ಭಾರತವನ್ನು ದಮನಕಾರಿ ದೇಶಗಳ ಪಟ್ಟಿಯಲ್ಲಿ ಸೇರಿಸಿದ ಬ್ರಿಟಿಷ್ ಸಂಸದೀಯ ಸಮಿತಿ!

ಬ್ರಿಟಿಷ್ ಜನರ ಧ್ವನಿ ಅಡಗಿಸುವ ಪ್ರಯತ್ನ ಎಂದು ಆರೋಪ

ಲಂಡನ್ (ಬ್ರಿಟನ್) – ‘ಜಂಟಿ ಮಾನವ ಹಕ್ಕುಗಳ ಸಮಿತಿ’ ಎಂಬ ಬ್ರಿಟಿಷ್ ಸಂಸದೀಯ ಸಮಿತಿಯು ದಮನಕಾರಿ ದೇಶಗಳ ಪಟ್ಟಿಯನ್ನು ಪ್ರಕಟಿಸಿದೆ. ‘ಟ್ರ್ಯಾನ್ಸ್‌ನ್ಯಾಷನಲ್ ರಿಪ್ರೆಷನ್ ಇನ್ ದಿ ಯುಕೆ’ ಎಂಬ ಶೀರ್ಷಿಕೆಯ ವರದಿಯಲ್ಲಿ ೧೨ ದೇಶಗಳ ಹೆಸರಿದ್ದು, ಇದರಲ್ಲಿ ಭಾರತವೂ ಸೇರಿದೆ. ಇದರಲ್ಲಿ ಚೀನಾ, ರಷ್ಯಾ ಮತ್ತು ಟರ್ಕಿಯ ಹೆಸರುಗಳು ಮೊದಲ ಸ್ಥಾನದಲ್ಲಿವೆ. ಭಾರತವು ಈ ವಿಷಯದ ಬಗ್ಗೆ ಯಾವುದೇ ಅಧಿಕೃತ ಪ್ರತಿಕ್ರಿಯೆಯನ್ನು ನೀಡಿಲ್ಲ.

೧. ಕೆಲವು ವಿದೇಶಿ ಸರಕಾರಗಳು ಬ್ರಿಟನ್‌ನಲ್ಲಿ ವಾಸಿಸುವ ಜನರನ್ನು ಬೆದರಿಸಲು ಮತ್ತು ಅವರ ಧ್ವನಿಯನ್ನು ಹತ್ತಿಕ್ಕಲು ಪ್ರಯತ್ನಿಸುತ್ತಿವೆ ಎಂದು ವರದಿಯಲ್ಲಿ ಹೇಳಲಾಗಿದೆ. ಬ್ರಿಟನ್‌ನಲ್ಲಿ ವಾಸಿಸುವ ಜನರನ್ನು ಗುರಿಯಾಗಿಸುವ ಘಟನೆಗಳು ಹೆಚ್ಚುತ್ತಿವೆ. ಯುಕೆಯಲ್ಲಿ ವಿದೇಶಿ ಸರಕಾರಗಳ ಚಟುವಟಿಕೆಗಳು ಮಾನವ ಹಕ್ಕುಗಳಿಗೆ ಅಪಾಯಕಾರಿ. ಬ್ರಿಟಿಷ್ ಸರಕಾರವು ಇದರ ಮೇಲೆ ಕ್ರಮ ತೆಗೆದುಕೊಳ್ಳಬೇಕು.

೨. ವರದಿಯಲ್ಲಿ, ಭಾರತಕ್ಕೆ ಸಂಬಂಧಿಸಿದ ಪುರಾವೆಗಳಲ್ಲಿ ‘ಸಿಖ್ ಫಾರ್ ಜಸ್ಟಿಸ್’ ಎಂಬ ಖಲಿಸ್ತಾನಿ ಭಯೋತ್ಪಾದಕ ಸಂಘಟನೆಯ ಉಲ್ಲೇಖವಿದೆ ಎಂದು ಹೇಳಲಾಗಿದೆ. ಈ ಸಂಘಟನೆಯನ್ನು ಭಾರತವು ಕಾನೂನುಬಾಹಿರ ಚಟುವಟಿಕೆಗಳು (ತಡೆಗಟ್ಟುವಿಕೆ) ಕಾಯ್ದೆಯಡಿ ‘ಕಾನೂನುಬಾಹಿರ ಸಂಘಟನೆ’ ಎಂದು ಘೋಷಿಸಿದೆ.