ಭಾರತೀಯ ತೈಲ ಕಂಪನಿಗಳು ಭೂತಾನ್‌ಗೆ ಇಂಧನ ಮಾರಾಟ ಮಾಡುವಾಗ ಹೆಚ್ಚಿನ ಹಣ ವಸೂಲಿ ಮಾಡುತ್ತವೆ !(ಅಂತೆ)

ಥಿಂಪು (ಭೂತಾನ್) – ಭಾರತ ಸರಕಾರದ ತೈಲ ಕಂಪನಿಗಳು ಭೂತಾನ್, ಹಾಗೂ ನೇಪಾಳಕ್ಕೆ ದುಬಾರಿ ಬೆಲೆಗೆ ತೈಲ ಮಾರಾಟ ಮಾಡುತ್ತಿವೆ ಎಂದು ಆರೋಪಿಸಲಾಗಿದೆ. ಭೂತಾನ್‌ನಲ್ಲಿ ಮಾರ್ಚ್ ೧೬ ನಂತರ ಪೆಟ್ರೋಲ್ ಮತ್ತು ಡೀಸೆಲ್ ಬೆಲೆಯಲ್ಲಿ ಭಾರಿ ಏರಿಕೆಯಾಗಿದೆ. ರಾಜಧಾನಿ ಥಿಂಪುನಲ್ಲಿ ಪೆಟ್ರೋಲ್ ದರ ಪ್ರತಿ ಲೀಟರ್‌ಗೆ ೬೩.೨೯ ನಗುಲ್ಟ್ರಮ್‌ನಿಂದ (ಭೂತಾನ್ ಕರೆನ್ಸಿ) ೧೦೨.೪೦ ಕ್ಕೆ ತಲುಪಿದ್ದರೆ, ಡೀಸೆಲ್ ೭೦ ರಿಂದ ೯೮ ನಗುಲ್ಟ್ರಮ್‌ಗೆ ಏರಿಕೆಯಾಗಿದೆ. ಭೂತಾನ್ ಸರಕಾರದ ರಿಯಾಯಿತಿಯ ನಂತರವೂ ಆಗಿರುವ ಈ ಬೆಲೆ ಏರಿಕೆಗೆ ತಜ್ಞರು ಭಾರತದತ್ತ ಬೆರಳು ತೋರಿಸಿದ್ದಾರೆ. ‘ದಿ ಭೂತಾನೀಸ್’ ಎಂಬ ವೃತ್ತಪತ್ರಿಕೆಯು ಈ ವಿಷಯದ ಬಗ್ಗೆ ಆಳವಾದ ಅಧ್ಯಯನ ಮಾಡಿರುವುದಾಗಿ ದಾವೆ ಮಾಡಿದೆ.

ವೃತ್ತಪತ್ರಿಕೆಯ ವರದಿಯ ಪ್ರಕಾರ ಇಂಧನ ಬೆಲೆ ಏರಿಕೆಗೆ ಇರಾನ್-ಅಮೆರಿಕ ಯುದ್ಧ ಕಾರಣ ಎಂದು ಹೇಳಲಾಗುತ್ತಿದ್ದರೂ, ಅದು ಒಂದೇ ಕಾರಣ ಎಂದು ಅನಿಸುತ್ತಿಲ್ಲ. ಭೂತಾನ್‌ನ ವ್ಯಾಪಾರ ಇಲಾಖೆಯ ಬಳಿ ಭಾರತದ ಇಂಡಿಯನ್ ಆಯಿಲ್ ಕಾರ್ಪೊರೇಷನ್, ಹಿಂದೂಸ್ತಾನ್ ಪೆಟ್ರೋಲಿಯಂ ಮತ್ತು ಭಾರತ್ ಪೆಟ್ರೋಲಿಯಂ ಕಂಪನಿಗಳಿಂದ ಆಗುವ ಪೂರೈಕೆಯ ಬಗ್ಗೆ ಬಹಳ ಕಡಿಮೆ ಮಾಹಿತಿಯಿದೆ. ಇಲಾಖೆಯ ಬಳಿ ಲಭ್ಯವಿರುವ ವಿವರಗಳಲ್ಲಿ ಕೇವಲ ಇಂಧನದ ಬೆಲೆ ಮತ್ತು ಅದರ ಸಾಗಾಟ ಶುಲ್ಕದ ಬಗ್ಗೆ ಮಾತ್ರ ಉಲ್ಲೇಖವಿದೆ. ಇದರಿಂದಾಗಿ ಭಾರತದಿಂದ ನಡೆಯುವ ತೈಲ ಮಾರಾಟದ ಬೆಲೆಯ ಬಗ್ಗೆ ಪ್ರಶ್ನೆಗಳು ಎದ್ದಿವೆ.