ಅಂಡಮಾನ್ ನ ‘ಶಾಲೋ ಆಫ್‌ಶೋರ್ ಬ್ಲಾಕ್’ನಲ್ಲಿ ಎರಡನೇ ಅತಿ ದೊಡ್ಡ ನೈಸರ್ಗಿಕ ಅನಿಲದ ನಿಕ್ಷೇಪ ಪತ್ತೆ

ಅಂಡಮಾನ್ – ಸರಕಾರದ ಸ್ವಾಮ್ಯದ ‘ಆಯಿಲ್ ಇಂಡಿಯಾ ಲಿಮಿಟೆಡ್’ ಈ ಸಂಸ್ಥೆಗೆ ಅಂಡಮಾನ್ ದ್ವೀಪಗಳ ಪೂರ್ವ ಕರಾವಳಿಯಿಂದ ಅಂದಾಜು ೧೫ ಕಿ.ಮೀ. ದೂರದಲ್ಲಿ ಮತ್ತು ೩೫೫ ಮೀಟರ್ ನೀರಿನ ಆಳದಲ್ಲಿರುವ ‘ಶ್ರೀ ವಿಜಯಪುರಂ-೩’ ಎಂಬ ಅನ್ವೇಷಣಾ ಬಾವಿಯಲ್ಲಿ ನೈಸರ್ಗಿಕ ಅನಿಲದ ನಿಕ್ಷೇಪ ಪತ್ತೆಯಾಗಿದೆ. ಪೆಟ್ರೋಲಿಯಂ ಮತ್ತು ನೈಸರ್ಗಿಕ ಅನಿಲ ಸಚಿವ ಹರ್ದೀಪ್ ಸಿಂಗ್ ಪುರಿ ಅವರು ಈ ಘಟನೆಯನ್ನು ‘ಇಂಧನ ಅವಕಾಶಗಳ ಮಹಾಸಾಗರ’ ಎಂದು ಬಣ್ಣಿಸಿದ್ದಾರೆ. ‘ಇಓಸಿನ್’ ಪದರದಲ್ಲಿ ೧ ಸಾವಿರದ ೯೦೦ ಮೀಟರ್‌ಗಿಂತಲೂ ಹೆಚ್ಚಿನ ಆಳದಲ್ಲಿ ನಡೆಸಿದ ಪ್ರಾಥಮಿಕ ಪರೀಕ್ಷೆಯಲ್ಲಿ ನಿರಂತರ ‘ಫ್ಲೇರಿಂಗ್’ (ಅನಿಲ ಜ್ವಾಲೆ) ಮೂಲಕ ಅನಿಲದ ಅಸ್ತಿತ್ವವು ಸಾಬೀತಾಗಿದೆ.

​‘ಶ್ರೀ ವಿಜಯಪುರಂ-೨’ ರ ನಂತರ ಈ ಬ್ಲಾಕ್‌ನಲ್ಲಿ ಪತ್ತೆಯಾದ ಎರಡನೇ ಖಚಿತ ಹೈಡ್ರೋಕಾರ್ಬನ್ ನಿಕ್ಷೇಪ ಇದಾಗಿದ್ದು, ಒಟ್ಟು ೩ ಅನ್ವೇಷಣಾ ಬಾವಿಗಳಲ್ಲಿ ಎರಡರಲ್ಲಿ ಯಶಸ್ಸು ಸಿಕ್ಕಿದೆ. ಈ ಆವಿಷ್ಕಾರದಿಂದಾಗಿ ಅಂಡಮಾನ್-ನಿಕೋಬಾರ್ ಜಲಾನಯನ ಪ್ರದೇಶದಲ್ಲಿರುವ ಹೈಡ್ರೋಕಾರ್ಬನ್ ಸಾಮರ್ಥ್ಯದ ಮೇಲಿನ ನಿರೀಕ್ಷೆಗಳು ಹೆಚ್ಚಾಗಿದ್ದು, ದೇಶದ ಇಂಧನ ಸ್ವಾವಲಂಬನೆ ಸಾಧಿಸುವ ದಿಕ್ಕಿನಲ್ಲಿ ಇದೊಂದು ಪ್ರಮುಖ ಹೆಜ್ಜೆಯೆಂದು ಪರಿಗಣಿಸಲಾಗಿದೆ.