ಪಾಕಿಸ್ತಾನದೊಂದಿಗೆ ಮಾತುಕತೆ ನಿಲ್ಲಿಸಬಾರದು, ವ್ಯಾಪಾರ ಮುಂದುವರಿಸಬೇಕು; ಆದರೆ ಪುಲ್ವಾಮಾದಂತಹ ದಾಳಿಯಾದರೆ, ಪ್ರತ್ಯುತ್ತರ ನೀಡಬೇಕು !

ನವದೆಹಲಿ – ಭಾರತ ಮತ್ತು ಪಾಕಿಸ್ತಾನದ ನಡುವಿನ ಸಾಂಸ್ಕೃತಿಕ ಸಂಬಂಧಗಳು ಹಳೆಯವು ಮತ್ತು ನಾವು ಒಂದೇ ರಾಷ್ಟ್ರವಾಗಿದ್ದೆವು. ಪಾಕಿಸ್ತಾನವು ಪುಲ್ವಾಮಾದಂತಹ ಕೃತ್ಯವೆಸಗಿದರೆ, ದೇಶದ ಭದ್ರತೆ ಮತ್ತು ಗೌರವಕ್ಕಾಗಿ ಭಾರತವು ಪರಿಸ್ಥಿತಿಗೆ ತಕ್ಕಂತೆ ಪ್ರತ್ಯುತ್ತರ ನೀಡಬೇಕಾಗುತ್ತದೆ; ಆದರೆ ಅದೇ ಸಮಯದಲ್ಲಿ ನಾವು ಮಾತುಕತೆಯ ಬಾಗಿಲುಗಳನ್ನು ಮುಚ್ಚಬಾರದು. ನಾವು ಯಾವಾಗಲೂ ಮಾತುಕತೆಗೆ ಸಿದ್ಧರಿರಬೇಕು. ವ್ಯಾಪಾರ ಮತ್ತು ವಾಣಿಜ್ಯ, ವೀಸಾ ನೀಡುವುದನ್ನು ನಿಲ್ಲಿಸಬಾರದು; ಏಕೆಂದರೆ ಮಾತುಕತೆಗಾಗಿ ಯಾವಾಗಲೂ ಒಂದು ಕಿಟಕಿ ತೆರೆದಿರಬೇಕು. ಅಲ್ಲಿನ ಶಿಕ್ಷಣ ತಜ್ಞರು, ಕ್ರೀಡಾಪಟುಗಳು, ವಿಜ್ಞಾನಿಗಳು ಮುಂತಾದವರು ಮುಂದೆ ಬರಬೇಕು; ಏಕೆಂದರೆ ಅವರ ರಾಜಕೀಯ ಮತ್ತು ಮಿಲಿಟರಿ ನಾಯಕತ್ವದಲ್ಲಿ ಭಾರತದ ಬಗ್ಗೆ ದ್ವೇಷವು ನಿರ್ಮಾಣವಾಗಿದೆ ಎಂದು ರಾಷ್ಟ್ರೀಯ ಸ್ವಯಂಸೇವಕ ಸಂಘದ ರಾಷ್ಟ್ರೀಯ ಸರಕಾರ್ಯವಾಹ ದತ್ತಾತ್ರೇಯ ಹೊಸಬಾಳೆ ಅವರು ‘ಪ್ರೆಸ್ ಟ್ರಸ್ಟ್ ಆಫ್ ಇಂಡಿಯಾ’ ಸುದ್ದಿ ಸಂಸ್ಥೆಗೆ ನೀಡಿದ ಸಂದರ್ಶನದಲ್ಲಿ ಹೇಳಿದ್ದಾರೆ.

ಸರಕಾರ್ಯವಾಹ ಹೊಸಬಾಳೆ ಅವರು ಮಂಡಿಸಿದ ಸೂತ್ರಗಳು

೧. ಉದಯನಿಧಿ ಸ್ಟಾಲಿನ್ ಅವರು ಸನಾತನವನ್ನು ಮುಗಿಸುವ ಹೇಳಿಕೆ ನೀಡಿದ್ದಾರೆ; ಆದರೆ ಸನಾತನವು ಶಾಶ್ವತವಾಗಿದೆ. ಯಾರಾದರೂ ಅದನ್ನು ಮುಗಿಸಬೇಕು ಎಂದು ಹೇಳುವುದರಿಂದ ಅದು ನಾಶವಾಗುವುದಿಲ್ಲ.

೨. ಕೊಲ್ಲಿ ದೇಶಗಳಲ್ಲಿ ನಡೆಯುತ್ತಿರುವ ಸಂಘರ್ಷವು ಸಂಸ್ಕೃತಿಗಳ ಸಂಘರ್ಷವಲ್ಲ, ಬದಲಾಗಿ ತೈಲ ಮತ್ತು ಸಂಪನ್ಮೂಲಗಳಿಂದ ಉಂಟಾದ ವಿವಾದವಾಗಿದೆ. ಪ್ರಪಂಚದ ಬಹುಪಾಲು ಯುದ್ಧಗಳು ದುರಾಸೆ, ಅಹಂಕಾರ ಮತ್ತು ಇತರರ ಮೇಲೆ ನಿಯಂತ್ರಣ ಸಾಧಿಸುವ ಮನಸ್ಥಿತಿಯಿಂದ ಹುಟ್ಟಿಕೊಳ್ಳುತ್ತವೆ. ಇತಿಹಾಸದಲ್ಲಿ ಪ್ರತಿಯೊಂದು ಕಾಲದಲ್ಲೂ ಯುದ್ಧಗಳು ನಡೆದಿವೆ ಮತ್ತು ಭವಿಷ್ಯದಲ್ಲಿ ನೀರಿಗಾಗಿಯೂ ಸಂಘರ್ಷದ ಸಾಧ್ಯತೆಯನ್ನು ವ್ಯಕ್ತಪಡಿಸಲಾಗುತ್ತಿದೆ. ಯುದ್ಧಗಳು ಮಾನವೀಯತೆಯನ್ನು ಕೊನೆಗೊಳಿಸುವುದಿಲ್ಲ; ಆದರೆ ಮಾನವ ಜೀವನ ಮತ್ತು ವ್ಯವಸ್ಥೆಯನ್ನು ಖಂಡಿತವಾಗಿಯೂ ಬದಲಾಯಿಸುತ್ತವೆ.

೩. ಯುದ್ಧದಂತಹ ಪರಿಸ್ಥಿತಿ ಇರಲಿ ಅಥವಾ ಇಲ್ಲದಿರಲಿ, ಭಾರತೀಯ ಜೀವನಶೈಲಿಯಲ್ಲಿ ಸರಳತೆ ಮತ್ತು ಸಂಯಮ ಯಾವಾಗಲೂ ಇರಬೇಕು. ಬಿಕ್ಕಟ್ಟಿನ ಸಮಯದಲ್ಲಿ ಇದು ಹೆಚ್ಚು ಮಹತ್ವದ್ದಾಗುತ್ತದೆ. ಪ್ರಪಂಚದ ದೇಶಗಳು ಮತ್ತು ನಾಯಕರಿಗೆ ಶಾಂತಿ ಮತ್ತು ತಿಳುವಳಿಕೆಯ ಸಂದೇಶವನ್ನು ನೀಡುವಲ್ಲಿ ಭಾರತವು ಪ್ರಮುಖ ಪಾತ್ರ ವಹಿಸಬಹುದು.

‘ಲವ್ ಜಿಹಾದ್’ ಒಂದು ಸಂಚು !

ಯಾವುದಾದರೂ ಉದ್ದೇಶವಿದ್ದಾಗ ‘ಲವ್ ಜಿಹಾದ್’ ನಡೆಯುತ್ತದೆ. ಹಿಂದೂ ಹುಡುಗಿಯರನ್ನು ಅಪಹರಿಸುವ ಪೂರ್ವನಿಯೋಜಿತ ಸಂಚು ಇರುತ್ತದೆ. ಇದು ಏಕಪಕ್ಷೀಯವಾಗಿದ್ದಾಗ, ಅದು ಪ್ರೀತಿಯಲ್ಲ, ಅದೊಂದು ಸಂಚು ಆಗಿರುತ್ತದೆ. – ಸರಕಾರ್ಯವಾಹ ಹೊಸಬಾಳೆ