ಷಕ್ಕೂ ಹೆಚ್ಚು ಜನರನ್ನು ಬಲವಂತವಾಗಿ ಕೆಲಸ ಮಾಡಲು ಒತ್ತಾಯಿಸಲಾಗುತ್ತಿದೆ. ಭಾರತವು ಕಳೆದ ಒಂದೂವರೆ-ಎರಡು ವರ್ಷಗಳಲ್ಲಿ ಇಂತಹ ಕೇಂದ್ರಗಳಿಂದ ೨ ಸಾವಿರದ ೪೦೦ ಕ್ಕೂ ಹೆಚ್ಚು ಭಾರತೀಯರನ್ನು ರಕ್ಷಿಸಿದೆ.