‘ನೌಕಾ ಮರುಬಳಕೆ’ ವಲಯದಲ್ಲಿ ಭಾರತ ಜಾಗತಿಕ ಮಟ್ಟದಲ್ಲಿ ಅಗ್ರಸ್ಥಾನ! : Ship Recycling

ಜಿನೀವಾ (ಸ್ವಿಟ್ಜರ್ಲೆಂಡ್) – ಜಾಗತಿಕ ಮಟ್ಟದಲ್ಲಿ ಹಡಗುಗಳನ್ನು ಗುಜರಿ ಮಾಡಿ ಅವುಗಳ ಮರುಬಳಕೆ (ರೀಸೈಕ್ಲಿಂಗ್) ಮಾಡುವಲ್ಲಿ ಭಾರತ ಪ್ರಥಮ ಸ್ಥಾನವನ್ನು ಪಡೆದುಕೊಂಡಿದೆ. ‘ಮ್ಯಾರಿಟೈಮ್ ಇಂಡಿಯಾ ವಿಷನ್ 2030’ ರ ಗುರಿಯನ್ನು ಭಾರತವು ನಿಗದಿತ ಅವಧಿಗಿಂತ 5 ವರ್ಷ ಮೊದಲೇ ಸಾಧಿಸಿದೆ. ಸಂಯುಕ್ತ ರಾಷ್ಟ್ರಗಳ ವ್ಯಾಪಾರ ಮತ್ತು ಅಭಿವೃದ್ಧಿ ಸಮ್ಮೇಳನದ (‘ಯು.ಎನ್.ಸಿ.ಟಿ.ಎ.ಡಿ.’) ವರದಿಯ ಪ್ರಕಾರ, ಜಾಗತಿಕ ಹಡಗು ಮರುಬಳಕೆ ಮಾರುಕಟ್ಟೆಯಲ್ಲಿ ಭಾರತದ ಪಾಲು 2025ರಲ್ಲಿ 35.4 ಪ್ರತಿಶತಕ್ಕೆ ಏರಿದೆ. 2024ರಲ್ಲಿ ಈ ಪಾಲು 30.1 ಪ್ರತಿಶತ ಇತ್ತು. ಭಾರತ ಈಗ ಈ ಕ್ಷೇತ್ರದಲ್ಲಿ ಇಡೀ ಜಗತ್ತಿನ ನಾಯಕತ್ವ ವಹಿಸುತ್ತಿದೆ.

ಗುಜರಾತ್‌ನ ‘ಅಲಂಗ್ ಯಾರ್ಡ್’ನ ಕಾಯಕಲ್ಪ!

ಭಾರತದ ಗುಜರಾತ್ ರಾಜ್ಯದಲ್ಲಿರುವ ‘ಅಲಂಗ್’ ಜಗತ್ತಿನ ಅತಿದೊಡ್ಡ ಹಡಗು ಮರುಬಳಕೆ ಕೇಂದ್ರವಾಗಿದೆ (ಶಿಪ್ ರೀಸೈಕ್ಲಿಂಗ್ ಯಾರ್ಡ್). ಈ ಕ್ಷೇತ್ರದಲ್ಲಿ ಭಾರತಕ್ಕೆ ಲಭಿಸಿರುವ ಯಶಸ್ಸನ್ನು ಕಾಯ್ದುಕೊಳ್ಳಲು ಸರಕಾರ ಈಗ ಗುಜರಾತ್‌ನ ‘ಅಲಂಗ್ ಯಾರ್ಡ್’ ಅನ್ನು ಮತ್ತಷ್ಟು ವಿಸ್ತರಿಸಲು ಸಿದ್ಧತೆ ನಡೆಸಿದೆ. ಈ ವಿಸ್ತರಣೆಯ ನಂತರ ಭಾರತದ ಹಡಗು ಗುಜರಿ ಮಾಡುವ ಸಾಮರ್ಥ್ಯವು ಸುಮಾರು ಎರಡು ಪಟ್ಟು ಹೆಚ್ಚಾಗಲಿದೆ. ಭವಿಷ್ಯದಲ್ಲಿ ಬರಲಿರುವ ಭಾರಿ ಬೇಡಿಕೆಯನ್ನು ಪೂರೈಸಲು ಈ ಕ್ರಮವು ಅತ್ಯಂತ ಉಪಯುಕ್ತವಾಗಲಿದೆ.

ಭವಿಷ್ಯದಲ್ಲಿ ಸಿಗಲಿದೆ ದೊಡ್ಡ ಲಾಭ!

ಮುಂದಿನ 10 ವರ್ಷಗಳಲ್ಲಿ ಜಗತ್ತಿನಾದ್ಯಂತ ಅಂದಾಜು 16 ಸಾವಿರಕ್ಕೂ ಹೆಚ್ಚು ಹಡಗುಗಳನ್ನು ಗುಜರಿ ಮಾಡುವ ನಿರೀಕ್ಷೆಯಿದೆ. ಮಾರುಕಟ್ಟೆಯ ಮೇಲಿನ ಬಲವಾದ ಹಿಡಿತದಿಂದಾಗಿ, ಭಾರತವು ಪ್ರತಿವರ್ಷ 500 ರಿಂದ 600 ಹಡಗುಗಳನ್ನು ಸುಲಭವಾಗಿ ನಿರ್ವಹಿಸಬಲ್ಲದು. ಇದರಿಂದ ದೇಶದ ಆರ್ಥಿಕತೆಗೆ ಬಲ ಸಿಗುವುದಲ್ಲದೆ, ಉದ್ಯೋಗದ ಹೊಸ ಅವಕಾಶಗಳು ಕೂಡ ನಿರ್ಮಾಣವಾಗಲಿವೆ.