ಕಾಕ್ರೋಚ್ ಜನತಾ ಪಕ್ಷದ ನಂತರ ಸಾಮಾಜಿಕ ಮಾಧ್ಯಮಗಳಲ್ಲಿ ‘ಇ-೨೦ ಜನತಾ ಪಕ್ಷ’ದ ಸ್ಥಾಪನೆ

ನವ ದೆಹಲಿ – ಕಾಕ್ರೋಚ್ ಜನತಾ ಪಕ್ಷದ ಆಂದೋಲನಕ್ಕೆ ಯಶಸ್ಸು ಸಿಕ್ಕ ನಂತರ, ಈಗ ಸಾಮಾಜಿಕ ಮಾಧ್ಯಮಗಳಲ್ಲಿ ‘ಇ-೨೦ ಜನತಾ ಪಕ್ಷ’ ಎಂಬ ಹೆಸರಿನ ಒಂದು ಗುಂಪನ್ನು ರಚಿಸಲಾಗಿದೆ. ‘ಇಥೆನಾಲ್’ ಮಿಶ್ರಿತ ಇಂಧನದೊಂದಿಗೆ ಶೇಕಡಾ 100 ರಷ್ಟು ಶುದ್ಧ ಪೆಟ್ರೋಲ್ ಖರೀದಿಸುವ ಆಯ್ಕೆ ಗ್ರಾಹಕರಿಗೆ ಸಿಗಬೇಕು ಎಂಬ ಬೇಡಿಕೆಗಾಗಿ ಈ ಗುಂಪನ್ನು ಸ್ಥಾಪಿಸಲಾಗಿದೆ. ಈ ಗುಂಪನ್ನು ಯಾರು ನಿರ್ಮಿಸಿದ್ದಾರೆ? ಇದರ ಸಂಸ್ಥಾಪಕರು ಯಾರು? ಎಂಬುದು ತಿಳಿದುಬಂದಿಲ್ಲ; ಆದರೆ ಸರಕಾರವು ಜಾರಿಗೆ ತಂದಿರುವ ಇಥೆನಾಲ್ ಮಿಶ್ರಣ ನೀತಿಯಿಂದಾಗಿ ಈ ಗುಂಪು ಕೇಂದ್ರ ರಸ್ತೆ ಸಾರಿಗೆ ಮತ್ತು ಹೆದ್ದಾರಿ ಸಚಿವ ನಿತಿನ ಗಡಕರಿ ಯವರ ರಾಜೀನಾಮೆಗೆ ಆಗ್ರಹಿಸಿದೆ.
ಈ ಗುಂಪು ಹೇಳಿದ್ದೇನೆಂದರೆ, ನಾವು ಯಾವುದೇ ಸಬ್ಸಿಡಿ, ಉಚಿತ ಇಂಧನ ಅಥವಾ ಇಥೆನಾಲ್ ಮಿಶ್ರಿತ ಪೆಟ್ರೋಲನ್ನು ಸಂಪೂರ್ಣವಾಗಿ ನಿಲ್ಲಿಸಬೇಕೆಂದು ಬೇಡಿಕೆ ಇಡುತ್ತಿಲ್ಲ. ಗ್ರಾಹಕರಿಗೆ ತಮ್ಮ ಇಷ್ಟದ ಇಂಧನವನ್ನು ಖರೀದಿಸುವ ಆಯ್ಕೆ ಸಿಗಬೇಕು, ಅಷ್ಟೇ ನಮ್ಮ ಬೇಡಿಕೆಯಾಗಿದೆ.

ಇಥೆನಾಲ್-ಮುಕ್ತ ಇಂಧನ ಸಿಗುವುದು ಕಷ್ಟಕರ!

ಸದ್ಯಕ್ಕೆ ಭಾರತದಲ್ಲಿ ಇಥೆನಾಲ್-ಮುಕ್ತ ಇಂಧನ ಲಭ್ಯವಿದೆ; ಆದರೆ ಅದು ಕೇವಲ ಕೆಲವು ಆಯ್ದ ಪೆಟ್ರೋಲ್ ಬಂಕ್‌ ಗಳಲ್ಲಿ ಮಾತ್ರ ಸಿಗುತ್ತದೆ ಮತ್ತು ಅದರ ಬೆಲೆ ಅತ್ಯಂತ ಹೆಚ್ಚಾಗಿದೆ. ದೆಹಲಿಯಲ್ಲಿ ಸಾಮಾನ್ಯ ‘ಇ-೨೦’ ಪೆಟ್ರೋಲ್ ಬೆಲೆ ಸುಮಾರು ರೂ. ೧೦೨.೧೨ ಪ್ರತಿ ಲೀಟರ್ ಇದ್ದರೆ, ಅಲ್ಲಿ ಈ ಪ್ರೀಮಿಯಂ ಇಂಧನ ಸುಮಾರು ರೂ ೧೬೯ ಪ್ರತಿ ಲೀಟರ್ ದರದಲ್ಲಿ ಮಾರಾಟವಾಗುತ್ತಿದೆ. ಇದರಿಂದಾಗಿ ಇದು ಸಾಮಾನ್ಯ ಗ್ರಾಹಕರ ಕೈಗೆಟುಕದಂತಾಗಿದೆ. ಇನ್ನೊಂದೆಡೆ, ಇಥೆನಾಲ್ ಮಿಶ್ರಿತ ಇಂಧನದಿಂದ ದೊಡ್ಡ ಪ್ರಮಾಣದಲ್ಲಿ ಸಮಸ್ಯೆಗಳು ಉಂಟಾಗಿವೆ ಎಂಬುದಕ್ಕೆ ಯಾವುದೇ ಪುರಾವೆಗಳಿಲ್ಲ ಎಂದು ಸರಕಾರ ಹೇಳಿದೆ.