15 ವರ್ಷಗಳ ಗರಿಷ್ಠ ಮಟ್ಟಕ್ಕೆ ತಲುಪಿದ ಸೇವಾ ವಲಯದ ಬೆಳವಣಿಗೆ ದರ!

ನವದೆಹಲಿ – ಬೇಡಿಕೆಯ ಪರಿಸ್ಥಿತಿಯಲ್ಲಿ ಗಮನಾರ್ಹ ಸುಧಾರಣೆ ಮತ್ತು ಉತ್ಪಾದನೆಯಲ್ಲಿನ ಹೆಚ್ಚಳದಿಂದಾಗಿ, ಆಗಸ್ಟ್‌ನಲ್ಲಿ ದೇಶದ ಸೇವಾ ವಲಯದ (ಸರ್ವೀಸ್ ಸೆಕ್ಟರ್) ಬೆಳವಣಿಗೆಯ ದರವು 15 ವರ್ಷಗಳ ಗರಿಷ್ಠ ಮಟ್ಟಕ್ಕೆ ತಲುಪಿದೆ. ಸಪ್ಟೆಂಬರ್ 3 ರಂದು ಪ್ರಕಟವಾದ ಮಾಸಿಕ ಸಮೀಕ್ಷೆಯಲ್ಲಿ ಈ ಮಾಹಿತಿ ನೀಡಲಾಗಿದೆ. 50 ಕ್ಕಿಂತ ಹೆಚ್ಚು ಅಂಕಗಳು ಚಟುವಟಿಕೆಗಳಲ್ಲಿನ ವಿಸ್ತರಣೆಯನ್ನು ಮತ್ತು 50 ಕ್ಕಿಂತ ಕಡಿಮೆ ಅಂಕಗಳ ಕುಗ್ಗುವಿಕೆಯನ್ನು ಸೂಚಿಸುತ್ತವೆ.

‘ಎಚ್.ಎಸ್.ಬಿ.ಸಿ.’ಯ ಭಾರತದ ಮುಖ್ಯ ಅರ್ಥಶಾಸ್ತ್ರಜ್ಞರಾದ ಪ್ರಾಂಜುಲ್ ಭಂಡಾರಿ ಅವರು ಈ ಕುರಿತು ಮಾತನಾಡಿ, ಸೇವಾ ಚಟುವಟಿಕೆಗಳ ಬೆಳವಣಿಗೆಯ ದರವು 15 ವರ್ಷಗಳ ಗರಿಷ್ಠ ಮಟ್ಟಕ್ಕೆ ತಲುಪಿದೆ. ಹೊಸ ಬೇಡಿಕೆಗಳಲ್ಲಿನ ಹೆಚ್ಚಳದಿಂದಾಗಿ ಜುಲೈನಲ್ಲಿ 60.5 ಅಂಕಗಳಿಂದ ಆಗಸ್ಟ್‌ನಲ್ಲಿ 62.9 ಅಂಕಗಳಿಗೆ ತಲುಪಿದೆ. ಬೆಲೆಗಳ ವಿಷಯದಲ್ಲಿ, ಹಣದುಬ್ಬರ ದರವು 9 ತಿಂಗಳ ಗರಿಷ್ಠ ಮಟ್ಟಕ್ಕೆ ತಲುಪಿದೆ. ಬೇಡಿಕೆಯಲ್ಲಿನ ಹೆಚ್ಚಳದಿಂದಾಗಿ ಜುಲೈ 2012 ರ ನಂತರ ಉತ್ಪಾದನಾ ಶುಲ್ಕದಲ್ಲಿ ಅತ್ಯಂತ ವೇಗದ ಹೆಚ್ಚಳ ಸಾಧ್ಯವಾಗಿದೆ ಎಂದು ವಿವರಿಸಿದರು.