ಪ್ರಧಾನಿ ಮಾರ್ಕ್ ಕಾರ್ನಿ ಭಾರತ ಪ್ರವಾಸಕ್ಕೆ ಸಜ್ಜು! – Canada PM visit India

ಕೆನಡಾದಿಂದ ಭಾರತದೊಂದಿಗೆ ಹದಗೆಟ್ಟ ಸಂಬಂಧ ಸುಧಾರಿಸುವ ಪ್ರಯತ್ನ!

.

ಒಟಾವಾ (ಕೆನಡಾ) – ಕಳೆದ ಕೆಲವು ವರ್ಷಗಳಿಂದ ಕೆನಡಾ ಮತ್ತು ಭಾರತದ ನಡುವೆ ನೆಲೆಸಿದ್ದ ಕಹಿ ಸಂಬಂಧವು ಈಗ ಕೊನೆಗೊಳ್ಳುವಂತೆ ಕಾಣುತ್ತಿದೆ. ಕೆನಡಾದ ನೂತನ ಪ್ರಧಾನಿ ಮಾರ್ಕ್ ಕಾರ್ನಿ ಅವರು ಭಾರತದ ಪ್ರವಾಸ ಕೈಗೊಳ್ಳುತ್ತಿದ್ದಾರೆ. ಜೂನ್ 2023 ರಲ್ಲಿ ಖಲಿಸ್ತಾನಿ ಭಯೋತ್ಪಾದಕ ಹರ್ದೀಪ್ ಸಿಂಗ್ ನಿಜ್ಜರ್ ಹತ್ಯೆಯ ನಂತರ ಉಭಯ ದೇಶಗಳ ನಡುವಿನ ಸಂಬಂಧವು ತೀವ್ರವಾಗಿ ಹದಗೆಟ್ಟಿತ್ತು. ಆ ಸಮಯದಲ್ಲಿ ಕೆನಡಾದ ಅಂದಿನ ಪ್ರಧಾನಿ ಜಸ್ಟಿನ್ ಟ್ರುಡೊ ಅವರು ಸಂಸತ್ತಿನಲ್ಲಿ ಹೇಳಿಕೆ ನೀಡುತ್ತಾ, ‘ಈ ಹತ್ಯಾಕಾಂಡದಲ್ಲಿ ಭಾರತೀಯ ಏಜೆನ್ಸಿಗಳ ಪಾತ್ರವಿರುವ ಸಾಧ್ಯತೆಯಿದೆ’ ಎಂದು ಆರೋಪಿಸಿದ್ದರು.

ಭಾರತವು ಈ ಆರೋಪವನ್ನು ಸಂಪೂರ್ಣವಾಗಿ ತಿರಸ್ಕರಿಸಿ, ಇದು ಆಧಾರರಹಿತ ಮತ್ತು ಅಸಂಬದ್ಧ ಎಂದು ಹೇಳಿತ್ತು. ನಂತರದ ದಿನಗಳಲ್ಲಿ ಪರಿಸ್ಥಿತಿ ಎಷ್ಟು ಹದಗೆಟ್ಟಿತೆಂದರೆ, ಉಭಯ ದೇಶಗಳು ಪರಸ್ಪರ ರಾಜತಾಂತ್ರಿಕ ಅಧಿಕಾರಿಗಳನ್ನು ಉಚ್ಚಾಟಿಸಿದವು, ವೀಸಾ ಸೇವೆಗಳು ಸ್ಥಗಿತಗೊಂಡವು ಮತ್ತು ವ್ಯಾಪಾರ ಮಾತುಕತೆಗಳು ನಿಂತುಹೋದವು. ಕೆನಡಾವು ತನ್ನ ನೆಲದಲ್ಲಿ ಖಲಿಸ್ತಾನಿ ಶಕ್ತಿಗಳಿಗೆ ಮುಕ್ತ ಅವಕಾಶ ನೀಡುತ್ತಿದೆ ಎಂದು ಭಾರತ ಸತತವಾಗಿ ಆರೋಪಿಸುತ್ತಾ ಬಂದಿತ್ತು, ಇದರಿಂದಾಗಿ ನಂಬಿಕೆಯ ಪ್ರಶ್ನೆ ಮತ್ತಷ್ಟು ಗಾಢವಾಯಿತು. ಆದರೆ ಈಗ, 2026 ರಲ್ಲಿ ಪರಿಸ್ಥಿತಿ ಬದಲಾಗುತ್ತಿರುವುದು ಕಂಡುಬರುತ್ತಿದೆ.

ಪ್ರಧಾನಿ ಕಾರ್ನಿ ಅವರ ಭಾರತ ಪ್ರವಾಸಕ್ಕೂ ಮುನ್ನ ಕೆನಡಾದ ಪ್ರಮುಖ ಸುಳಿವು

ಕೆನಡಾದ ನೂತನ ಪ್ರಧಾನಿ ಮಾರ್ಕ್ ಕಾರ್ನಿ ಭಾರತಕ್ಕೆ ಭೇಟಿ ನೀಡುತ್ತಿದ್ದಾರೆ. ಮೊದಲಿಗೆ ಅವರು ಮುಂಬಯಿನಲ್ಲಿ ಉದ್ಯಮ ಕ್ಷೇತ್ರದ ಗಣ್ಯರನ್ನು ಭೇಟಿ ಮಾಡಲಿದ್ದಾರೆ ಮತ್ತು ನಂತರ ನವದೆಹಲಿಯಲ್ಲಿ ಪ್ರಧಾನ ಮಂತ್ರಿ ನರೇಂದ್ರ ಮೋದಿ ಅವರೊಂದಿಗೆ ಪ್ರಮುಖ ಮಾತುಕತೆ ನಡೆಸಲಿದ್ದಾರೆ. ಈ ಪ್ರವಾಸಕ್ಕೂ ಮುನ್ನವೇ ಕೆನಡಾ ತನ್ನ ನಿಲುವಿನಲ್ಲಿ ಗಮನಾರ್ಹ ಬದಲಾವಣೆ ಮಾಡಿಕೊಂಡಿದೆ. ಈ ಬಗ್ಗೆ ಕೆನಡಾದ ಹಿರಿಯ ಅಧಿಕಾರಿಯೊಬ್ಬರು ಮಾಹಿತಿ ನೀಡುತ್ತಾ, ಹಿಂದೆ ಯಾವ ಚಟುವಟಿಕೆಗಳ ಬಗ್ಗೆ ಆರೋಪಗಳು ಕೇಳಿಬಂದಿದ್ದವೋ, ಅವು ಈಗ ನಡೆಯುತ್ತಿಲ್ಲ ಎಂದು ತಿಳಿಸಿದ್ದಾರೆ. ರಾಷ್ಟ್ರೀಯ ಭದ್ರತಾ ಸಲಹೆಗಾರರು ಮತ್ತು ಕಾನೂನು ಜಾರಿ ಸಂಸ್ಥೆಗಳ ನಡುವೆ ನಿರಂತರ ಸಂವಾದ ನಡೆಯುತ್ತಿದ್ದು, ಇಂತಹ ಚಟುವಟಿಕೆಗಳು ಈಗ ನಿಂತಿವೆ ಎಂದು ಅವರು ಹೇಳಿದ್ದಾರೆ. ಪರಿಸ್ಥಿತಿ ಮೊದಲಿನಂತೆಯೇ ಇದ್ದಿದ್ದರೆ, ಈ ಉನ್ನತ ಮಟ್ಟದ ಭೇಟಿ ಸಾಧ್ಯವಾಗುತ್ತಿರಲಿಲ್ಲ ಎಂದು ಇನ್ನೊಬ್ಬ ಅಧಿಕಾರಿ ಉಲ್ಲೇಖಿಸಿದ್ದಾರೆ.

ಭದ್ರತಾ ಸಹಕಾರ ಮತ್ತೆ ಆರಂಭ!

ನಮ್ಮ ನೆಲದಲ್ಲಿ ನಡೆಯುವ ಅಂತರಾಷ್ಟ್ರೀಯ ಅಪರಾಧ ಮತ್ತು ಭದ್ರತಾ ವಿಷಯಗಳ ವಿರುದ್ಧ ಕ್ರಮ ಮುಂದುವರಿಯಲಿದೆ; ಆದರೆ ಭಾರತದೊಂದಿಗೆ ಭದ್ರತೆ ಮತ್ತು ಕಾನೂನು ಜಾರಿ ಮಟ್ಟದಲ್ಲಿ ಸಹಕಾರವನ್ನು ಮತ್ತೆ ಆರಂಭಿಸಲಾಗುತ್ತಿದೆ ಎಂದು ಕೆನಡಾದ ಪ್ರಧಾನಿ ಕಾರ್ಯಾಲಯ ಸ್ಪಷ್ಟಪಡಿಸಿದೆ. ಅಂದರೆ, ಸಂಘರ್ಷದ ಬದಲು ಈಗ ಸಂವಾದ ಮತ್ತು ಸಹಕಾರದ ಹಾದಿಯನ್ನು ಆಯ್ಕೆ ಮಾಡಿಕೊಳ್ಳಲಾಗಿದೆ.

ಕೆನಡಾದ ಸಿಖ್ ಸಮುದಾಯದ ವಿರೋಧ

ಆದಾಗ್ಯೂ, ಕೆನಡಾದ ಸಿಖ್ ಸಮುದಾಯದ ಕೆಲವು ನಾಯಕರು ಈ ಹೊಸ ನಿಲುವಿನ ಬಗ್ಗೆ ಅಸಮಾಧಾನ ವ್ಯಕ್ತಪಡಿಸುತ್ತಿದ್ದಾರೆ. ಬ್ರಿಟಿಷ್ ಕೊಲಂಬಿಯಾದ ಧಾರ್ಮಿಕ ಮುಖಂಡ ಮೊನಿಂದರ್ ಸಿಂಗ್ ಅವರು ‘ಟೊರೊಂಟೊ ಸ್ಟಾರ್’ ದಿನಪತ್ರಿಕೆಯೊಂದಿಗೆ ಮಾತನಾಡುತ್ತಾ, “ನಿಜ್ಜರ್ ಹತ್ಯೆಯ ನಂತರ ನಮಗೆ ಹಲವು ಬಾರಿ ಭದ್ರತಾ ಎಚ್ಚರಿಕೆಗಳು ಬಂದಿದ್ದವು. ಈಗ ಈ ಹೊಸ ರಾಜತಾಂತ್ರಿಕ ಬದಲಾವಣೆಯು ಒಂದು ವಿಶ್ವಾಸದ್ರೋಹವಾಗಿದೆ” ಎಂದು ಹೇಳಿದ್ದಾರೆ.

ಆದರೆ, ಕೆನಡಾದ ವ್ಯಾಪಾರ ಸಚಿವ ಮನಿಂದರ್ ಸಿಧು ಅವರು, ದೇಶವು ಆಂತರಿಕ ಭದ್ರತೆ ಮತ್ತು ಅಂತರಾಷ್ಟ್ರೀಯ ಆರ್ಥಿಕ ಹಿತಾಸಕ್ತಿಗಳ ನಡುವೆ ಸಮತೋಲನ ಕಾಯ್ದುಕೊಳ್ಳಲು ಸಾಧ್ಯವಿದೆ ಎಂದು ತಿಳಿಸಿದ್ದಾರೆ.

ಕೆನಡಾದ ಅಪರಾಧಗಳಿಗೂ ಭಾರತಕ್ಕೂ ಸಂಬಂಧವಿಲ್ಲ! – ಪ್ರಧಾನಿಯವರ ಪ್ರವಾಸಕ್ಕೂ ಮುನ್ನ ಕಾರ್ನಿ ಸರಕಾರದ ಸ್ಪಷ್ಟನೆ

ಕೆನಡಾದಲ್ಲಿ ನಡೆಯುತ್ತಿರುವ ಹಿಂಸಾತ್ಮಕ ಅಪರಾಧಗಳಿಗೂ ಭಾರತಕ್ಕೂ ಯಾವುದೇ ಸಂಬಂಧವಿಲ್ಲ ಎಂಬುದು ಸರಕಾರದ ಅಭಿಪ್ರಾಯ ಎಂದು ಕೆನಡಾದ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ. ಇಂತಹ ಚಟುವಟಿಕೆಗಳು ಮುಂದುವರಿದಿದ್ದರೆ ಪ್ರಧಾನಿ ಕಾರ್ನಿ ಅವರ ಭಾರತ ಪ್ರವಾಸ ಇರುತ್ತಿರಲಿಲ್ಲ ಎಂದು ಮತ್ತೊಬ್ಬ ಅಧಿಕಾರಿ ಸ್ಪಷ್ಟಪಡಿಸಿದ್ದಾರೆ. ಕಾರ್ನಿ ಅವರು 9 ದಿನಗಳ ಭಾರತ ಪ್ರವಾಸಕ್ಕೆ ಆಗಮಿಸುತ್ತಿದ್ದಾರೆ.