ರಿಯೋ ಡಿ ಜನೈರೋ (ಬ್ರೆಜಿಲ್)ದಲ್ಲಿ ಮಾದಕ ವಸ್ತು ಮಾಫಿಯಾಗಳ ವಿರುದ್ಧ ಕಾರ್ಯಾಚರಣೆ

ರಿಯೋ ಡಿ ಜನೈರೋ (ಬ್ರೆಜಿಲ್) – ಇಲ್ಲಿನ ಪೊಲೀಸರು ಮಾದಕ ವಸ್ತು ಮಾಫಿಯಾಗಳ ವಿರುದ್ಧ ಕೈಗೊಂಡ ಇಲ್ಲಿಯವರೆಗಿನ ಅತಿದೊಡ್ಡ ಕಾರ್ಯಾಚರಣೆಯಲ್ಲಿ ೪ ಪೊಲೀಸರು ಸೇರಿದಂತೆ ೬೪ ಜನರು ಮೃತಪಟ್ಟರು. ಪೊಲೀಸರು ೮೦ ಕ್ಕೂ ಹೆಚ್ಚು ಜನರನ್ನು ಬಂಧಿಸಿದ್ದಾರೆ. ‘ರೆಡ್ ಕಮಾಂಡ್’ ಎಂದು ಗುರುತಿಸಲಾದ ಕುಖ್ಯಾತ ಗ್ಯಾಂಗ್‌ನ ವಿರುದ್ಧ ಈ ಕಾರ್ಯಾಚರಣೆಯನ್ನು ಆರಂಭಿಸಲಾಯಿತು. ೨ ಸಾವಿರ ೫೦೦ ಪೊಲೀಸರು ಈ ಕಾರ್ಯಾಚರಣೆಯನ್ನು ನಡೆಸಿದರು.

ಪೊಲೀಸರು ಕಾರ್ಯಾಚರಣೆ ಆರಂಭಿಸುತ್ತಿದ್ದಂತೆ ರೆಡ್ ಕಮಾಂಡ್ ಗ್ಯಾಂಗ್‌ನ ಗೂಂಡಾಗಳು ಅವರ ಮೇಲೆ ಗುಂಡು ಹಾರಿಸಿದರು, ಹಾಗೆಯೇ ಡ್ರೋನ್‌ಗಳಿಂದ ಬಾಂಬ್‌ಗಳನ್ನು ಎಸೆದರು. ಇದಕ್ಕೆ ಪೊಲೀಸರು ಸೂಕ್ತ ಪ್ರತ್ಯುತ್ತರ ನೀಡಿದರು. ಈ ಕಾರ್ಯಾಚರಣೆಯಿಂದಾಗಿ ಹತ್ತಿರದಲ್ಲಿ ವಾಸಿಸುವ ನಿವಾಸಿಗಳಲ್ಲಿ ಭಯ ಹರಡಿತು, ಅವರು ಪರಿಸ್ಥಿತಿಯನ್ನು ‘ಯುದ್ಧಭೂಮಿ’ ಎಂದು ವಿವರಿಸುತ್ತಿದ್ದಾರೆ. ಈ ಗುಂಡಿನ ದಾಳಿಯಲ್ಲಿ ಅನೇಕ ನಾಗರಿಕರು ಸಹ ಗಾಯಗೊಂಡರು. ಈ ಕಾರ್ಯಾಚರಣೆಯಲ್ಲಿ ೨೦೦ ಕೆಜಿಗಿಂತಲೂ ಹೆಚ್ಚು ಮಾದಕ ವಸ್ತುಗಳು, ಅನೇಕ ರೈಫಲ್‌ಗಳು ಮತ್ತು ಇತರ ಶಸ್ತ್ರಾಸ್ತ್ರಗಳನ್ನು ವಶಪಡಿಸಿಕೊಳ್ಳಲಾಗಿದೆ.