ಸೈಬರ್ ಅಪರಾಧಗಳಿಂದ ಕೋಟಿಗಟ್ಟಲೆ ಹಣ ಗಳಿಸಿದ್ದ ಸರಿಫುಲ್ ಇಸ್ಲಾಂ ಎಂಬಾತನ ಬಂಧನ

ಕೊಲಕಾತಾ (ಬಂಗಾಳ) – ಸೈಬರ್ ಅಪರಾಧಗಳ ಮುಖ್ಯ ಸೂತ್ರಧಾರ ಸರಿಫುಲ್ ಇಸ್ಲಾಂ ಎಂಬಾತನನ್ನು ಅಸ್ಸಾಂ ಪೊಲೀಸರು ಕೊಲಕಾತಾದಲ್ಲಿ ಬಂಧಿಸಿದ್ದಾರೆ. ಈತ ಕಳೆದ ಒಂದೂವರೆ ವರ್ಷದಿಂದ ತಲೆಮರೆಸಿಕೊಂಡಿದ್ದನು. ಈತ, ಜನರನ್ನು ಆನ್‌ಲೈನ್ ಬಲೆಗೆ ಬೀಳಿಸಿ ಕೋಟಿಗಟ್ಟಲೆ ಹಣ ದೋಚುತ್ತಿದ್ದ. ಇವನ ವಿರುದ್ಧ ಕನಿಷ್ಠ 12 ರಾಜ್ಯಗಳಲ್ಲಿ ಸೈಬರ್ ವಂಚನೆಯ ಪ್ರಕರಣಗಳು ದಾಖಲಾಗಿವೆ.

ಅಸ್ಸಾಂನ ಮೋರಿಗಾಂವ್ ಪೊಲೀಸರು ಆಗಸ್ಟ್ 8ರಂದು ಆತನನ್ನು ಕೊಲಕಾತಾದಲ್ಲಿ ಬಂಧಿಸಿದರು. ಇವನು ಅಡಗಿಕೊಂಡು ವಿವಿಧ ರಾಜ್ಯಗಳಲ್ಲಿ ಆನ್‌ಲೈನ್ ವಂಚನೆ ನಡೆಸುತ್ತಿದ್ದ ಎಂದು ಪೊಲೀಸರು ತಿಳಿಸಿದರು. ಸರಿಫುಲ್‌ನಿಂದ 20 ಬ್ಯಾಂಕ್ ಖಾತೆಗಳು, 16 ಪ್ಯಾನ್ ಕಾರ್ಡ್‌ಗಳು ಮತ್ತು ಅನೇಕ ಕಾನೂನುಬಾಹಿರ ಸಿಮ್ ಕಾರ್ಡ್‌ಗಳನ್ನು ವಶಪಡಿಸಿಕೊಳ್ಳಲಾಗಿದೆ. ಇವನು ತನ್ನ ಅಕ್ರಮ ಸಂಪಾದನೆಯಿಂದ ಅಸ್ಸಾಂನಲ್ಲಿ ಭೂಮಿಯನ್ನು ಕೂಡ ಖರೀದಿಸಿದ್ದನು, ಅದನ್ನೂ ಸಹ ಪೊಲೀಸರು ನಿಯಂತ್ರಣಕ್ಕೆ ತೆಗೆದುಕೊಂಡಿದ್ದಾರೆ.