ತೆಲಂಗಾಣದ ಮಹಿಳಾ ತಹಶೀಲ್ದಾರ್‌ಗೆ ಸೇರಿದ ₹20 ಕೋಟಿ ಮೌಲ್ಯದ ಅಕ್ರಮ ಆಸ್ತಿ ಜಪ್ತಿ!

ಭಾಗ್ಯನಗರ (ತೆಲಂಗಾಣ) – ರಾಜ್ಯದ ಭ್ರಷ್ಟಾಚಾರ ನಿಗ್ರಹ ದಳವು (ಎಸಿಬಿ) ಕಂದಾಯ ಇಲಾಖೆಯ ಅಮಾನತುಗೊಂಡ ಮಹಿಳಾ ಅಧಿಕಾರಿಯೊಬ್ಬರ ಅಕ್ರಮ ಆಸ್ತಿಯನ್ನು ಪತ್ತೆಹಚ್ಚಿದೆ. ತನಿಖೆಯ ಸಂದರ್ಭದಲ್ಲಿ ಭ್ರಷ್ಟಾಚಾರ ನಿಗ್ರಹ ದಳಕ್ಕೆ ಸದರಿ ಅಧಿಕಾರಿಯ ಬಳಿ ₹20 ಕೋಟಿಗೂ ಅಧಿಕ ಮೌಲ್ಯದ ಚರ ಮತ್ತು ಸ್ಥಿರ ಆಸ್ತಿ, ನಗದು ಹಣ ಹಾಗೂ ಭಾರಿ ಪ್ರಮಾಣದ ಬೆಲೆಬಾಳುವ ಆಭರಣಗಳು ಪತ್ತೆಯಾಗಿವೆ.

ಜೂನ್ 24 ರಂದು ಇಲಾಖೆಯು ಭಾಗ್ಯನಗರದ ಸಮೀಪವಿರುವ ಶಮೀರ್‌ಪೇಟೆಯ ಅಮಾನತುಗೊಂಡ ತಹಶೀಲ್ದಾರ್ ಮತ್ತು ಜಂಟಿ ಉಪ-ನೋಂದಣಾಧಿಕಾರಿ ಥುಮ್ಮಕೊಮ್ಮ ಸುಚರಿತಾ ಅವರ ವಿರುದ್ಧ ‘ಭ್ರಷ್ಟಾಚಾರ ತಡೆ ಕಾಯ್ದೆ’ಯಡಿ ಅಕ್ರಮ ಆಸ್ತಿ ಗಳಿಕೆ ಪ್ರಕರಣವನ್ನು ದಾಖಲಿಸಿದೆ.

ಸುಚರಿತಾ ಈಗಾಗಲೇ ಜೈಲಿನಲ್ಲಿದ್ದಾರೆ!

ಸುಚರಿತಾ ಅವರು ಲಂಚದ ಪ್ರಕರಣವೊಂದರಲ್ಲಿ ಈಗಾಗಲೇ ನ್ಯಾಯಾಂಗ ಬಂಧನದಲ್ಲಿದ್ದಾರೆ. ಅವರು ಸರಕಾರಿ ಕೆಲಸವೊಂದನ್ನು ಮಾಡಿಕೊಡಲು ₹30 ಲಕ್ಷ ಲಂಚಕ್ಕೆ ಬೇಡಿಕೆಯಿಟ್ಟಿದ್ದರು. ಅದರಲ್ಲಿ ₹2 ಲಕ್ಷದ ಮೊದಲ ಕಂತನ್ನು ಸ್ವೀಕರಿಸುತ್ತಿದ್ದಾಗ ಕಳೆದ ತಿಂಗಳು ಮೇ 26 ರಂದು ಅವರನ್ನು ರೆಡ್ ಹ್ಯಾಂಡ್ ಆಗಿ ಬಂಧಿಸಲಾಗಿತ್ತು.

ಇಲಾಖೆಯು ಹಲವು ಕಡೆ ನಡೆಸಿದ ದಾಳಿಯಲ್ಲಿ ಸಿಕ್ಕಿದ್ದೇನು?

ಇಲಾಖೆಯ ಅಧಿಕಾರಿಗಳು ಸುಚರಿತಾ ಅವರ ಹಿಮಾಯತ್‌ನಗರದಲ್ಲಿರುವ ನಿವಾಸ ಹಾಗೂ ಅವರ ಸಂಬಂಧಿಕರು, ಸಹೋದ್ಯೋಗಿಗಳು ಸೇರಿದಂತೆ ಇತರೆ 3 ಸ್ಥಳಗಳ ಮೇಲೆ ಏಕಕಾಲದಲ್ಲಿ ದಾಳಿ ನಡೆಸಿದ್ದರು. ಆ ದಾಳಿಯಲ್ಲಿ ಈ ಕೆಳಗಿನ ಆಸ್ತಿಗಳು ಪತ್ತೆಯಾಗಿವೆ:

೧. ಕೀಸರಾ ಮತ್ತು ಖಾನಾಮೆಟ್‌ನಲ್ಲಿ ಎರಡು ಜಮೀನಿನ ನಿವೇಶನಗಳು (ಪ್ಲಾಟ್‌ಗಳು).

೨. ನಗರದ ವಿವಿಧ ಭಾಗಗಳಲ್ಲಿ 3 ಐಷಾರಾಮಿ ಫ್ಲಾಟ್‌ಗಳು.

೩. ಸಿದ್ದಿಪೇಟೆ ಜಿಲ್ಲೆಯ ದಾಮರಕುಂಟಾ ಗ್ರಾಮದಲ್ಲಿ 2 ಎಕರೆ 17 ಗುಂಟೆ ಕೃಷಿ ಭೂಮಿ.

೪. 2 ಕಾರುಗಳು.

೫. ₹1 ಕೋಟಿ 2 ಲಕ್ಷ ಮೌಲ್ಯದ ಚಿನ್ನ ಮತ್ತು ವಜ್ರದ ಆಭರಣಗಳು.

೬. ₹12 ಲಕ್ಷ ನಗದು ಮತ್ತು ಬ್ಯಾಂಕ್ ಖಾತೆಗಳಲ್ಲಿದ್ದ ₹38 ಲಕ್ಷ ಹಣ.

೭. 12 ಎಕರೆ ಕೃಷಿ ಭೂಮಿಯ ದಾಖಲೆ ಪತ್ರಗಳು.

ಈ ಎಲ್ಲಾ ಆಸ್ತಿಗಳ ಇಂದಿನ ಮಾರುಕಟ್ಟೆ ಮೌಲ್ಯವನ್ನು ಲೆಕ್ಕ ಹಾಕಿದರೆ, ಅದು ಸುಮಾರು 20 ಕೋಟಿ ರೂಪಾಯಿಗಳಿಗಿಂತಲೂ ಹೆಚ್ಚಾಗುತ್ತದೆ.