ನಾಯಿ ಕಚ್ಚಿ ವ್ಯಕ್ತಿ ಮೃತಪಟ್ಟರೆ, ಕುಟುಂಬಕ್ಕೆ ರಾಜ್ಯ ಸರಕಾರದಿಂದ ₹ ೫ ಲಕ್ಷ ಪರಿಹಾರ! : Karnataka Dog Attacks

ಗಾಯಗೊಂಡವರಿಗೆ ₹ ೫ ಸಾವಿರ ಸಿಗಲಿದೆ!

ಬೆಂಗಳೂರು – ನಾಯಿ ಕಚ್ಚಿ ವ್ಯಕ್ತಿ ಮೃತಪಟ್ಟರೆ, ಆತನ ಕುಟುಂಬಕ್ಕೆ ಪರಿಹಾರವಾಗಿ ₹ ೫ ಲಕ್ಷ ನೀಡಲು ರಾಜ್ಯ ಸರಕಾರ ನಿರ್ಧರಿಸಿದೆ. ಇದರೊಂದಿಗೆ ನಾಯಿ ಕಚ್ಚಿ ಗಾಯಗೊಂಡವರಿಗೆ ₹ ೫ ಸಾವಿರ ನೀಡಲಾಗುವುದು. ರಾಜ್ಯದಲ್ಲಿ ನಾಯಿಗಳ ದಾಳಿಯ ಹೆಚ್ಚುತ್ತಿರುವ ಘಟನೆಗಳ ಹಿನ್ನೆಲೆಯಲ್ಲಿ ಸರಕಾರವು ಈ ಕ್ರಮ ಕೈಗೊಂಡಿದೆ.

ನಾಯಿ ಕಚ್ಚಿದ್ದಕ್ಕೆ ಚರ್ಮದ ಮೇಲೆ ರಂಧ್ರ, ಆಳವಾದ ಗಾಯ, ದೇಹದ ಮೇಲೆ ನೀಲಿ-ಕಪ್ಪು ಗುರುತುಗಳು ಮೂಡಿದರೆ, ಸಂಬಂಧಪಟ್ಟ ಸಂತ್ರಸ್ತರಿಗೆ ₹ ೫ ಸಾವಿರ ಸಿಗಲಿದೆ. ಇದರಲ್ಲಿ ₹ ೩ ಸಾವಿರದ ೫೦೦ ರೂಪಾಯಿ ನೇರವಾಗಿ ಸಂತ್ರಸ್ತರಿಗೆ ನೀಡಲಾಗುವುದು, ಉಳಿದ ಹಣವನ್ನು ‘ಸುವರ್ಣ ಆರೋಗ್ಯ ಸುರಕ್ಷಾ ಟ್ರಸ್ಟ್’ಗೆ ನೀಡಲಾಗುವುದು ಮತ್ತು ಆ ಮೂಲಕ ಚಿಕಿತ್ಸೆಯ ವೆಚ್ಚವನ್ನು ಭರಿಸಲಾಗುವುದು.

ತಮಿಳುನಾಡು ರಾಜ್ಯದಲ್ಲೂ ನಾಯಿಗಳ ಕಾಟ!

ಕಾಂಗ್ರೆಸ್ ನಾಯಕ ಪಿ. ಚಿದಂಬರಂ ಅವರು ತಮಿಳುನಾಡಿನಲ್ಲಿ ಹೆಚ್ಚುತ್ತಿರುವ ನಾಯಿಗಳ ದಾಳಿ ಮತ್ತು ರೇಬೀಸ್‌ನಿಂದ ಹಲವರು ಮೃತಪಟ್ಟಿರುವುದರ ಬಗ್ಗೆ ಕಳವಳ ವ್ಯಕ್ತಪಡಿಸಿದ್ದಾರೆ. ಅವರ ಪ್ರಕಾರ, ೨೦೨೪ ರಲ್ಲಿ ತಮಿಳುನಾಡಿನಲ್ಲಿ ನಾಯಿ ಕಚ್ಚಿದ ೫ ಲಕ್ಷಕ್ಕೂ ಹೆಚ್ಚು ಘಟನೆಗಳು ದಾಖಲಾಗಿದ್ದು, ೨೮ ಜನರು ರೇಬೀಸ್‌ನಿಂದ ಮೃತಪಟ್ಟಿದ್ದಾರೆ. ಸಾರ್ವಜನಿಕ ಸುರಕ್ಷತೆಯ ದೃಷ್ಟಿಯಿಂದ ಬೀದಿ ನಾಯಿಗಳ ಲಸಿಕೆ, ಸಂತಾನಶಕ್ತಿಹರಣ ಮತ್ತು ವ್ಯವಸ್ಥಿತ ನಿಯಂತ್ರಣ ಅಗತ್ಯ ಎಂದು ಅವರು ತಿಳಿಸಿದ್ದಾರೆ.