‘ಹಿಂದೂ ಭಯೋತ್ಪಾದನೆ’ಯೆಂದು ಬಿಂಬಿಸಲು ಐಎಸ್‌ಐ ಕಾಂಗ್ರೆಸ್ ಅನ್ನು ಬಳಸಿಕೊಂಡಿತ್ತು!

(ಐಎಸ್‌ಐ ಎಂದರೆ ಇಂಟರ್-ಸರ್ವೀಸಸ್ ಇಂಟೆಲಿಜೆನ್ಸ್ – ಪಾಕಿಸ್ತಾನದ ಗುಪ್ತಚರ ಸಂಸ್ಥೆ)

ಮುಂಬಯಿ, ಆಗಸ್ಟ್ 7 – ಸಿಮಿ (SIMI) ಸಂಘಟನೆಯ ಭಯೋತ್ಪಾದಕರು ಬಾಂಬ್‌ಗಳನ್ನು ತಯಾರಿಸುತ್ತಿದ್ದಾಗ ಮಾಲೇಗಾಂವ್‌ನಲ್ಲಿ ಸ್ಫೋಟ ಸಂಭವಿಸಿರುವ ಸಾಧ್ಯತೆ ಇದೆ. ತನಿಖಾ ಸಂಸ್ಥೆಗಳು ಇದರ ಬಗ್ಗೆ ಪರಿಶೀಲಿಸಿದರೆ ಸತ್ಯ ಹೊರಬೀಳುತ್ತದೆ. ‘ಹಿಂದೂ ಭಯೋತ್ಪಾದನೆ’ಯ ಸಂಚು ಕೂಡ ಪಾಕಿಸ್ತಾನದಲ್ಲಿಯೇ ರೂಪುಗೊಂಡಿತ್ತು. ಪಾಕಿಸ್ತಾನದ ಗುಪ್ತಚರ ಸಂಸ್ಥೆ ‘ಐಎಸ್‌ಐ’ ಇದಕ್ಕಾಗಿ ಕಾಂಗ್ರೆಸ್ ಅನ್ನು ದಾಳವಾಗಿ ಬಳಸಿಕೊಂಡಿತು. 2009ರ ಚುನಾವಣೆಯಲ್ಲಿ ಹಿಂದೂಗಳನ್ನು ಭಯೋತ್ಪಾದಕರೆಂದು ಬಿಂಬಿಸಲು ಈ ಸಂಚು ರೂಪಿಸಲಾಗಿತ್ತು ಮತ್ತು ಇದಕ್ಕೆ ಚೀನಾ ಸಹ ನೆರವು ನೀಡಿತ್ತು ಎಂದು ಮೇಜರ್ ರಮೇಶ ಉಪಾಧ್ಯಾಯ ಇವರು ಗಂಭೀರ ಆರೋಪ ಮಾಡಿದ್ದಾರೆ. ‘2008ರ ಮಾಲೇಗಾಂವ್ ಬಾಂಬ್ ಸ್ಫೋಟ’ ಪ್ರಕರಣದಿಂದ ಖುಲಾಸೆಗೊಂಡ ಹಿಂದೂಗಳು ಆಗಸ್ಟ್ 7 ರಂದು ಸ್ವಾತಂತ್ರ್ಯವೀರ ಸಾವರ್ಕರ್ ರಾಷ್ಟ್ರೀಯ ಸ್ಮಾರಕದಲ್ಲಿ ಪತ್ರಿಕಾಗೋಷ್ಠಿ ನಡೆಸಿ ಈ ಗಂಭೀರ ಆರೋಪಗಳನ್ನು ಮಾಡಿದರು. ಈ ಸಂದರ್ಭದಲ್ಲಿ ಸುಧಾಕರ ಚತುರ್ವೇದಿ, ರಾಕೇಶ ಧಾವಡೆ, ಸಮೀರ್ ಕುಲಕರ್ಣಿ, ಶ್ಯಾಮ ಸಾಹು ಮತ್ತು ಜಗದೀಶ ಮ್ಹಾತ್ರೆ ಉಪಸ್ಥಿತರಿದ್ದರು.

ಕಾಂಗ್ರೆಸ್ ನಾಯಕರು ಪಾಕಿಸ್ತಾನದ ಕೈಗೊಂಬೆಯಂತೆ ಮಾತನಾಡುತ್ತಿದ್ದಾರೆ!

ರಮೇಶ ಉಪಾಧ್ಯಾಯ ಅವರು, “2008ರ ನವೆಂಬರ್ 26ರ (26/11) ಮುಂಬಯಿ ಮೇಲಿನ ಭಯೋತ್ಪಾದಕ ದಾಳಿಯ ಅಪವಾದವನ್ನು ಹಿಂದೂಗಳ ಮೇಲೆ ಹೊರಿಸಲು ಪಾಕಿಸ್ತಾನ ಸಂಚು ರೂಪಿಸಿತ್ತು. ಅದಕ್ಕಾಗಿಯೇ ದಾಳಿಕೋರರು ಕೇಸರಿ ದಾರಗಳನ್ನು ಕೈಗೆ ಕಟ್ಟಿಕೊಂಡಿದ್ದರು. ‘ಸಮೀರ್ ಚೌಧರಿ’ ಎಂಬ ನಕಲಿ ಹೆಸರಿನಲ್ಲಿ ಕಸಬ್ ಮುಂಬಯಿಯಲ್ಲಿ ಓಡಾಡುತ್ತಿದ್ದನು. ಆದರೆ, ಆತ ಜೀವಂತವಾಗಿ ಸಿಕ್ಕಿದ್ದರಿಂದ ಹಿಂದೂಗಳನ್ನು ಭಯೋತ್ಪಾದಕರೆಂದು ಬಿಂಬಿಸುವ ಸಂಚು ವಿಫಲವಾಯಿತು. ಸ್ಫೋಟವು ಸಾಧ್ವಿ ಪ್ರಜ್ಞಾ ಸಿಂಗ್ ಅವರ ದ್ವಿಚಕ್ರ ವಾಹನದಲ್ಲಿ ಸಂಭವಿಸಿತು ಎಂಬುದಕ್ಕೆ ಯಾವುದೇ ಪುರಾವೆ ಇಲ್ಲ. ನಾವು ಮಾಲೇಗಾಂವ್‌ಗೆ ಎಂದಿಗೂ ಹೋಗಿರಲಿಲ್ಲ. ‘ಆಪರೇಷನ್ ಸಿಂದೂರ್’ನಲ್ಲೂ ಕಾಂಗ್ರೆಸ್ ನಾಯಕರು ಪಾಕಿಸ್ತಾನದ ಭಾಷೆಯನ್ನೇ ಮಾತನಾಡಿದರು. ಕಾಂಗ್ರೆಸ್ ನಾಯಕರು ಪಾಕಿಸ್ತಾನದ ಕೈಗೊಂಬೆಯಂತೆ ಹೇಳಿಕೆಗಳನ್ನು ನೀಡುತ್ತಿದ್ದಾರೆ,” ಎಂದು ಹೇಳಿದರು.

ಹಿಂದೂಗಳನ್ನು ಭಯೋತ್ಪಾದಕರು ಎಂದು ಕರೆದ ಪೃಥ್ವಿರಾಜ್ ಚವ್ಹಾಣ್ ಮುಂದಿನ ಚುನಾವಣೆಯಲ್ಲಿ ಗೆದ್ದು ತೋರಿಸಲಿ! – ಸಮೀರ್ ಕುಲಕರ್ಣಿ

“ಬ್ರಿಟಿಷರು ಭಾರತವನ್ನು ಆಳಿದಾಗಲೂ ಕ್ರಾಂತಿಕಾರಿಗಳನ್ನು ಭಯೋತ್ಪಾದಕರು ಎಂದು ಕರೆದಿರಲಿಲ್ಲ. ಆದರೆ, ಕಾಂಗ್ರೆಸ್ ಅಧಿಕಾರಕ್ಕಾಗಿ ಹಿಂದೂಗಳನ್ನು ಭಯೋತ್ಪಾದಕರೆಂದು ಕರೆಯುವ ಕೆಳಮಟ್ಟದ ರಾಜಕೀಯ ಮಾಡಿದೆ. ಮಾಲೇಗಾಂವ್ ಬಾಂಬ್ ಸ್ಫೋಟಕ್ಕೂ ನಮಗೂ ಯಾವುದೇ ಸಂಬಂಧ ಇರಲಿಲ್ಲ. ನಾವು ನಿರಪರಾಧಿಗಳಾಗಿದ್ದೆವು. ಬಹುಸಂಖ್ಯಾತ ಹಿಂದೂಗಳ ಮತಗಳಿಂದ ಅಧಿಕಾರ ಪಡೆದು, ಹಿಂದೂಗಳನ್ನು ಭಯೋತ್ಪಾದಕರೆಂದು ಕರೆಯುವಾಗ ಪೃಥ್ವಿರಾಜ್ ಚವ್ಹಾಣ್ ಅವರಿಗೆ ನಾಚಿಕೆಯಾಗಬೇಕು. ಮುಂದಿನ ಚುನಾವಣೆಯಲ್ಲಿ ಪೃಥ್ವಿರಾಜ್ ಚವ್ಹಾಣ್ ಸ್ಪರ್ಧಿಸಿ ಗೆದ್ದು ತೋರಿಸಲಿ,” ಎಂದು ಸಮೀರ್ ಕುಲಕರ್ಣಿ ಸವಾಲು ಹಾಕಿದರು.

ಕಾಂಗ್ರೆಸ್ ಮತಕ್ಕಾಗಿ ಹಿಂದೂಗಳ ಮತ್ತು ಕೇಸರಿ ಬಣ್ಣಕ್ಕೆ ಅವಮಾನ ಮಾಡಿತು! – ಶ್ಯಾಮ ಸಾಹು

“ಮತಗಳಿಗಾಗಿ ಎಷ್ಟು ಜನರನ್ನು ಜೈಲಿಗೆ ಹಾಕಿದರು, ಎಷ್ಟು ಜನರ ಜೀವನವನ್ನು ಹಾಳುಮಾಡಿದರು ಎಂಬುದರ ಬಗ್ಗೆ ಕಾಂಗ್ರೆಸ್‌ಗೆ ಯಾವುದೇ ಚಿಂತೆ ಇಲ್ಲ. ಮತಗಳಿಗಾಗಿ ಕಾಂಗ್ರೆಸ್ ಹಿಂದೂಗಳ ಮತ್ತು ಕೇಸರಿ ಬಣ್ಣದ ಅವಮಾನ ಮಾಡಿದೆ. ಹಿಂದೂ ನಾಯಕರನ್ನು ಅವಮಾನಿಸಲು ನಮ್ಮ ಮೇಲೆ ಅವರ ಹೆಸರುಗಳನ್ನು ಹೇಳುವಂತೆ ಒತ್ತಡ ಹೇರಲಾಯಿತು,” ಎಂದು ಶ್ಯಾಮ ಸಾಹು ಆರೋಪಿಸಿದರು.

ಕಾಂಗ್ರೆಸ್ ಪಕ್ಷ ಮುಳುಗಲಿದೆ! – ಸುಧಾಕರ ಚತುರ್ವೇದಿ

ಶ್ರೀ. ಸುಧಾಕರ ಚತುರ್ವೇದಿ ಅವರು, “ಕಾಂಗ್ರೆಸ್ ಪಕ್ಷ ಮುಳುಗುತ್ತಿದೆ. ಅದಕ್ಕಾಗಿಯೇ ಅವರು ಹಿಂದೂಗಳನ್ನು ಭಯೋತ್ಪಾದಕರೆಂದು ಬಿಂಬಿಸಲು ಪ್ರಯತ್ನಿಸುತ್ತಿದ್ದಾರೆ. ಇದರಿಂದ ಉಳಿದಿರುವ ಕಾಂಗ್ರೆಸ್ ಕೂಡ ಸಂಪೂರ್ಣವಾಗಿ ಮುಳುಗಲಿದೆ. ಪೃಥ್ವಿರಾಜ್ ಚವ್ಹಾಣ್ ಮುಖಕ್ಕೆ ಹೊಡೆದವರಿಗೆ ನಾನು 2 ಲಕ್ಷ ರೂಪಾಯಿ ಬಹುಮಾನ ನೀಡುತ್ತೇನೆ,” ಎಂದು ಹೇಳಿದರು.

ಕೇವಲ ಧಾವಡೆ ಅವರ ಸ್ನೇಹಿತನಾದ ಕಾರಣ ನನ್ನ ಬಂಧನ! – ಜಗದೀಶ್ ಮ್ಹಾತ್ರೆ

“ಕೇವಲ ರಾಕೇಶ ಧಾವಡೆ ಅವರ ಸ್ನೇಹಿತನಾಗಿದ್ದರಿಂದ ನನ್ನನ್ನು ಬಂಧಿಸಲಾಯಿತು. ಮಾಲೇಗಾಂವ್ ಸ್ಫೋಟಕ್ಕೂ ನನಗೂ ಯಾವುದೇ ಸಂಬಂಧ ಇರಲಿಲ್ಲ; ಆದರೂ ನನ್ನನ್ನು 5 ವರ್ಷಗಳ ಕಾಲ ಜೈಲಿನಲ್ಲಿ ಇಡಲಾಗಿತ್ತು,” ಎಂದು ಶ್ರೀ. ಜಗದೀಶ ಮ್ಹಾತ್ರೆ ತಮ್ಮ ನೋವನ್ನು ವ್ಯಕ್ತಪಡಿಸಿದರು.