ದೆಹಲಿಯಲ್ಲಿ ವೀಸಾ ಅವಧಿ ಮುಗಿದ ೧೦ ಬಾಂಗ್ಲಾದೇಶಿ ನಾಗರಿಕರ ಬಂಧನ

ನಕಲಿ ವೈದ್ಯಕೀಯ ವೀಸಾ ಮೂಲಕ ಬಲ್ಗೇರಿಯಾಕ್ಕೆ ಪಲಾಯನ ಮಾಡುವ ಪ್ರಯತ್ನದಲ್ಲಿದ್ದರು

(ವೀಸಾ ಎಂದರೆ ಒಂದು ದೇಶಕ್ಕೆ ಪ್ರವೇಶಿಸಲು, ಒಂದು ದೇಶವನ್ನು ಬಿಟ್ಟು ಹೋಗಲು ಅಥವಾ ಒಂದು ದೇಶದ ಮೂಲಕ ಪ್ರಯಾಣಿಸಲು ಅನುಮತಿ ನೀಡುವ ಅಧಿಕೃತ ದಾಖಲೆ)

ನವ ದೆಹಲಿ – ದೆಹಲಿಯ ಪೀರಾಗಢಿ ಪ್ರದೇಶದಿಂದ ೧೦ ಬಾಂಗ್ಲಾದೇಶಿ ನಾಗರಿಕರನ್ನು ಬಂಧಿಸಲಾಗಿದೆ. ಇವರೆಲ್ಲರೂ ವೀಸಾ ಅವಧಿ ಮುಗಿದ ನಂತರವೂ ಭಾರತದಲ್ಲಿ ಕಾನೂನುಬಾಹಿರವಾಗಿ ವಾಸಿಸುತ್ತಿದ್ದರು ಮತ್ತು ನಕಲಿ ದಾಖಲೆಗಳ ಸಹಾಯದಿಂದ ಬಲ್ಗೇರಿಯಾದ ವೈದ್ಯಕೀಯ ವೀಸಾ ಪಡೆಯಲು ಪ್ರಯತ್ನಿಸುತ್ತಿದ್ದರು. ಪೊಲೀಸ್ ತಂಡವು ದಾಳಿ ನಡೆಸಿದಾಗ ಆರೋಪಿಗಳು ಪಲಾಯನ ಮಾಡಲು ಯತ್ನಿಸಿದರು; ಆದರೆ ಜಾಗೃತ ಪೊಲೀಸರು ಅವರನ್ನು ನಾಲ್ಕೂ ದಿಕ್ಕುಗಳಿಂದ ಸುತ್ತುವರಿದು ಬಂಧಿಸಿದರು. ವಿಚಾರಣೆಯ ವೇಳೆ ಬಂಧಿತರಿಗೆ ಯೋಗ್ಯ ಗುರುತಿನ ಚೀಟಿ ಅಥವಾ ಭಾರತದಲ್ಲಿ ವಾಸಿಸಲು ಅಗತ್ಯವಿರುವ ದಾಖಲೆಗಳನ್ನು ತೋರಿಸಲು ಸಾಧ್ಯವಾಗಲಿಲ್ಲ. ಅವರ ಪಾಸ್‌ ಪೋರ್ಟ್ ಮತ್ತು ವೀಸಾ ಅವಧಿ ಮುಗಿದಿರುವುದು ಪತ್ತೆಯಾಗಿದೆ.

ಪ್ರಸ್ತುತ ವಿದೇಶಿ ಪ್ರಾದೇಶಿಕ ನೋಂದಣಿ ಕಚೇರಿಯು ಎಲ್ಲಾ ಕಾನೂನು ಪ್ರಕ್ರಿಯೆಗಳನ್ನು ಪೂರ್ಣಗೊಳಿಸಿದ್ದು, ಇವರನ್ನು ಮರಳಿ ಬಾಂಗ್ಲಾದೇಶಕ್ಕೆ ಕಳುಹಿಸುವ ಕೆಲಸವನ್ನು ಪ್ರಾರಂಭಿಸಿದೆ.