Gujarat Bomb Threat : ಬಾಂಬ್ ಸ್ಫೋಟದ ಬೆದರಿಕೆ ಇ-ಮೇಲ್ ಕಳುಹಿಸುತ್ತಿದ್ದ ಆರೋಪಿಯ ಬಂಧನ !

ಕರ್ಣಾವತಿ ಅಪರಾಧ ವಿಭಾಗದ ಕಾರ್ಯಾಚರಣೆ

ಕರ್ಣಾವತಿ (ಗುಜರಾತ) – ದೇಶದ ವಿವಿಧ ಭಾಗಗಳಲ್ಲಿ ಬಾಂಬ್ ಸ್ಫೋಟದ ಬೆದರಿಕೆ ಇ-ಮೇಲ್‌ಗಳನ್ನು ಕಳುಹಿಸಿದ ಪ್ರಕರಣಕ್ಕೆ ಸಂಬಂಧಿಸಿದಂತೆ ಕರ್ಣಾವತಿ ಅಪರಾಧ ವಿಭಾಗ ಮತ್ತು ಸೈಬರ್ ಅಪರಾಧ ವಿಭಾಗವು ಮುಖ್ಯ ಆರೋಪಿಯನ್ನು ಬಂಧಿಸಿದೆ. ಸೌರಭ ಬಿಸ್ವಾಸ ಎಂಬ ಈ ಆರೋಪಿಯನ್ನು ಬಂಗಾಳದಿಂದ ವಶಕ್ಕೆ ಪಡೆಯಲಾಗಿದೆ. ಹಲವಾರು ಶಾಲೆಗಳು, ನ್ಯಾಯಾಲಯಗಳು ಮತ್ತು ಸರಕಾರಿ ಕಚೇರಿಗಳಿಗೆ ಬಾಂಬ್ ಸ್ಫೋಟದ ಬೆದರಿಕೆ ಇ-ಮೇಲ್ ಕಳುಹಿಸಿದ ಆರೋಪ ಈತನ ಮೇಲಿದೆ.

ಮಾರ್ಚ್ ೨, ೨೦೨೬ ರಂದು ದೆಹಲಿಯ ಆರ್ಮಿ ಪಬ್ಲಿಕ್ ಸ್ಕೂಲ್, ಸಲ್ವಾನ್ ಪಬ್ಲಿಕ್ ಸ್ಕೂಲ್, ಸರ್ದಾರ್ ಪಟೇಲ್ ವಿದ್ಯಾಲಯ, ಹಾಗೆಯೇ ಆಕ್ಸಿಸ್ ಬ್ಯಾಂಕ್ ಮತ್ತು ಸ್ಟೇಟ್ ಬ್ಯಾಂಕ್ ಶಾಖೆಗಳು ಸೇರಿದಂತೆ ೩ ಬ್ಯಾಂಕುಗಳಿಗೆ ಬೆದರಿಕೆ ಇ-ಮೇಲ್‌ಗಳು ಬಂದಿದ್ದವು. ಅದೇ ದಿನ ಭೋಪಾಲ್ ಮತ್ತು ಗೋವಾದಲ್ಲಿಯೂ ಇಂತಹುದೇ ನಕಲಿ ಇ-ಮೇಲ್‌ ಗಳನ್ನು ಕಳುಹಿಸಲಾಗಿತ್ತು. ಭೋಪಾಲ್ ನಲ್ಲಿರುವ ‘ಏಮ್ಸ್’ (ಅಖಿಲ ಭಾರತ ವೈದ್ಯಕೀಯ ವಿಜ್ಞಾನ ಸಂಸ್ಥೆ), ೧ ವಿಶ್ವವಿದ್ಯಾಲಯ, ‘ಜಿಪಿಒ’ (ಜನರಲ್ ಪೋಸ್ಟ್ ಆಫೀಸ್) ಮತ್ತು ಪ್ರಾದೇಶಿಕ ಪಾಸ್‌ ಪೋರ್ಟ್ ಕಚೇರಿಗಳಿಗೂ ಬೆದರಿಕೆಗಳು ಬಂದಿದ್ದವು. ಗೋವಾದ ಪಾಸ್‌ ಪೋರ್ಟ್ ಭವನಕ್ಕೂ ಇ-ಮೇಲ್ ಬಂದ ನಂತರ ಕಟ್ಟಡವನ್ನು ತೆರವುಗೊಳಿಸಲಾಗಿತ್ತು. ತೆಲಂಗಾಣ ಮತ್ತು ಪಂಜಾಬ ರಾಜ್ಯಗಳಿಗೂ ಇಂತಹ ಬೆದರಿಕೆ ಇ-ಮೇಲ್‌ಗಳು ಬಂದಿದ್ದವು.

೧. ಕರ್ಣಾವತಿ ವಿಶೇಷ ಅಪರಾಧ ದಳ ನಡೆಸಿದ ಕಾರ್ಯಾಚರಣೆಯಲ್ಲಿ ಸೌರಭ ಬಿಸ್ವಾಸ ಎಂಬಾತನನ್ನು ಬಂಗಾಳದಿಂದ ಬಂಧಿಸಲಾಯಿತು.

೨. ಇತ್ತೀಚಿನ ದಿನಗಳಲ್ಲಿ ಬಾಂಬ್ ಸ್ಫೋಟದ ಬೆದರಿಕೆ ಇ-ಮೇಲ್‌ಗಳನ್ನು ಕಳುಹಿಸಿ ಸಾರ್ವಜನಿಕರಲ್ಲಿ ಭೀತಿ ನಿರ್ಮಿಸಿದ ಆರೋಪ ಈತನ ಮೇಲಿದೆ. ಪೊಲೀಸ್ ಆಯುಕ್ತ ಜಿ.ಎಸ್. ಮಲಿಕ್ ಮತ್ತು ಜಂಟಿ ಆಯುಕ್ತ ಶರದ ಸಿಂಘಾಲ್ ಅವರ ಮಾರ್ಗದರ್ಶನದಲ್ಲಿ ಈ ಕಾರ್ಯಾಚರಣೆ ನಡೆದಿದೆ.

೩. ಆರೋಪಿ ಸೌರಭ ಬಿಸ್ವಾಸನನ್ನು ಕರ್ಣಾವತಿಗೆ ಕರೆತರಲಾಗಿದ್ದು, ಸೈಬರ್ ತಜ್ಞರು ಈ ಪ್ರಕರಣದ ಮುಂದಿನ ತನಿಖೆ ನಡೆಸುತ್ತಿದ್ದಾರೆ.