ಭಾರತ ಮತ್ತು ರಷ್ಯಾ ಪರಸ್ಪರರ ದೇಶಗಳಲ್ಲಿ 3 ಸಾವಿರ ಸೈನಿಕರು, 10 ಯುದ್ಧ ವಿಮಾನಗಳು ಮತ್ತು 5 ಯುದ್ಧನೌಕೆಗಳನ್ನು ನಿಯೋಜಿಸಲಿವೆ !

ನವದೆಹಲಿ – ಭಾರತ ಮತ್ತು ರಷ್ಯಾ ನಡುವಿನ ರಕ್ಷಣಾ ಸಹಕಾರಕ್ಕೆ ಹೊಸ ಬಲ ನೀಡುವ ಮಹತ್ವದ ಒಪ್ಪಂದವೊಂದು ಈಗ ಜಾರಿಗೆ ಬಂದಿದೆ. ಈ ಒಪ್ಪಂದದ ಪ್ರಕಾರ, ಈಗ ಭಾರತ ಮತ್ತು ರಷ್ಯಾ ಪರಸ್ಪರರ ಪ್ರದೇಶಗಳಲ್ಲಿ ಸೀಮಿತ ಸಂಖ್ಯೆಯಲ್ಲಿ ತಮ್ಮ ಸೈನ್ಯವನ್ನು ನಿಯೋಜಿಸಬಹುದು. ಇದರಲ್ಲಿ ಗರಿಷ್ಠ 3 ಸಾವಿರ ಸೈನಿಕರು, 5 ಯುದ್ಧನೌಕೆಗಳು ಮತ್ತು 10 ವಿಮಾನಗಳು ಸೇರಿವೆ, ಇವುಗಳನ್ನು ಏಕಕಾಲದಲ್ಲಿ ನಿಯೋಜಿಸಬಹುದಾಗಿದೆ. ಈ ನಿಯೋಜನೆಯು ಮೊದಲಿಗೆ 5 ವರ್ಷಗಳ ಅವಧಿಗೆ ಇರಲಿದ್ದು, ಎರಡೂ ದೇಶಗಳ ಸಮ್ಮತಿಯೊಂದಿಗೆ ಮುಂದಿನ 5 ವರ್ಷಗಳವರೆಗೆ ವಿಸ್ತರಿಸಬಹುದು.

ಫೆಬ್ರವರಿ 2025 ರಲ್ಲಿ ಎರಡೂ ದೇಶಗಳು ಸಹಿ ಮಾಡಿದ ಈ ಒಪ್ಪಂದವನ್ನು ‘ಇಂಡೋ-ರಷ್ಯನ್ ರೆಸಿಪ್ರೋಕಲ್ ಎಕ್ಸ್‌ಚೇಂಜ್ ಆಫ್ ಲಾಜಿಸ್ಟಿಕ್ಸ್ ಅಗ್ರಿಮೆಂಟ್’ ಎಂದು ಕರೆಯಲಾಗುತ್ತದೆ, ಇದು ಈ ವರ್ಷ ಜನವರಿ 12 ರಿಂದ ಜಾರಿಗೆ ಬಂದಿದೆ.