ದೆಹಲಿ ಕಲ್ಲುತೂರಾಟ ಪ್ರಕರಣ: ಸಮಾಜವಾದಿ ಪಕ್ಷದ ಸಂಸದ ಮೊಹಿಬುಲ್ಲಾ ನದ್ವಿ ವಿಚಾರಣೆ ಸಾಧ್ಯತೆ! : MP Mohibbullah Nadvi

ಪೊಲೀಸರು ಸ್ಥಳದಿಂದ ಹೊರಹೋಗುವಂತೆ ಸೂಚಿಸಿದರೂ ಘಟನಾ ಸ್ಥಳದ ಸುತ್ತಮುತ್ತಲೇ ಸುಳಿದಾಡುತ್ತಿದ್ದ ಕಾರಣ ಸಂಶಯದ ಸುಳಿಗೆ

ನವದೆಹಲಿ – ಜನವರಿ 6ರ ರಾತ್ರಿ ದೆಹಲಿ ಮಹಾನಗರ ಪಾಲಿಕೆಯು ‘ಫೈಜ್-ಎ-ಇಲಾಹಿ’ ಮಸೀದಿಯ ಸಮೀಪವಿದ್ದ ಅತಿಕ್ರಮಣ ತೆರವುಗೊಳಿಸುತ್ತಿದ್ದಾಗ, ‘ಮಸೀದಿಯನ್ನು ಕೆಡವಲಾಗುತ್ತಿದೆ’ ಎಂಬ ವದಂತಿ ಹಬ್ಬಿಸಲಾಯಿತು. ಈ ವೇಳೆ ಪೊಲೀಸರ ಮೇಲೆ ನಡೆದ ಕಲ್ಲುತೂರಾಟದ ಪ್ರಕರಣಕ್ಕೆ ಸಂಬಂಧಿಸಿದಂತೆ ಪೊಲೀಸರು ಈಗ ಸಮಾಜವಾದಿ ಪಕ್ಷದ ಸಂಸದ ಮೊಹಿಬುಲ್ಲಾ ನದ್ವಿ ಅವರನ್ನು ವಿಚಾರಣೆ ನಡೆಸಲಿದ್ದಾರೆ. ಘಟನೆಯ ಸಮಯದಲ್ಲಿ ಪೊಲೀಸರು ನದ್ವಿ ಅವರನ್ನು ಅಲ್ಲಿಂದ ಓಡಿಸಿದರೂ ಸಹ, ಅವರು ಘಟನಾ ಸ್ಥಳದ ಆಸುಪಾಸಿನಲ್ಲೇ ಸುಳಿದಾಡುತ್ತಿದ್ದರು. ಇದು ಪೊಲೀಸರ ಸಂಶಯಕ್ಕೆ ಕಾರಣವಾಗಿದೆ. ಕಲ್ಲುತೂರಾಟದ ಪ್ರಕರಣಕ್ಕೆ ಸಂಬಂಧಿಸಿದಂತೆ ಪೊಲೀಸರು ಸಿಸಿಟಿವಿ ದೃಶ್ಯಾವಳಿಗಳನ್ನು ಪರಿಶೀಲಿಸಿದ್ದು, 30 ಜನರನ್ನು ಗುರುತಿಸಿದ್ದಾರೆ. ಅವರ ಬಂಧನಕ್ಕಾಗಿ ಪೊಲೀಸರ ವಿವಿಧ ತಂಡಗಳು ಹಲವು ಭಾಗಗಳಲ್ಲಿ ದಾಳಿ ನಡೆಸುತ್ತಿವೆ.

ಕಲ್ಲುತೂರಾಟದ ಘಟನೆಯನ್ನು ಸಮರ್ಥಿಸಿಕೊಂಡ ಸಮಾಜವಾದಿ ಪಕ್ಷದ ನಾಯಕ ಎಸ್.ಟಿ. ಹಸನ್ ಅವರು, “ಇಲ್ಲಿ 100 ವರ್ಷ ಹಳೆಯದಾದ ಮಸೀದಿ ಮತ್ತು ಅಂಗಡಿಗಳಿವೆ. ಅತಿಕ್ರಮಣದ ಹೆಸರಿನಲ್ಲಿ ದೌರ್ಜನ್ಯ ನಡೆದರೆ ಜನರು ಎಷ್ಟು ದಿನ ಸುಮ್ಮನಿರಲು ಸಾಧ್ಯ? ಒಂದು ವೇಳೆ ಇಂತಹದ್ದೇ ಕ್ರಮ ಎಲ್ಲೆಡೆ ನಡೆದಿದ್ದರೆ ಜನರು ತಾಳ್ಮೆಯಿಂದ ಇರುತ್ತಿದ್ದರು. ಇಂತಹ ವಿಷಯಗಳು ಜನರ ಭಾವನೆ ಮತ್ತು ನಂಬಿಕೆಗೆ ಸಂಬಂಧಿಸಿರುವುದರಿಂದ, ಅವರ ಧಾರ್ಮಿಕ ಸ್ಥಳಗಳ ವಿರುದ್ಧದ ಯಾವುದೇ ಕ್ರಮಕ್ಕೆ (ಆಕ್ಷನ್) ಪ್ರತಿಕ್ರಿಯೆ (ರಿಯಾಕ್ಷನ್) ಬಂದೇ ಬರುತ್ತದೆ. ಅತಿಕ್ರಮಣ ತೆರವುಗೊಳಿಸುವ ಹೆಸರಿನಲ್ಲಿ ದೌರ್ಜನ್ಯ ಎಸಗಲಾಗುತ್ತಿದೆ. ಒಂದು ವೇಳೆ ಅತಿಕ್ರಮಣ ನಡೆದಿದ್ದರೆ, ಅದಕ್ಕೆ ಸಂಬಂಧಪಟ್ಟ ಅಧಿಕಾರಿಗಳ ವಿರುದ್ಧ ಕ್ರಮ ಕೈಗೊಳ್ಳಬೇಕು” ಎಂದು ಹೇಳಿದ್ದಾರೆ.