ಅಮೆರಿಕಾ: ಮಸೀದಿಯ ಹೊರಗೆ ಗುಂಡಿನ ದಾಳಿ: 5 ಜನರ ಸಾವು

ಕ್ಯಾಲಿಫೋರ್ನಿಯಾ (ಅಮೆರಿಕಾ) – ಇಲ್ಲಿನ ಸ್ಯಾನ್ ಡಿಯಾಗೋ ಕೌಂಟಿಯ ಕ್ಲೇರ್‌ಮಾಂಟ್ ಪ್ರದೇಶದ ಅತಿ ದೊಡ್ಡ ಮಸೀದಿಯಲ್ಲಿ ಮಧ್ಯಾಹ್ನದ ಪ್ರಾರ್ಥನೆಗೆ ಕೆಲವೇ ಸಮಯದ ಮೊದಲು ನಡೆದ ಗುಂಡಿನ ದಾಳಿಯಲ್ಲಿ ಮೂವರು ಸಾವನ್ನಪ್ಪಿದ್ದಾರೆ. ಇಬ್ಬರು ದಾಳಿಕೋರರು ತಾವೇ ಗುಂಡು ಹಾರಿಸಿಕೊಂಡು ಮೃತಪಟ್ಟಿದ್ದಾರೆ. ಮೃತರ ಪೈಕಿ ಮಸೀದಿಯ ಭದ್ರತಾ ಸಿಬ್ಬಂದಿಯೊಬ್ಬರೂ ಸೇರಿದ್ದಾರೆ. ಮುನ್ನೆಚ್ಚರಿಕೆ ಕ್ರಮವಾಗಿ ಲಾಸ್ ಏಂಜಲೀಸ್ ಮತ್ತು ನ್ಯೂಯಾರ್ಕ್ ನಗರಗಳ ಪೊಲೀಸರು ಮಸೀದಿಗಳು ಮತ್ತು ಇತರ ಪ್ರಾರ್ಥನಾ ಮಂದಿರಗಳ ಸುತ್ತ-ಮುತ್ತ ಗಸ್ತು ಹೆಚ್ಚಿಸಿರುವುದಾಗಿ ತಿಳಿಸಿದ್ದಾರೆ.

1. ಎಫ್.ಬಿ.ಐ. (ಫೆಡರಲ್ ಬ್ಯೂರೋ ಆಫ್ ಇನ್ವೆಸ್ಟಿಗೇಷನ್ – ಕೇಂದ್ರ ತನಿಖಾ ಸಂಸ್ಥೆ) ಈ ಘಟನೆಯನ್ನು ಸಂಭಾವ್ಯ ದ್ವೇಷದ ಅಪರಾಧ (ಹೇಟ್ ಕ್ರೈಮ್) ಎಂದು ತನಿಖೆ ನಡೆಸುತ್ತಿದ್ದು, ಸಾರ್ವಜನಿಕರಿಗೆ ಮಾಹಿತಿ ನೀಡುವಂತೆ ಮನವಿ ಮಾಡಿದೆ. 17 ಮತ್ತು 19 ವರ್ಷದ ಇಬ್ಬರು ಶಂಕಿತ ದಾಳಿಕೋರರು ತಮಗೆ ತಾವೇ ಗುಂಡಿಕ್ಕಿಕೊಂಡಿದ್ದರಿಂದ ಸಾವನ್ನಪ್ಪಿದ್ದಾರೆ. ಈ ಘಟನೆಯಲ್ಲಿ ಯಾವುದೇ ಪೊಲೀಸ್ ಅಧಿಕಾರಿ ಗುಂಡು ಹಾರಿಸಿಲ್ಲ ಎಂದು ಎಫ್.ಬಿ.ಐ. ವಕ್ತಾರರು ತಿಳಿಸಿದ್ದಾರೆ.

2. ಮಸೀದಿಯ ಇಮಾಮ್ (ಮಸೀದಿಯಲ್ಲಿ ಪ್ರಾರ್ಥನೆ ಮಾಡಿಸುವವರು) ತಾಹಾ ಹಸಾನೆ ಈ ಬಗ್ಗೆ ಮಾತನಾಡಿ, “ಈ ಘಟನೆಯಿಂದ ಇಡೀ ಸಮುದಾಯವೇ ನಡುಗಿ ಹೋಗಿದೆ. ಪ್ರಾರ್ಥನಾ ಮಂದಿರದ ಮೇಲಿನ ಈ ದಾಳಿ ಒಪ್ಪಿಕೊಳ್ಳಲು ಸಾಧ್ಯವಿಲ್ಲ. ನಾವು ಈ ಹಿಂದೆ ಎಂದಿಗೂ ಇಂತಹ ಕಠಿಣ ಪರಿಸ್ಥಿತಿಯನ್ನು ಎದುರಿಸಿಲ್ಲ,” ಎಂದಿದ್ದಾರೆ.