ಭಾರತದಿಂದ ಇದೇ ಮೊದಲ ಬಾರಿಗೆ ಕ್ಷಿಪಣಿಗಳ ಮೇಲೆ 12 'ಸಕ್ರಿಯ' ಪರಮಾಣು ಶಸ್ತ್ರಾಸ್ತ್ರಗಳ ನಿಯೋಜನೆ!

ಜಾಗತಿಕ ಮಟ್ಟದಲ್ಲಿ ಶಸ್ತ್ರಾಸ್ತ್ರಗಳ ಮೇಲೆ ನಿಗಾ ಇಡುವ ಸ್ವೀಡಿಷ್ ಸಂಸ್ಥೆ 'ಸಿಪ್ರಿ'ಯ ದಾವೆ:
ಹಲವು ದಶಕಗಳ ಭಾರತದ ಪರಮಾಣು ನೀತಿಯಲ್ಲಿ ಬದಲಾವಣೆ

ಸ್ಟಾಕ್ಹೋಮ್ (ಸ್ವೀಡನ್)/ನವದೆಹಲಿ – ಜಾಗತಿಕ ಮಟ್ಟದಲ್ಲಿ ಶಸ್ತ್ರಾಸ್ತ್ರಗಳ ಮೇಲೆ ನಿಗಾ ಇಡುವ ಸ್ವೀಡನ್‌ನ ‘ಸ್ಟಾಕ್ಹೋಮ್ ಇಂಟರ್ನ್ಯಾಷನಲ್ ಪೀಸ್ ರಿಸರ್ಚ್ ಇನ್‌ಸ್ಟಿಟ್ಯೂಟ್’, ಅಂದರೆ ‘ಸಿಪ್ರಿ’ (SIPRI) ಸಂಸ್ಥೆಯು ಭಾರತಕ್ಕೆ ಸಂಬಂಧಿಸಿದಂತೆ ಮಹತ್ವದ ಹೇಳಿಕೆ ನೀಡಿದೆ. ಭಾರತವು ಕನಿಷ್ಠ 12 ಪರಮಾಣು ಶಸ್ತ್ರಾಸ್ತ್ರಗಳನ್ನು ‘ಸಕ್ರಿಯ’ (Active) ಸ್ಥಿತಿಯಲ್ಲಿ ನಿಯೋಜಿಸಿದೆ ಎಂದು ಸಿಪ್ರಿ ಹೇಳಿದೆ. ಈ ದಾವೆಯು ಭಾರತದ ದೀರ್ಘಕಾಲದ ಪರಮಾಣು ನೀತಿಯಲ್ಲಿನ ಒಂದು ಪ್ರಮುಖ ಬದಲಾವಣೆಯನ್ನು ತೋರಿಸುತ್ತದೆ.

‘ಸಿಪ್ರಿ’ಯ ಈ ದಾವೆಯ ಅರ್ಥವೇನೆಂದರೆ, ಈ ಪರಮಾಣು ಶಸ್ತ್ರಾಸ್ತ್ರಗಳನ್ನು ಭಾರತೀಯ ಯುದ್ಧನೌಕೆಗಳು, ಜಲಾಂತರ್ಗಾಮಿಗಳು (ಸಬ್‌ಮರೀನ್) ಅಥವಾ ಇತರ ವಾಹಕ ವ್ಯವಸ್ಥೆಗಳ ಮೇಲೆ ನಿರಂತರವಾಗಿ ನಿಯೋಜಿಸಿಡಲಾಗಿದೆ. ಸಂಕ್ಷಿಪ್ತವಾಗಿ ಹೇಳುವುದಾದರೆ, ಯಾವುದೇ ದೇಶವು ಭಾರತದ ಮೇಲೆ ಪರಮಾಣು ಶಸ್ತ್ರಾಸ್ತ್ರಗಳನ್ನು ಬಳಸಲು ಪ್ರಯತ್ನಿಸಿದರೆ, ಭಾರತವು ತಕ್ಷಣವೇ ಪರಮಾಣು ಶಸ್ತ್ರಾಸ್ತ್ರಗಳ ಮೂಲಕವೇ ಪ್ರತಿ-ದಾಳಿ ನಡೆಸಲು ಸಜ್ಜಾಗಿದೆ.

‘ಸಿಪ್ರಿ’ಯ ಹಿಂದಿನ ವರದಿಗಳಲ್ಲಿ ಭಾರತದ ಪರಮಾಣು ಶಸ್ತ್ರಾಸ್ತ್ರಗಳನ್ನು ‘ನಿಯೋಜಿಸಲಾಗಿದೆ’ ಎಂದು ವರ್ಣಿಸದೆ, ಕೇವಲ ‘ಸಂಗ್ರಹ ’ (ಸ್ಟಾಕ್‌ಪೈಲ್) ಎಂದು ಉಲ್ಲೇಖಿಸಲಾಗುತ್ತಿತ್ತು.

ಪರಮಾಣು ಶಸ್ತ್ರಾಸ್ತ್ರಗಳನ್ನು ನಿರ್ವಹಿಸುವಲ್ಲಿ ಭಾರತದ ಪ್ರಮುಖ ಬದಲಾವಣೆಗಳನ್ನು ತಿಳಿಯಿರಿ!

1. ‘ಸಿಪ್ರಿ’ ವರದಿಯ ಪ್ರಕಾರ, ಭಾರತದ ಬಳಿ ಒಟ್ಟು 190 ಪರಮಾಣು ಶಸ್ತ್ರಾಸ್ತ್ರಗಳಿವೆ.

2. ಶಾಂತಿಯ ಸಮಯದಲ್ಲಿ ಭಾರತವು ತನ್ನ ಪರಮಾಣು ಶಸ್ತ್ರಾಸ್ತ್ರಗಳನ್ನು ಅವುಗಳನ್ನು ಉಡಾಯಿಸುವ ಲಾಂಚರ್‌ಗಳಿಂದ ಪ್ರತ್ಯೇಕವಾಗಿ ಇಡುತ್ತದೆ ಎಂದು ದೀರ್ಘಕಾಲದಿಂದ ನಂಬಲಾಗಿತ್ತು. ಆದಾಗ್ಯೂ, ಕ್ಷಿಪಣಿಗಳನ್ನು ‘ಕ್ಯಾನಿಸ್ಟರ್’ (ರಕ್ಷಣಾತ್ಮಕ ಕವಚ) ಒಳಗೆ ಇಡುವುದು ಮತ್ತು ಸಮುದ್ರದಲ್ಲಿ ನಿರಂತರ ಗಸ್ತು ತಿರುಗುವುದರಂತಹ ಇತ್ತೀಚಿನ ನಡವಳಿಕೆಗಳಿಂದ, ಭಾರತವು ಈಗ ಶಾಂತಿಯ ಅವಧಿಯಲ್ಲೂ ಕೆಲವು ಪರಮಾಣು ಶಸ್ತ್ರಾಸ್ತ್ರಗಳನ್ನು ಲಾಂಚರ್‌ಗಳೊಂದಿಗೆ ಜೋಡಿಸುವ ದಿಕ್ಕಿನಲ್ಲಿ ಸಾಗುತ್ತಿದೆ ಎಂದು ಕಂಡುಬರುತ್ತದೆ.

3. ಆಗಸ್ಟ್ 2024 ರಿಂದ ಭಾರತವು ಪರಮಾಣು ಸಾಮರ್ಥ್ಯ ಹೊಂದಿರುವ 2 ಕ್ಷಿಪಣಿ ವಾಹಕ ಜಲಾಂತರ್ಗಾಮಿಗಳಾದ ‘ಐ.ಎನ್.ಎಸ್. ಅರಿಘಾತ್’ ಮತ್ತು ‘ಐ.ಎನ್.ಎಸ್. ಅರಿದಮನ್’ ಅನ್ನು ಕಾರ್ಯಾಚರಣೆಗೆ ಒಳಪಡಿಸಿದೆ. ಈ ಎರಡೂ ಜಲಾಂತರ್ಗಾಮಿಗಳು ಪರಮಾಣು ಸಜ್ಜಿತ ಕ್ಷಿಪಣಿಗಳನ್ನು ಹೊತ್ತೊಯ್ಯುವ ಸಾಮರ್ಥ್ಯವನ್ನು ಹೊಂದಿವೆ.

4. ಪಾಕಿಸ್ತಾನದ ಬಳಿ 170 ಪರಮಾಣು ಶಸ್ತ್ರಾಸ್ತ್ರಗಳಿವೆ; ಆದರೆ ಅವುಗಳಲ್ಲಿ ಯಾವುದನ್ನೂ ಪ್ರಸ್ತುತ ಪ್ರತ್ಯಕ್ಷವಾಗಿ ನಿಯೋಜಿಸಲಾಗಿಲ್ಲ.
5.ಈಗ ಪಾಕಿಸ್ತಾನಕ್ಕೆ ಹೋಲಿಸಿದರೆ ಭಾರತವು ಅತ್ಯಂತ ವೇಗವಾಗಿ ಪರಮಾಣು ಶಸ್ತ್ರಾಸ್ತ್ರಗಳನ್ನು ತಯಾರಿಸುತ್ತಿದೆ ಮತ್ತು ಈ ಪ್ರಯತ್ನಗಳಿಗಾಗಿ ಭಾರಿ ಪ್ರಮಾಣದ ಹಣವನ್ನು ಖರ್ಚು ಮಾಡುತ್ತಿದೆ.

ಭಾರತದಿಂದ ಕಳೆದ ವರ್ಷ ಪರಮಾಣು ಶಸ್ತ್ರಾಸ್ತ್ರಗಳ ತಯಾರಿಕೆಗೆ 27 ಸಾವಿರ ಕೋಟಿ ರೂಪಾಯಿ ವೆಚ್ಚ!

‘ಇಂಟರ್ನ್ಯಾಷನಲ್ ಕ್ಯಾಂಪೇನ್ ಟು ಅಬಾಲಿಶ್ ನ್ಯೂಕ್ಲಿಯರ್ ವೆಪನ್ಸ್’ ಸಂಸ್ಥೆಯ ವರದಿಯಲ್ಲಿ, 2025 ರ ವರ್ಷದಲ್ಲಿ ಪರಮಾಣು ಶಸ್ತ್ರಾಸ್ತ್ರಗಳ ಮೇಲಿನ ಜಾಗತಿಕ ವೆಚ್ಚವು ದಾಖಲೆಯ ಮಟ್ಟವನ್ನು ತಲುಪಿದೆ ಎಂದು ಹೇಳಲಾಗಿದೆ . ಭಾರತವೂ ಸಹ ಪರಮಾಣು ಶಸ್ತ್ರಾಸ್ತ್ರಗಳ ಮೇಲಿನ ತನ್ನ ವೆಚ್ಚವನ್ನು ಹೆಚ್ಚಿಸಿದೆ. ಆದಾಗ್ಯೂ, ಒಟ್ಟು ವೆಚ್ಚದ ವಿಷಯದಲ್ಲಿ ಭಾರತವು ಚೀನಾ ಮತ್ತು ಅಮೆರಿಕಾಗೆ ಹೋಲಿಸಿದರೆ ಬಹಳ ಹಿಂದುಳಿದಿದೆ. 2025 ರಲ್ಲಿ ವಿಶ್ವಾದ್ಯಂತ ಪರಮಾಣು ಶಸ್ತ್ರಾಸ್ತ್ರಗಳಿಗಾಗಿ ಒಟ್ಟು 119 ಬಿಲಿಯನ್ ಡಾಲರ್ ವೆಚ್ಚ ಮಾಡಲಾಗಿದೆ. ಈ ವರದಿಯ ಪ್ರಕಾರ, ಅಮೆರಿಕಾ 69.2 ಬಿಲಿಯನ್ ಡಾಲರ್, ಚೀನಾ 13.5 ಬಿಲಿಯನ್ ಡಾಲರ್, ಮತ್ತು ಭಾರತವು 2.8 ಬಿಲಿಯನ್ ಡಾಲರ್ (26 ಸಾವಿರದ 711 ಕೋಟಿ ಭಾರತೀಯ ರೂಪಾಯಿ) ಹಣವನ್ನು ಪರಮಾಣು ಶಸ್ತ್ರಾಸ್ತ್ರಗಳಿಗಾಗಿ ಖರ್ಚು ಮಾಡಿದೆ.